پۆلیسێن دھۆکێ چەندین جھێن قۆمارێ دائێخستن
ئەڤرۆ نیوز، حەمۆ محەمەد:
بەرپرسێ پشکا پەیوەندی و راگەھاندنێ ل رێڤەبەریا پۆلیسێن پارێزگەھا دھۆکێ بۆ ئەڤرۆ نیوز دیار کر، وان چەند رۆژەکە ھەوەکا دائێخستنا جھێن قۆمارێ ل پارێزگەھا دھۆکێ دستپێکریە و دبێژیت: ھەتا نوکە مە ھژمارەکا زۆرا وان جھێن قۆمار لێ دھێتە کرن دائێخستینە و ل گۆر قانوونێ دێ سەرەدەری ل گەل خودانێن وان ھێتە کرن.
موقەدمێ مافپەروەر ھێمن سلێمان، بەرپرسێ پشکا پەیوەندی و راگەھاندنێ ل رێڤەبەریا پۆلیسێن پارێزگەھا دھۆکێ خویا کر، ھەر جھەکێ ئنترنێت لێ ھاتبیتە ڤەکرن یان وەکو کافێ یا و ئنترنێت لێ ھاتبیتە ڤەکرن و قۆمار لێ بھێتە کرن، ژ لایێ پۆلیسانڤە دێ ھێتە گرتن و گۆت: “بۆ دەمێ چەند رۆژایە مە ھەوەک دەستپێکریە و ھژمارەکا زۆر ڤان جھێن ئنترنێتێ کو قۆمار لێ دھاتە کرت؛ ھاتینە گرتن”.
موقەدمێ مافپەروەر ئاشکرا ژی کر، ئەڤ ھەوا وان دەستپێکری بۆ دائێخستنا جھێن قۆمارێ ل پارێزگەھا دھۆکێ دێ یا بەردەوام بیت و گۆت: “ھندی جھەکێ قۆماری ھەبیت ژ لایێ پۆلیسان ڤە دێ ھێتە گرتن”.
موقەدمێ مافپەروەر ھێمن سلێمان دیار ژی کر کو ئەو جھێن دھێنە گرتن ژی رێ ناھێتە دان دوبارە بھێنە ڤەکرن و گۆت: “قۆمار د قانوونێ دا تاوانە، لەو ھەر جھەکێ قۆمار لێ دھێتە کرن؛ دێ ھێتە گرتن، دیسا ئەو کەسێن پێ رادبن ژی ل دووڤ قانوونا سزایێن عیراقی، ماددێ ٣٨٩ دێ ھێنە سزادان”.
ناڤھاتی ئاماژە ب وێ چەندێ ژی کر کو بەری دو سالان ھژمارەکا زۆرا ئامیرێن کو قۆمار پێ دھاتە کرن، ل سەنتەرێ دھۆکێ و دەوروبەران و د ناڤ چەند مەزرەعان دا کو ھاتبوونە دانان، ژ لایێ پۆلیسێن دھۆکێ ڤە دەست ب سەردا ھاتبوو گرتن و ل گۆرەپانا رێڤەبەریا پۆلیسێن دھۆکێ ھاتبوونە ژ ناڤبرن.