په‌رله‌مانتاره‌ك: کورد ئەنقەرە ژ بەغدا پتر نێزیکی خوە دبینن
ئەڤرۆ:
ئەندامەکێ پەرلەمانێ عیراقێ، د ھەڤدیتنەکێ دا ل گەل رۆژناما ئەڤرۆ دیارکر کو کوردان کارتێن گڤاشتنێ ل سەر بەغدا یێن ھەین و دیسا بەحسێ سەربەخوەیا ئابووری ل ھەرێما کوردستانێ دکەت و رێیێن چارەسەریێ و دەسپێکێ بۆ سەربەخوەیا ئابووری یا کوردستانێ د دەتە دیارکرن.
موحسن ئوسمان، ئەندامێ پەرلەمانێ عیراقێ ل سەر لیستا ئێکەتیێ بۆ ئەڤرۆ گۆت”دیارە گەلەک رێککەفتن د ناڤبەرا ھەولێرێ و بەغدا دا یێن ھەین، لێ بنگەھێ کێشێ یێ دیارە وەکو ئێکن، وەک دیرۆک بۆمە بەرچاڤ دکەت، ژ سالا دامەزراندنا دەولەتا عیراقێ ١٩٢١ وەرە کوردان کێشە ل گەل بەغدا ھەبووینە، حوکمەتێن بەغدا ھەموو جۆرێن چەکی دژی گەلێ کورد بکارئیناینە. ئەڤرۆ رەوشا عیراقێ دخوازیتە جۆرەکێ دیمۆکراتیا ھەماھەنگی، چونکو گەلەک نەتەوە، ئۆل و مەزھەب ل عیراقێ یێن ھەین، عیراقەکا ساخلەم بێی (سونە، شیعە، کوردان) نابیت چونکو دیرۆک و ئەزموونێن عیراقێ ب زەلالی ڤێ راستیێ بەرچاڤ دکەن، پاشەرۆژا رێککەفتنا مە ل گەل بەغدا گرێدای نیاز و راستگۆیا ھەر دو لایەنانە”.
موحسنی گوت ژی” ئەو داتایێن داھاتیێن کوردستانێ ئەوێن ئەم د دەینە بەغدا و ئەوێن (ئەنقەرە و تەھران)ێ د دەنە بەغدا وەکو ئێک نینن، دبیت ئەڤ ئێکە ل ھەموو داھاتیێ عیراقێ ھەبیت، ھەکە نیاز دباش بن، دێ پاشەرۆژا رێککەفتنێن مە ژی د باش بن”.
ل ھەمبەر چاڤەرێیا بەردەوام یا ھاتنا مووچان ژ بەغدا، (موحسن ئوسمان) ی گۆت” وەکو ئەزموون و دەولەتداری بەغدا ژ مە باشترە، ئەم ھێشتا باش فێری یاریێن سیاسی نەبووینە، ئەو پرسگرێکێن مە ل گەل مالکی ھەین، ھەکە مە باشتر رەفتار کربا، دا ئەڤرۆ ئەنجام باشتر بن، چونکو ئەو داگێڕانا مە ل گەل عەبادی کری، ھەکە مە ل گەل مالکی و سۆمۆ کربا، گەلێ مە ب ترلیۆن دۆلاران زیاندار نەدبوو، کورد ب گشتی د دیالۆگان دا د لاوازن، پتر پالپشتیێ ل سەر دلینی و خرۆسکان ژ عەقل و لۆژیکی دکەن!، کورد نزانن چ دڤێت، گەلۆ کوردان چ (ئۆتۆنۆمی) فیدرالیەت و دەولەت دڤێت، پێدڤیە ل گۆر ئێک ژ ڤان فۆرمێن دەستھەلاتێ کورد رەفتاران بکەن”.
زێدەتر گوت”مە بۆ دەمێ (٥٠) سالان گرێبەست ل گەل ئەنقەرە بۆ ھنارتنا پەترۆلێ کر، ئەم بۆچی بۆ دەمێ (پێنچ) سالان ل گەل بەغدا ناکەین؟، کورد پتر بەغدا یان ئەنقەر نێزیکی خوە دبینن، ئەڤە ئەگەرێن ئاریشێن مەنە ل گەل بەغدا ، ئەڤجا چ مووچە یان پرسێن دی، ئەم جارێ ڤی دەمی و یێ داھاتی ژی دێ مووچێن مە ھەر ژ بەغدا ھێن، چونکو ئەم پشکەکین ژ عیراقێ و بەغدا چ خێران بۆ خوە ناکەت”.
ل دۆر سەربەخوەیا ئابووری ژی ل ھەرێمێ، ڤی ئەندامێ پەرلەمانێ عیراقێ گۆت” دڤێت کورد کار ب ستراتیژیەتێ بکەن، دڤێت ل کوردستانێ کارگەە بھێنە دامەزراندن، دڤێت گەشتوگوزار و ب تایبەتی ل دھۆکێ بھێنەکارکرن، دڤێت رێیا جۆتۆ کێلێ بھێتە خوەشکرن، ھەروەسا ئەو داھاتیێ کوردستانێ ب وژدان بھێتە بەلاڤکرن و وەلاتیێ کورد ژێیاتێ بۆ کورد و گوردستانێ ھەبیت، ب ڤان کاران و پشتی کوردستان بببیتە دەولەت، دێ ھینگێ سەربەخوەیا ئابوورێ کوردستانێ راگەھینین”. ل ھەمبەر کارتێن گڤاشتنێ ژی، موحسن ئوسمان گۆت” باشترین کارتا گڤاشتنێ کو کوردان ل سەر بەغدا ھەبیت، ئێکرێزیا مالا کوردانە، کورد وانەیان ژ ئەزمووونێن خوە و جیھانێ وەردگرن، چونکو کورد سیاسی بیر دکەن و ب مروڤایەتی رەفتاران دکەن، دڤێت کورد گەلەک ب عەقلانی و دیپلۆماسی رەفتارێ ل گەل بەغدا بکەن، چونکو رەوشا عەرەبان (شیعە و سونەیان) ژ مە خراپترە، مالا سونەیان و یا شیعان پڕی کێشەنە، دڤێت کورد ڤێ ئێکێ وەکو کارتێن گڤاشتنێ بکاربینن، بنێرە دەسھەلاتا نوکە یا عیراقێ نە ژ سەدامی و نە ژی ژ داعشێ ب ھێزترن و نە ژی ب خوەدانترن، بەلێ کوردان بەرگێ ھەردوکان گرت، مە پێشمەرگە یێ ھەی، مە راگەھاندن یا ھەی، مە خەلکێ دلێر و عەگید یێ ھەی، دڤێت سەرکردێن مە بکارن ڤێ دەرفەتێ بکاربینن و بەغدا نەچار بکەن، مەرجێن مە قەبوول بکەن، لێ مخابن ھەتا نوکە ئەڤە نە ھاتیەکرن”.