پڕۆژێ ئاڤا ئاكرێ دێ هێته ته‌مامكرن
هه‌ولێر، قائید میرۆ:
پشتی كاركرن ل سه‌ر ته‌مامكرنا پڕۆژێ ئاڤا ئاكرێ هاتیه راگرتن، رێڤه‌به‌رێ گشتیێ ئاڤێ ل هه‌رێما كوردستانێ ئاشكرا كر، ده‌ست ب ته‌مامكرنا پڕۆژه‌ی هاتیه كرن و دبێژیت: هه‌موو پڕۆژێن به‌ری نوكه بنیڤه‌ڕو ماین دێ هێنه ته‌مامكرن.
ئه‌ندازیار ئاری ئه‌حمه‌د، رێڤه‌به‌رێ گشتیێ ئاڤێ بۆ رۆژناما ئه‌ڤرۆ دیار كر، هه‌ژماره‌كا پڕۆژێن ستراتیژی یێن ئاڤێ ل هه‌رێما كوردستانێ دێ هێنه بجهئینان، ئێك ژ وان پڕۆژه‌یان پڕۆژێ ئاڤا ئاكرێیه، كو ل سه‌ر ئاڤا قه‌ندیل ئاڤ بۆ سه‌نته‌رێ ده‌ڤه‌رداریا ئاكرێ و ده‌وروبه‌ران دێ هێته راكێشان و گۆت: “به‌ری نوكه 67%ێ پڕۆژێ ئاڤا ئاكرێ هاتیه بجهئینان، حوكمه‌تا هه‌رێما كوردستانێ 18 ملیار دینار بۆ ته‌مامكرنا وی پرۆژه‌ی مه‌زاختن و نوكه ده‌ست ب كاری هاتیه كرن و پڕۆژێ ئاڤا ئاكرێ دێ هێته ته‌مامكرن، هنده‌ك ئاسته‌نگێن ته‌كنیكی هه‌نه، ئه‌و ژی دێ هێنه چاره‌سه‌ركرن”.
ئه‌ندازیار ئاری ئه‌حمه‌د گۆتژی: “هه‌ژماره‌كا پڕۆژه‌یێن دی هه‌نه، ئه‌و ژی دێ هێنه ته‌مامكرن، ئه‌نجامدانا پڕۆژێن نوو ژی د پلانا حوكمه‌تا هه‌رێما كوردستانێ دا هه‌نه، هه‌ر ده‌مێ بودجا پێدڤی ل به‌ر ده‌ست هه‌بیت ئه‌و ژی دێ هێنه بجهئینان، چونكو پلان یا هه‌ی ئاریشا ئاڤێ ل هه‌رێمێ بهێته چاره‌سه‌ركرن و ل هه‌موو ده‌ڤه‌ران ئاڤا ڤه‌خوارنێ بۆ وه‌لاتیان بهێته دابینكرن”.
