پلێتێن ئاھێن خوارنێ یێن ھژمارەکا وەلاتیان دھێنە ھەلوەشاندن
ئه‌ڤرۆ نيوز:
رێڤەبەرێ رێکخستنا پلێتێن ئاھێن خوارنێ ل پارێزگەھا دھۆکێ دیار کر کو بەغدا بڕیار دایە پلێتێن ئاھێن خوارنێ یێن وەلاتیێن ئیرانی، سووری، تورکی و دەولەتیێن دی یێن بیانی ل عیراقێ ھەموویێ بھێنە ھەلوەشاندن.
حسێن سەبری، رێڤەبەرێ رێکخستنا پلێتێن ئاھێن خوارنێ ل پارێزگەھا دھۆکێ بۆ ئەڤرۆ دیار کر، ھندەک کەس ژ وەلاتێن ئیران، سووریا، تورکیا و ھندەک دەولەتێن دی یێن ھاتینە عیراقێ و ل گەلەک پارێزگەھان وەکو پەنابەر ئاکنجیی بووینە و گۆت: “ریژەکا کێم یا وان وەلاتیان ل پارێزگەھا دھۆکێ نە، د وەختێ دا بڕیار ھاتبوو دان پشکا ئاھێن خوارنێ بۆ وان بھێتە دابینکرن وەکو وەلاتیێن دی، لێ ئەڤ سالا بەغدا بڕیار دایە پلێتێن وان یێن ئاھێن خوارنێ بھێنە ھەلوەشاندن و ژ وەرگرتنا ئاھێن خوارنێ بھێنە بێ بەھرکرن”.
ئاماژە دا وێ چەندی ژی کو ھەر کەسەکێ رەگەزناما عیراقی ھەبیت، پلێتا وی یا ئاھێن خوارنێ ناھێتە ھەلوەشاندن، ب تنێ دێ یێن وان خێزانان ھێتە ھەلوەشاندن، یێن مافێ ئاکنجیبوونێ ھەی و پلێتا ئاھێن خوارنێ ل بەغدا بۆ ھاتیە دروستکرن، سالا بۆری ژی بەغدا ئەڤ بڕیارە دابوو ھەلوەشینیت، ئەڤ سالە جارەکا دی بڕیارا خوە نوو کریە، رەنگە پشتی ھەلوەشاندنا ناڤێن وان ژ پلێتا ئاھێن خوارنێ، ھەر کەسەکێ رەگەزناما عیراقی وەربگریت دێ پلێتا وی یا ئاھێن خوارنێ بۆ ھێتە دروستکرن و ناھێتە ھەلوەشاندن.
حسێن سەبری ئاشکرا ژی کر، پشتی عیراق تووشی قەیرانا دارایی بووی، ئەڤ بڕیارە دایە، ئەڤ سالە ژی دوپاتی ل سەر بڕیارا خوە کریە، پتریا وان کەسان یێن د رەسەن دا نە خەلکێ عیراقێ و پلێتا ئاھێن خوارنێ ھەی ل پارێزگەھێن عیراقی نە، پێدڤیە ئەو ل پارێزگەھێن خوە ڤێ بڕیارێ بجە بینن، چونکو رەنگە کەسێن ئەفغانی ھەبن ل عیراقێ و پلێتا ئاھێن خوارنێ ھەبیت.
