په‌رله‌مانتاره‌ك: وه‌رگرتنا پارێ ڕاكرنا گلێشی یا یاسایی نینه
هه‌ولێر، قائید میرۆ:
بڕیارا وه‌رگرتنا پارێ راكرنا گلێشی كه‌فتیه د بیاڤێ بجهئینانێ دا و په‌رله‌مانتاره‌ك ژی دبێژیت: ل گوره‌ی قانوونا باژێڕڤانیان نابیت پاره هه‌مبه‌ر پێشكێشكرنا خزمه‌تگوزاریان ژ وه‌لاتیان بهێته وه‌رگرتن هه‌تا قانوون دهێته راستڤه‌كرن.
عومه‌ر گولپی، ئه‌ندامێ په‌رله‌مانێ كوردستانێ بۆ رۆژناما ئه‌ڤرۆ دیار كر، هه‌ر جۆره باج و رسوماته‌ك بهێته وه‌رگرتن یان زێده‌كرن ل هه‌مبه‌ر پێشكێشكرنا خزمه‌تگوزاریان ژلایێ حوكمه‌تێڤه، دڤێت ل گوره‌ی قانوونێ بهێته وه‌رگرتن و گۆت: “ل هه‌رێما كوردستانێ قانوونا هه‌ژماره 130 یا سالا 1963 تایبه‌ت ب باژێڕڤانیان ڤه كار ب ڤێ قانوونێ دهێته كرن و ل عیراقێ چه‌ند جاره‌كان هاتیه راستڤه‌كرن، حوكمه‌تا هه‌رێما كوردستانێ هه‌مبه‌ر وه‌رگرتنا كرێیا هاڤێتنا گلێشی ل جهێن بازرگانی و مالان یان دڤێت قانوونه‌كا نوو ده‌ربكه‌ت یان ژی قانوونا به‌رێ بهێته راستڤه‌كرن، نابیت ب ده‌ركرنا بڕیار و رێنمایان پاره بهێته وه‌رگرتن”.
عومه‌ر گولپی گۆتژی: “ل گوره‌ی ئه‌ڤێ قانوون و بڕیار ژلایێ وه‌زاره‌تا باژێڕڤانیان ڤه كار ل سه‌ر دهێته كرن بۆ وه‌رگرتنا پاره‌ی هه‌مبه‌ر كۆمكرنا گلێشی به‌روڤاژی قانوونێیه، چونكو ل گوره‌ی قانوونا باژێڕڤانیان ئه‌ركێ راكرن و هاڤێتنا گلێشی دڤێت ژلایێ فه‌رمانبه‌رێن وه‌زاره‌تێ بیت نه‌ك بده‌نه كه‌رتێ تایبه‌ت و كۆمپانیان، نوكه من داخوازا كری ئه‌و بڕیار بهێته راگرتن و جڤاتا وه‌زیران ب رێیا په‌رله‌مانی قانوونێ راستڤه بكه‌ت”.
