په‌رله‌مانێ عيراقێ پێشنيارا گه‌ماردانا ئاڤاهيێ كۆمسيۆنا هه‌لبژارتنان دكه‌ت
ئه‌ڤرۆنيوز:
لژنا ڤه‌كۆلينێ يا په‌رله‌مانێ عيراقێ ل دۆر ئه‌نجامێن هه‌لبژارتنێن عيراقێ بۆ تمامكرنا ڤه‌كۆلينێن خوه چه‌ندين پێشنيازان دكه‌ت كو ئێك ژوان گه‌ماردانا ئاڤاهيێ كۆمسيۆنا بلند يا هه‌لبژارتنايه.
عادل نورى، سه‌رۆكێ لژنا په‌رله‌مانێ عيراقێ بۆ ڤه‌كۆلينێ ل ئه‌نجامێن هه‌لبژارتنان، دداخۆيانيه‌كا رۆژنامه‌ڤانى بۆ مالپه‌رێ (بغداد اليوم) به‌حسێ هنده‌ك پێشنيازان دكه‌ت كو لژنا ناڤبرى به‌رهه‌ڤكرينه بۆ وێ چه‌ندێ سوباهى چارشه‌مبى بده‌ته سه‌رۆكاتيا په‌رله‌مانى.
ئێك ژوان پێشنيارێن عادل نورى ئاماژه پێداى، گه‌ماردانا ئاڤاهيێ كۆمسيۆنا هه‌لبژارتنايه تاكو نه‌شێت ئاميرێن تايبه‌ت ب ده‌نگدانێ ڤه ببه‌ته ده‌رڤه‌ى وى ئاڤاهى، هه‌روه‌سا پێشنياز هه‌يه كو رێگرى ل گه‌شتكرنا ئه‌ندامێن كۆمسيۆنێ بهێته كرن.
عادل نورى دبێژيت” پێشنيازێن دى ژى يێن هه‌ين كو ئه‌ڤرۆ سێشه‌مبى دێ هێنه تمامكرن وسوباهى چارشه‌مبى 6/6/2018 دێ هێنه بلندكرن بۆ سه‌رۆكاتيا په‌رله‌مانى،كا ئايا دێ په‌رله‌مان ب خوه بريارا كاركرنێ ل سه‌ر ده‌ت، يان دێ ده‌ته لايه‌نێن دى بۆ بجهئينانێ”.
نه‌رازيبوون ژئه‌نجامێن هه‌لبژارتنێن 12/5/2018 يێن په‌رله‌مانێ عيراقي، چه‌ندين لژنه بۆ هاتينه پێكئينان، ژوان لژنه‌ك ژلايێ سه‌رۆكاتيا جڤاتا وه‌زيرێن عيراقێ ولژنه‌ك ژلايێ په‌رله‌مانێ عيراقێ ولژنه‌كا دى ژلايێ دادگه‌ها فيدرالى بۆ دياركرنا راستيان.
