پلا گه‌رماتيێ دێ بيته -3 و به‌فر دێ باريت
ئه‌ڤرۆ نيوز، نيوار محه‌مه‌د سه‌ليم:
رێڤه‌به‌ريا گشتيا كه‌شناسى و بيڤه‌له‌رزێ ل هه‌رێما كوردستانێ راگه‌هاند كو دێ هه‌رێم كه‌ڤيته به‌ر پێله‌كا دى يا مه‌زنتر يا به‌فر و بارانا و پلا گه‌رماتيێ ژى دێ گه‌له‌ك هێته خوار.
د نڤيساره‌كێ دا كو دانه‌ك بۆ ئه‌ڤرۆ نيوز هنارتيه، پشكا پێشبينيان ل رێڤه‌به‌ريا گشتيا كه‌شناسى و بيڤه‌له‌رزێ ل هه‌رێما كوردستانێ راگه‌هاند كو ل رۆژا 7\1\2015 هه‌رێما كوردستانێ دێ كه‌ڤيته به‌ر شه‌پۆله‌كا به‌فر و بارانان ژ ئه‌نجامێ و دروست بوونا ڤان كاودانان دێ هه‌رێمێ ئێخيته بن فشارێن نزم و كوور يێن توركيا كو هه‌وايه‌كێ گه‌له‌ك سار يێ ناڤه‌راستا ئه‌ورۆپا ل گه‌له دێ گه‌هنه هه‌رێما كوردستانێ.
دايه زانين ژى كو ژ ئه‌گه‌رێ ڤێ چه‌ندێ دهێته پێشبينيكرن ل هه‌موو ده‌ڤه‌رێن چيايى ل گه‌ل سه‌نته‌رێ پارێزگه‌هێن دهۆك و سلێمانيێ به‌فر بباريت.
پشكا پێشبينيان ل رێڤه‌به‌ريا گشتيا كه‌شناسى و بيڤه‌له‌رزێ ل هه‌رێما كوردستانێ ئاشكه‌را ژى كر كو كارتێكرنا ڤان فشاران ل سه‌ر هه‌رێمێ دێ چه‌ند رۆژه‌كان ڤه‌كێشيت و ل پتريا ده‌ڤه‌ران دێ پلا گه‌رماتيێ بۆ بن سفرێ هێته خوار.
ل دۆر پلێن نزمێن پێشبينيكرى يێن گه‌رماتيێ ژى ئاشكه‌را كريه كو ل دهۆك و سلێمانيێ دێ دو هه‌تا سێ پلان هێته دبن سفرێ دا و ل هه‌ولێر و كه‌ركووك ژى دێ سفر بيت و هنده‌ك جاران ژى گه‌هيته -1ێ.
