په‌يامه‌ك ژ نڤيسينگه‌ها سه‌رۆك بارزانى ل سه‌ر كوشتنا رۆژنامه‌ڤانێ دهۆكێ
ئه‌ڤرۆ نيوز:
نڤيسينگه‌ها راگه‌هاندنا سه‌رۆك بارزانى راگه‌هاند كو ئه‌وان په‌يوه‌ندى ب بابێ رۆژنامه‌ڤان ودات حسێن كريه و هه‌ڤخه‌ميا سه‌رۆك بارزانى گه‌هانديێ و پێ راگه‌هانديه كو بێ ده‌نگ نابن هه‌تا تاوانبار نه‌هێنه ئاشكه‌را كرن و نه‌گه‌هنه سزايێ خوه يێ قانوونى.
ده‌قێ راگه‌هاندنێ:
ده‌رباره‌ى كه‌يسێ كوشتنا رۆژنامه‌ڤان ودات حسێن نڤيسينگه‌ها مه‌سعود بارزانى سه‌رۆكێ هه‌رێما كوردستانێ په‌يوه‌ندى ب حسێن عه‌لى كوچه‌ر بابێ ودات حسێن كر و سه‌ره‌خۆشى و هه‌ڤخه‌ميا سه‌رۆك بارزانى گه‌هانده خێزانا وان و پشت راستكرن كو موكين نينه روودانه‌كا وه‌سان به‌رزه ببيت و بێ ماف ب دووماهى بهێت و دڤێت ب زووترين ده‌م تاوانباران بهێنه ديتن و بگه‌هنه سزايێ خوه يێ قانوونى.
د پێناڤى ڤه‌ديتنا بكوژ و تاوانباران سه‌رۆك بارزانى دامه‌زراوێن په‌يوه‌نديدار يێن راسپاردين كو ب له‌ز ڤه‌كولينێن هوور د وێ كه‌يسێ دا بكه‌ن و تاوانباران ده‌سته‌سه‌ر بكه‌ن و بگه‌هنه سزايێن خوه يێن قانوونى.
د. ئومێد سه‌باح
ئاخفتنكه‌رێ سه‌رۆكاتيا هه‌رێما كوردستانێ
15ـی 8ـی 2016
