پلان بۆ زێدەکرنا رێژا ئاڤێ ل ھەرێما کوردستانێ ھاتیە دانان
دھۆک، لەزگین جۆقی:
ئەڤ سالە پێشبینی دھێتە کرن رێژەکا زۆر یا بارانێ ب باریت و رێڤەبەرێ گشتی یێ سکران ل وەزارەتا چاندنێ بۆ ئەڤرۆ دیارکر کو پلانا بجە ئینانا کۆمەکا سکران ل سالا ٢٠١٤ گەلەک ب خافی ب رێڤەچوویە ژبەر نەبوونا پارەی و پلان ھاتیە دانان رێژا ئاڤێ ل کوردستانێ ھەتا سالا ٢٠١٨ بگەھیتە سەر ١٥ ملیار مەترێن سێجا ژ ئاڤی، لێ بجە ئینانا وێ یا زەحمەت ژبەرکو کارتێکرنا بجە نە ئینانا پرۆژان ل سالا ٢٠١٤ دێ ل سەر ھەبیت.
ئەکرەم ئەحمەد رێڤەبەرێ گشتیێ سکران ل وەزارەتا چاندنێ و ژێدەرێن ئاڤێ ل ھەرێمێ بۆ ئەڤرۆ دیارکرکو ژبەر قەیرانا دارایی کار د بجە ئینانا سکرێن ئاڤی دا زۆر ب سستی برێڤە دچیت ئەو سکرێن دھێنە چێکرن ب دووماھی ناھێن ژبەر نەبوونا پارەی و کار دچێکرنا ھندەک سکران دا ھاتیە راوەستاندن یێ کار ژی تێدا دھێتە کرن زۆر ب لاوازی ب رێڤە دچیت.
ناڤبری ئەو ژی خۆیا کرکو گەلەک ئاڤ ل ھەرێما کوردستانی ب ھەروە دچیت ب تایبەتی ژی ئاڤا بارانێن زڤستانێ و زێدەبوونا ژێدەرێن ئاڤێ و پلان ھاتبوو دانان سکر بھێنە چێکرن بۆ کۆمکرنا ئاڤی لێ ژبەر قەیرانا دارایی ل سالا ٢٠١٤ دێ کارتێکرن ل پلانێ ھێتە کرن.
ئەکرەم ئەحمەد ئاماژە دا وێ چەندێ کو ل سالا ٢٠١٤ێ ل سەرانسەری ھەرێما کوردستانێ ب تنێ ٢٨ سکر کەڤتە واری بجە ئینانی دا و ڤەدیتن بۆ چێکرنا ٢٥ سکرێن دی ژی ھاتە کرن ژڤان سکران ژی سێ گەلەک دمەزنن دشێن ھەتا ٢٥٠ ھزار مەترێن سێجا ژ ئاڤێ کۆم بکەن و سکرێن دی ژی ھەموو د بچووکن و پلان ھاتیە دانان ھەتا سالا ٢٠١٨ رێژا ئاڤێ گەلەک بھێتە زێدەکرن لێ دێ یا ب زەحمەت بیت ١٠٠% بجە بھێت چونکو ئەڤ سالە پرۆژێ چێکرنا سکران ب سستی ب رێڤەچوو، نوکە کار دچێکرنا ھندەک سکران دا ھاتیە راوەستاندن.
ئەکرەم ئەحمەد ئاشکرا کرکو ل دووڤ پلانا ھاتیە دانان ھەتا سالا ٢٠١٨ ل ھەرێما کوردستانی ٣٠ سکرێن نوو بھێنە چێکرن ب ڤێ رێژێ دێ ئاستێ ئاڤێ ئەوا ھێتە کۆمکرن ل کوردستانێ زێدەبیت کو رێژا ئاڤی ھێتە کۆمکرن نوکە دگەھتە نەە ملیار و ٨٠٠ ملیۆن و ٧٢ ھزار مەترێن سێجا ئەڤ رێژە بھێتە زێدەکرن و بگەھیتە سەر ١٥ ملیار مەترێن سێجا ژ ئاڤی ل کوردستانێ، ھەکەر ئەڤ سالە پارە ھاتبانە دابینکرن دا شێین رێژا ئاڤی بگەھینینە ڤێ ژمارێ، لێ نەدابینکرنا پارەی ئاستەنگ دروستکرن.
دارا حەسەن رێڤەبەرێ گشتیێ کەشناسی و بیڤەلەرزان دیارکرکو پیشبینی دھێتە کرن زڤستانا ئەڤ سالە گەلەک باران بھێت و زڤستانەکا دژوار بیت ورەنگە زڤستانا ئەڤ سالە ل ھەیڤا ١٢ دەست پێ بکەت وگەلەک بەفر و باران بھێت ل دووڤ وان راپۆرتێن دەست مە کەڤتین زڤستانا بھێت وەکو سالێن حەڤتیان و ھەشتیان بیت و لەھیێن بارانێ دروست ببن و دھێتە چاڤەرێکرن ئەڤ سالە ئاستێ باران بارینێ گەلەک بلند ببیت.
