په‌رله‌مانتاره‌كێ كورد داخوازا لێپرسینێ ل گه‌ل وه‌زاره‌تا كۆچ و كۆچبه‌ران دكه‌ت
دهۆك، له‌زگین جوقی:
سه‌رۆكێ لژنا كۆچ و كۆچبه‌ران ل په‌رله‌مانێ ئیراقێ دیار كر، وه‌زاره‌تا كۆچ و كۆچبه‌رێن ئیراقێ ئاهێن خوارنێ یێن ده‌م ب سه‌رڤه‌چوویی ل سه‌ر ئاواران ل سنوورێ پارێزگه‌ها دهۆكێ به‌لاڤكرینه و دبێژیت: ئه‌م یێ كار دكه‌ین لێپرسین ل گه‌ل وه‌زاره‌تا كۆچ و كۆچبه‌رێن ئیراقێ ل سه‌ر كه‌یسا ئاهێن خوارنێ یێن ده‌م ب سه‌رڤه‌چوویی بهێته كرن.
شه‌ریف سلێمان، سه‌رۆكێ لژنا كۆچ و كۆچبه‌ران ل په‌رله‌مانێ ئیراقێ بۆ رۆژناما ئه‌ڤرۆ دیار كر، ل كه‌مپا مامره‌شان ل سنوورێ پارێزگه‌ها دهۆكێ و ل گه‌له‌ك كه‌مپێن دی ژی یێن ئاواران ئاهێن خوارنێ یێن ده‌م ب سه‌رڤه‌چوویی ل سه‌ر ئاواران هاتینه به‌لاڤكرن و گۆت: “ده‌ستكار ژی د مێژوویا وان ئاهێن خوارنێ دا هاتیه كرن، ئه‌م ل په‌رله‌مانێ ئیراقێ ل سه‌ر ڤێ كه‌یسێ یێ كار دكه‌ین، لیژنا كۆچ و كۆچبه‌ران ل په‌رله‌مانێ ئیراقێ داخواز ژ سه‌رۆك وه‌زیرێ ئیراقێ كریه لێپرسینێ ل گه‌ل وه‌زاره‌تا كۆچ و كۆچبه‌رێن ئیراقێ بكه‌ت ل سه‌ر كه‌یسا به‌لاڤكرنا ئاهێن خوارنێ یێن ده‌م ب سه‌رڤه‌چوویی و نه ل دووڤ سالوخه‌تان”.
زێده‌ترگۆت: “نه‌بتنێ ئاهێن خوارنێ یێن خراب داینه ئاواران، به‌لكو ده‌ستكاری ژی د مێژوویا ئاهێن خوارنێ دا هاتیه كرن، ئه‌ڤه ژی بۆ خه‌مساریا حكومه‌تا ئیراقێ ڤه‌دگه‌ریت، ب تایبه‌تی ژی وه‌زاره‌تا كۆچ و كۆچبه‌ران د كه‌یسا ئاواران دا، ئه‌م نوكه ل سه‌ر ڤی بابه‌تی یێ كار دكه‌ین، داكو لایه‌نێ گه‌نده‌لی د ئاهێن خوارنێ دا كری بهێته سزادان”.
