پولیسێن دھوکێ گرتنا دوو تاوانباران راگەھاند
ئەڤرو نیوز:
پشتی کو د چەند رۆژێن بوری دا شوفێرەکێ تەکسیێ ژلایێ چەند کەسەکێن نەناسیارڤە ھاتیە کوشتن ، پشتی ٤٨ دەمژمێران پولیسێن دھوکێ شیان دوو کەسان بگرن و بریارا گرتنا کەسێ سێیێ ژی دەرچوویە.
لیوا تارق ئەحمەد رێڤەبەرێ گشتیێ پولیسێن دھوکێ د پرێسکونفرانسەکێ دا دیارکر کو ئەوان دوو کەس سەرا کوشتنا شوفێرێ تەکسیێ گرتینە و گۆت: (پشتی کو ل چەند رۆژێن بوری پولیسێن زاخۆ سەرا گیان ژ دەستدانا کەسەکێ ل گوندێ ئوزمانا یا سەر ب ناحیا مانگێشکێ ئاگەھدارکری و تەرمێ ئەوی کەسی بو نوژداریا داد ل دھوکێ ھاتیە رەوانەکرن و ڤەکولین لسەر ھاتینە کرن دیاربوو کو ئەو کەس ب ئەگەرا ترومبێلێکێ گیانی َخوە ژدەست نەدایە بەلکو ب دوو گولەیێن دەبانجێ ھاتیە کوشتن ، ژ بەرڤێ پولیسێن دھوکێ ھەر زوو دەست ب ڤەکولینێ کر و ب ریێێن خوەیێن تایبەت شیان کەسەکێ ب تومەتا کوشتنا شوفێرێ تەکسیێ ئاشکرا بکەن ، پشتی گرتنا وی ، ئەوی تاوانباری ناڤی َکەسەکێ دن ژی ئاشکراکر و دیسان ئەو کەس ژی ژلایێ پولیسان ھاتە گرتن و ھەردوان دانپێدان ب وێ یەکێ کر کو بەرامبەر کوژمەکێ پارەی ئەوان شوفێرێ تەکسیێ کوشتیە)
زێدەتر گۆت: (ئەوان ھەردوو تاوانباران کەسەکێ دن ژی ئاشکراکر کو ئەوی کەسی ئەو ھەردوو راسپاردبوون بو کوشتنا شوفێرێ تەکسیێ و نھا بریارا گرتنا وی دەرچوویە و ب ئانەھیا خودێ دەمەک نێزیک ئەو ژی دێ ھێتە گرتن “
