پشكا هه‌رێمێ د پڕۆژه‌قانوونا بودجا ئیراقێ دا دێ هێته دیاركرن
هه‌ولێر، قائید میرۆ:
ئیراق مژوولی به‌رهه‌ڤكرنا پڕۆژه‌قانوونا بودجا گشتی یا سالا 2023یه و په‌رله‌مانتاره‌كێ كورد ژی ئاشكرا دكه‌ت كو پێشبینی دهێته كرن هه‌تا دووماهیا ئه‌ڤ ساله پڕۆژه بهێته به‌رهه‌ڤكرن و پشكا هه‌رێما كوردستانێ ژی دێ تێدا دیار بیت.
دكتۆر خالد رێكانی، په‌رله‌مانتارێ فڕاكسیۆنا پارتی ل په‌رله‌مانێ ئیراقێ بۆ رۆژناما ئه‌ڤرۆ دیار كر، پڕۆژه‌قانوونا بودجا ئیراقێ دهێته به‌رهه‌ڤكرن و گۆت: “هه‌موو بزاڤه‌ك دهێته كرن بۆ ده‌ستپێكا سالا نوو پڕۆژه بهێته ته‌مام كرن، داكو ژ لایێ په‌رله‌مانێ ئیراقێ ڤه خواندن بۆ پڕۆژه‌قانوونا بودجه‌یێ بهێته كرن، هه‌رێما كوردستانێ ب مه‌رج پشكداری د حوكمه‌تا نوو یا ئیراقێ دا كریه و پشكا هه‌رێما كوردستانێ د پرۆژه‌قانوونا بودجێ دا دێ هێته دیاركرن، مه داخواز كریه پشكا هه‌رێما كوردستانێ پتر ژ 17%ێ بیت”.
دكتۆر خالد رێكانی گۆتژی: “شاندێ دانوستانكارێ هه‌رێما كوردستانێ دێ پشكا هه‌رێما كوردستانێ ل گه‌ل حوكمه‌تا ئیراقێ ئێكلاكه‌ت، هیڤیدارین بگه‌هنه رێككه‌فتنێ، چونكی ئه‌ركێ حوكمه‌تا فیدڕله شایسته‌یێن هه‌رێما كوردستانێ بده‌ت، ڤێجا ژ پشكا بودجێ هه‌تا دگه‌هیته به‌هرا پێشمه‌رگه‌ی و ده‌رمان و هه‌موو شایسته‌یێن دی ژی، مخابن سالێن بۆری به‌غدا یا پێگیر نه‌بوویه ب هنارتنا پشكا هه‌رێمێ”.
