په‌رله‌مانتار دخوازن روونشتنه‌كا په‌رله‌مانێ ل دهۆكێ بهێته ئه‌نجام دان
ئه‌ڤرۆ نيوز، نيوار محه‌مه‌د سه‌ليم:
51 په‌رله‌مانتار ژ فراكسيۆنێن جودا يێن په‌رله‌مانێ كوردستانێ دخوازن، په‌رله‌مانێ كوردستانێ روونشتنه‌كێ ل دهۆكێ ئه‌نجام بده‌ت دا ژ نێزيك ئاگه‌هدارى ره‌وشا وى باژێرى ببيت.
محه‌مه‌د عه‌لى ياسين، ئاخفتنكه‌رێ ب ناڤێ فراكسيۆنا پارتى ديموكراتى كوردستان ل په‌رله‌مانێ كوردستانێ، بۆ ئه‌ڤرۆ نيوز راگه‌هاند كو 51 په‌رله‌مانێن كوردستانێ ياداشته‌ك دايه سه‌رۆكاتيا په‌رله‌مانێ كوردستانێ دا كو روونشتنه‌كا فه‌رمى يا په‌رله‌مانێ كوردستانێ ل دهۆكێ بهێته ئه‌نجام دان.
زێده‌تر گۆت: “مه‌ره‌م ژ ڤێ روونشتنا په‌رله‌مانى بۆ وێ چه‌ندێ يه ژ نێزيك هايدارى ره‌وشا وێ پارێزگه‌هێ ببن ژ لايێ ئاستێ هه‌ژاريێ و بێكارى و ئه‌و بارگرانيا ژ به‌ر ئاواران كه‌فتيه سه‌ر پارێزگه‌هێ و د هه‌مان ده‌م دا، كێميا وێ بودجا بۆ پارێزگه‌هێ دهێته دانان”.
ئاخفتنكه‌رێ ب ناڤێ فراكسيۆنا پارتى ديموكراتى كوردستان ل په‌رله‌مانێ كوردستانێ دا زانين ژى كو فراكسيۆنا پارتى ل دهۆكێ يا ڤه‌كۆلينه‌كێ ئه‌نجام دده‌ت بۆ دياركرنا رێژا هه‌ژارى و بێكاريێ يا ل وێ پارێزگه‌هێ هه‌يى.
هه‌كه هات و ئه‌ڤ روونشتنه هاته ئه‌نجام دان دێ بيته جارا دويێ كو په‌رله‌مانێ كوردستانێ د ڤێ خۆلا خوه دا روونشتنه‌كا خوه ژ ده‌رڤه‌يى هۆلا خوه ئه‌نجام دده‌ت پشتى به‌رى نوكه ل پارێزگه‌ها هه‌له‌بچه هاتيه ئه‌نجامدان.
