په‌رله‌مانتاره‌ك به‌حسێ هنارتنا پارێ مووچێ دو هه‌یڤان بۆ فه‌رمانبه‌رێن كوردستانێ دكه‌ت
ئه‌ڤرۆنیوز:
ئه‌ندامه‌كێ لژنا دارایی ل په‌رله‌مانێ عیراقێ به‌حسێ هنارتنا پارێ دو هه‌یڤان یێ مووچێ فه‌رمانبه‌رێن هه‌رێما كوردستانێ ژلایێ حوكمه‌تا عیراقێ دكه‌ت وئاشكراكر كو پێدڤیه ریّژه‌كا مه‌زن یا پاره‌ی بۆ ڤێ مه‌ره‌مێ بهێته هنارتن.
ئه‌ڤرۆ ئێكشه‌مبی 17/2/2019 هشیار عه‌بدولا ئه‌ندامێ لژنا دارایی ل په‌رله‌مانێ عیراقێ ژ فراكسیۆنا بزاڤا گۆران د به‌رپه‌رێ خوه ل سه‌ر تۆرا جڤاكی یا فه‌یسبووكی به‌لاڤكر” ل دووڤ قانوونا ئیدارا دارایی یا هژمار 95 یا سالا 2004، سالا دارایی ل ئێكێ هه‌یڤا كانوونا دویێ ده‌ستپێدكه‌ت ول 31 كانوونا ئێكێ ب دووماهی دهێت، له‌وما نوكه كو یودجا سالا 2019 هاتیه په‌سه‌ندكرن، ب گۆره‌ی قانوونێ، پێدڤیه عیرق ژ هه‌یڤا كانوونا دویێ پشكا بودجا هه‌رێما كوردستانێ ب هنێریت، ئانكو جوداهیا دناڤبه‌را 317 ملیار دیناران ل گه‌ل پشكا هه‌رێما كوردستانێ ل دووڤ قانوونا بودجا 2019 بۆ هه‌یڤێن كانوونا دویێ وشوبانێ ب هنێریت”.
دیاركر ژی” هه‌كه هه‌رێما كوردستانێ په‌ترۆلا خوه ژی راده‌ستی كۆمپانیا ب بازاركرنا په‌ترۆلا عیراقێ نه‌كه‌ت، دڤێت حوكمه‌تا عیراقێ هه‌یڤا دسه‌ر 500 ملیار دیناران بۆ هه‌رێما كوردستانێ ب هنێریت، به‌لێ ل هه‌یڤێن كانوونا دویێ وشوباتێ تنێ 317 ملیار دینار هنارتینه، له‌وما دڤێت پتر ژ 400 ملیار دینارێن دی ب هنێریت”.
خویاكر ژی” هنارتنا وی گۆژمێ پاره‌ی، پشتی رازیبوونا سه‌رۆك وه‌زیرێن عیراقێ، ئه‌ركێ وه‌زیرێ دارایی یێ عیراقێ یه”.
پێشتر رێباز حه‌ملان، وه‌زیرێ دارایی وئابووری ل هه‌رێما كوردستانێ راگه‌هاندبوو” هه‌كه به‌غدا سێ مووچان پێكڤه ب هنێریت، حوكمه‌تا هه‌رێما كوردستانێ دشێت مووچێ سێ هه‌یڤان پێكڤه به‌لاڤ بكه‌ت”.
