په‌رله‌مان دێ دانوستاندنێ ل دۆر پرۆژێ داهاتێ نه‌فتێ كه‌ت
ئه‌ڤرۆ نيوز: ره‌وان نهێلى:
په‌رله‌مانێ كوردستانێ دێ دانوستاندنێ ل دۆر قانوونا سندوقا داهاتێ نه‌فت و گازێ ل هه‌رێما كوردستانێ كه‌ت و برياره رۆژا دوشه‌مبييا بهێت د روونشتنا ئاسايى يا په‌رله‌مانێ كوردستانێ دا دانوستاندن ل سه‌ر بهێته كرن و خواندنا ئێكێ بۆ چه‌ند پرۆژه قانوونان بهێته كرن.
تارق جه‌وهه‌ر راوێژكارێ راگه‌هاندنێ ل په‌رله‌مانێ كوردستانێ بۆ ئه‌ڤرۆ نيوز راگه‌هاند كو د وێ كومبوونێ دا دێ دانوستاندن ل دۆر سندوقا داهاتێ نه‌فت و گازێ ل هه‌رێما كوردستانێ هێته كرن كو د روونشتنێن بوورى دا خواندن بۆ هاتيه كرن و لژنێن تايبه‌ت ژى د وى بياڤى دا راپۆرتێن خوه به‌رهه‌ڤكرينه و گۆت: د ته‌وه‌ره‌كێ دى يێ روونشتنێ دا دێ خواندن بۆ 7 پرۆژه قانوونان هێته كرن ژ وان ژى پرۆژێ قانوونا داواكاريا گشتى، پرۆژه قانوونا په‌روه‌رده و فێركرن و قانوونا جوداكرنا كه‌رتێ تايبه‌ت و گشتى ژ سيسته‌مێ شاخله‌ميێ و پروژه قانوونا راستڤه‌كرنا مووچه‌ى.
