په‌رله‌مانتاره‌كێ ده‌وله‌تا قانوونێ: شانده‌كێ چارچۆڤێ هه‌ماهه‌نگیێ دێ سه‌ره‌دانا هه‌ولێرێ كه‌ت
ئه‌ڤرۆ:
ئه‌ندامه‌كێ جڤاتا نوونه‌رێن ئیراقێ ژ لیستا ده‌وله‌تا قانوونێ ب سه‌رۆكایه‌تیا نوری مالكی راگه‌هاند، بریاره ل ده‌مه‌كێ نێزیك شانده‌كێ هه‌ڤپه‌یمانیا چارچۆڤێ هه‌ماهه‌نگیێ سه‌ره‌دانا هه‌رێما كوردستانێ بكه‌ت و ل گه‌ل پارتی دیموكراتی كوردستان و ئێكه‌تی نیشتمانی كوردستان كۆمببیت و ده‌ستپێشخه‌ریه‌كێ به‌رچاڤ بكه نبۆ هه‌لبژارتنا سه‌رۆك كۆماری و پێكئینانا حوكمه‌تا ئیراقی یا نوو.
عارف حه‌مامی، په‌رله‌مانتارێ ده‌وله‌تا قانوونێ كو ئێك ژ ئالیێن سه‌ره‌كی یا چارچۆڤێ هه‌ماهه‌نگیێ یه سه‌باره‌ت ده‌ستپێشخه‌ریا ناڤبری بۆ ئالیێن سیاسی گۆت” سه‌ركردێن هه‌ڤپه‌یمانیا چارچۆڤێ هه‌ماهه‌نگیێ رێككه‌فتنیه كو سه‌ره‌دانا هێز و ئالیێن سیاسی بكه‌ن ب مه‌به‌ستا زانینا هه‌لویستێ وان سه‌باره‌ت چاره‌سه‌ركرنا وێ گریا سیاسی یا ئیراق كه‌فتیه تێدا وبوویه گه‌ف ل سه‌ر پرۆسا سیاسی”.
حه‌مامی گۆت ژی” بریاره ل ده‌مه‌كێ نێزیك كو دبیت د ڤێ حه‌فتیێ دا بیت یان ل حه‌فتیا داهاتی، شانده‌كێ هه‌ڤپه‌یمانیا چارچۆڤێ هه‌ماهه‌نگیێ سه‌ره‌دانا هه‌ولێرێ بكه‌ت و دبیت سه‌ره‌دانا سلێمانیێ ژی بكه‌ت بۆ وێ چه‌ندێ ل گه‌ل ئالیێن سیاسی ب تایبه‌ت پارتی دیموكراتی كوردستان و ئێكه‌تی نیشتمانی كوردستان كۆمببیت”.
وی په‌رله‌مانتارێ ئیراقی ئاماژه كر كو ئه‌و شانده دێ سه‌ره‌دانا هه‌رێما كوردستانێ كه‌ت بۆ گه‌هاندنا بۆچوونا هه‌ڤپه‌یمانیا چارچۆڤێ هه‌ماهه‌نگیێ ل دۆر وێ ده‌ستپێشخه‌ریا به‌رهه‌ڤكری بۆ ده‌رخستنا ئیراقێ ژ وێ كێشا تێكه‌فتی، چونكه ناخوازین حوكمه‌ته‌كێ بێ ره‌وتێ سه‌دری دروست بكه‌ین، له‌وما دبیت ل گه‌ل ره‌وتێ سه‌دری ژی كۆم ببین”.
نێزیكی شه‌ش هه‌یڤایه كێشه د ناڤبه‌را هێزێن سیاسی یێن سه‌ركه‌فتی د هه‌لبژارتنێن 10 چریا ئێكێ 2021 به‌رده‌وامه وناكۆكی د ناڤبه‌را هه‌ڤپه‌یمانیا رزگاركرنا نیشتمانی ( ره‌وتێ سه‌دری، پارتی دیموكراتی كوردستان، هه‌ڤپه‌یمانیا سیاده) و هه‌ڤپه‌یمانیا چارچوڤێ هه‌ماهه‌نگیێ ل دۆر هه‌لبژارتنا سه‌رۆك كۆماری و پێكئینانا حوكمه‌تێ و مه‌زنترین فراكسیۆنا جڤاتا نوونه‌ران، ئه‌و چه‌نده ژی بوویه ئه‌گه‌ر ئالیه‌ك بێ یێ دی نه‌شێت سه‌رۆك كۆماری هه‌لبژێریت یان حوكمه‌تێ پێك بینیت.
هه‌رچه‌نده بریار بوو ل رۆژا چارشه‌مبیا بۆری 30 ئادارا 2022 روونشتنا جڤاتا نوونه‌رێن ئیراقێ یا تایبه‌ت ب هه‌لبژارتنا سه‌رۆك كۆمارێ نوو بهێته ئه‌نجامدان، به‌لێ ژ ئه‌گه‌رێ بایكۆتكرنا روونشتنێ ژئالیێ چارچۆڤێ هه‌ماهه‌نگیێ ل گه‌ل چه‌ند فراكسیۆنێن دی، روونشتن هه‌ڤشێوێ روونشتنا به‌رێ وێ نه‌هاته ئه‌نجامدان، چونكه هه‌ڤپه‌یمانیا سێ قۆلی د ناڤبه‌را ره‌وتێ سه‌دری و پارتی و سوننه‌یان نه‌شیا 220 په‌رله‌مانتاران ب به‌رهه‌ڤبوون ل روونشتنا هه‌لبژارتنا سه‌رۆك كۆماری رازی بكه‌ت، د ده‌مه‌كی دا ب گۆره‌ی بریارا دادگه‌ها فیدرالی یا ئیراقی بۆ ده‌ستپێكرنا روونشتنا هه‌لبژارتنا سه‌رۆك كۆماری پێدڤیه 220 په‌رله‌مانتار د روونشتنێ دا د به‌رهه‌ڤ بن.
