“پیلانک بۆ ھەلوەشاندنا ئەنجامینَ ھەلبژارتنێن عیراقێ ھەیە”
ئه‌ڤرۆ نيوز:
ددەمێ نوکەدا تەمەنێ پەرلەمانێ عێراقێ دوماھی ھاتیە و ھێشتا چو بڕیار نینن بۆ دەستبکاربوونا خۆلا نوویا پەرلەمانی ئەندامەکێ بەرێ یێ پەرلەمانێ عێراقێ ژی ئەشکرەکر، پیلانەک ھەیە ئەنجامێن ھەلبژارتان ب ئێکجاری بھێنە ھەلوەشاندن و دیارکر، پێشبینی دھێتەکرن پێکئینانا حوکمەتا نوو سالەکێ ڤەکێشیت.
سیروان سیرینی، ئەندامێ بەرێ یێ پەرلەمانێ عێراقێ بۆ رۆژناما ئەڤرۆ گۆت” رۆژا 30ی ھەیڤا بۆری تەمەنێ پەرلەمانێ عێراقێ دوماھی ھات ھەتا وی دەمێ خۆلا نوویا پەرلەمانی دەستبکارێ خوە دکەت، ددەمێ نوکە چو پەرلەما ل عێراقی َنینە و نەشێت چو بڕیار و بزاڤان بکەت و ھەموو کارێن خۆلا بەرێ یا پەرلەمانێ عێراقێ دووماھی ھاتن و پیلانا درێژکرنا تەمەنێ پەرلەمانی ژی شکەستن ئینا و سەرنەگرت، بەلێ دێ حوکمەتا نوکەیا عێراقێ بسەرۆکایەتیا حەیدەر عەبادی لسەر کار بەردەوامبیت ھەتا پێکئینانا حوکمەتەکا نوو ل عێراقێ، بەلێ حوکمەتژی دێ حوکمەتا کار فڕێکەربیت ھەتا پەرلەمانێ نوو سویندا قانوونی دخوت و کابینا نوو تێتە پێکئینان، بێگومان پەرلەمانێ عێراقێ لسالێن بۆری یێ کارا و بھێز نەبویە بۆ دیتنا رۆلێ چاڤدێریێ، بەلێ بھەر شێوەیەکی بیت نابیت چو چاڤدێری لسەر حوکمەتێ نەمینن و چێبوونا دەلیڤا قانوونی دێ کاریگەریێن خوە لسەر رەوشا عێراقێ.
ئەڤی پەرلەمانتارێ خۆلا بۆری یا پەرلەمانێ عێراقێ گۆتژی” بدیتنامن پیلانەک یا ھەی ئەنجامێن ھەلبژارتنێن پەرلەمانێ عێراقێ ب ئێکجاری بھێنە ھەلوەشاندن، بەلێ ئەڤە ب پیلان یا تێتە بجە ئینان نەک راستەوخۆ بڕیارا ڤاڤارتنا دەنگان بدەستی پێنگاڤا ئێکێ یە بۆ ھەلوەشاندنا ئەنجامێن ھەلبژارتنان.
لدۆر پێک ئینانا حوکمەەتا نوویا عێراقێ سیروان سیرینی دیارکر” ئەز بخوە پێشبینی دکەم شەش ھەیڤا ھەتا سالەکێ پێکئینانا کابینا نوویا حوکمەتا عێراقێ ڤەکێشیت، ھەرچەندە پێشبینی تێنەکرن زێدەترژی ڤەکێشیت و ئاستەنگێن زۆر لھەمبەر پێکئینانا حوکمەتا نوویا عێراقێ ھەنە، بەلێ ھەگەر ئەف پێشبینیا ھەی بۆ ھەلوەشاندنا ئەنجامێن ھەلبژاردتنان سەربگریت ئەڤە دێ رەوشا عێراقێ زۆر بەرەف ئالۆزیێ چیت، چونکە وی دەمی دڤێت ھەلبژارتنەکادی بۆ پەرلەمانێ عێراقێ بھێتەکرن و دێ عێراق کەڤیتە قۆناغەکادیا سیاسی دا، کو ھەر تشت چێببیت ئاسایە.