پلان هه‌یه 20 سكرێن ئاڤێ د سالا بهێت دا ل دهۆكێ بهێنه چێكرن
دهۆك، له‌زگین جوقی:
رێڤه‌به‌ریا ئاڤدێری ل پارێزگه‌ها دهۆكێ دیار كر، پلانا چێكرنا 20 سكرێن نوو یێن بچووك بۆ عمباركرنا ئاڤێ ل پارێزگه‌ها دهۆكێ د سالا بهێت دا هاتیه دانان.
هێژا عه‌بدولواحد سالح، رێڤه‌به‌رێ ئاڤدێری ل پارێزگه‌ها دهۆكێ بۆ رۆژناما ئه‌ڤرۆ دیار كر، پلان هاتیه دانان دا سالا 2023ێ دا ل پارێزگه‌ها دهۆكێ 20 سكرێن بچووك بۆ عمباركرنا ئاڤێ بهێنه چێكرن و گۆت: “مه پلانا چێكرنا ڤان سكرێن ئاڤێ دایه ئێدارا پارێزگه‌ها دهۆكێ و ب رێیا وان ژی بۆ حكومه‌تا هه‌رێما كوردستانێ، داكو رازیبوون ل سه‌ر بهێته كرن و بهێنه چێكرن”.
رێڤه‌به‌رێ ئاڤدێری ل پارێزگه‌ها دهۆكێ ئاشكرا ژی كر، بۆ چێكرنا وان هه‌ر 20 سكرێن ئاڤێ گوژمێ 15 ملیار دیناران هاتیه پیشنیازكرن، ئه‌ڤ سكرێن ئاڤێ ل ده‌ڤه‌رداریێن دهۆك و شێخان و ئاكرێ و ئامێدیێ و سێمیلێ دێ هێنه چێكرن.
هێژا عه‌بدولواحد گۆت: “پڕۆژه‌یێ راكێشانا ئاڤێ ژ به‌نداڤا مووسلێ بۆ به‌نداڤا دهۆكێ به‌ری چه‌ند سالان هاتبوو راگرتن، لێ نوكه حكومه‌تا هه‌رێما كوردستانێ دووباره ده‌ست بجهئینانا وی پڕۆژه‌یی كریه و پڕۆژه د قووناغێن بجهئینانێ دایه، بڕیاره د ده‌مێ ساله‌كێ دا پڕۆژه ب دووماهی بهێت و ئاڤ ژ رووبارێ دیجله‌ی ل به‌نداڤا مووسلێ بۆ به‌نداڤا دهۆكێ بهێته راكێشان”.
