پۆستێ سەرۆككۆماری بەهرا كوردانە و پێدڤی ب لهەڤهاتنێ یە
ئەندامەكێ مەكتەبا سیاسی یا پارتی دیموكراتی كوردستان دیاركر، ئێكلاكرنا پۆستێ سەرۆككۆماری پێدڤی ب لهەڤهاتنەكا ناڤخوەییا كوردی هەیە وەك مافەكێ دەستووری كو چەوا ب گۆرەی عورفێ سیاسی پۆستێ سەرۆكێ جڤاتا نوونەران بۆ سوننەیان و سەرۆك وەزیران بۆ شیعە ئێكلابووینە، پێدڤییە كورد ژی ل سەر بەربژارێ خوە ڕێكبكەڤن و ل دەڤ مە كێشە نینە سەرۆككۆمار ژ پارتی بیت، یان ژ ئێكەتیێ، یان ژی كەسایەتییەكێ بێلایەن بیت، بەلكو یا گرنگ ئەوە ب میكانیزمەكا كوردستانی بهێتە دیاركرن، نەك ئالییەكێ سیاسی ب تنێ بڕیارێ ل سەر بدەت.
عەلی حسێن، ئەندامێ مەكتەبا سیاسی یا پارتی دیموكراتی كوردستان سەبارەت ب ڕەوشا سیاسی یێ ئیراقێ، دیاركر ئەو پشتەڤانیێ ل بڕیارا مالا شیعی دكەن كو نوكە (نووری مالكی) بۆ پۆستێ سەرۆك وەزیران بەربژار كریە، و هەر كەسەكێ دی ژی بەربژار بكەن، ئەو ب هەماهەنگی ل گەل ئالیێن كوردی و سوننی دێ بنە هاریكار و دەربارەی پرۆسەیا پێكئینانا حوكمەتا نوو یا هەرێما كوردستانێ، ئاشكرا كر كو دانوستاندنێن وان دگەل ئێكەتیێ گەهشتینە قووناغێن دوماهیێ و ل سەر شێوازێ كاركرنێ و بەلاڤكرنا پترییا پۆستان گەهشتینە ڕێككەفتنێ و ئەگەرێ گیرۆبوونا ڕاگەهاندنا كابینەیێ بۆ ڕەوشا ئاڵۆز یا ئیراقێ و ململانێیێن دەڤەرێ، ب تایبەت یێن د ناڤبەرا ئەمریكا و ئیرانێدا دزڤڕیت.
عەلی حسێن هیڤی خواست كو ب پێكئینانا حوكمەتا ئیراقێ و كێمبوونا ئالۆزیێن د ناڤبەرا واشنتۆن و تەهرانێدا، چارەسەركرنا گرفتێن هەرێمێ ژی ب ساناهیتر لێ بهێت و داخواز كر هەموو ئالیێن كوردستانی د حكومەتا داهاتییا هەرێما كوردستانێدا پشكدار بن.
