پێداچوون دێ د مووچێ مامۆستایان دا ھێتەکرن
ئەڤرۆ نیوز:
سەرۆکێ ئێکەتیا مامۆستایێن کوردستانێ ئاشکرا کر، سەرۆکایەتیا جڤاتا وەزیران سۆزدایە وان کو پێداچوونێ د مووچێ مامۆستایان دا دێ ھێتەکرن و بۆ سالا نوو یا خواندنێ، مووچەکێ پتر ژ یێ نوکە بۆ مامۆستایان دێ ھێتە مەزاختن و دبێژیت: ئەگەر پارە بۆ وەزارەتا پەروەردێ نەھێتە مەزاختن نەشێت ئەزموونان ب رێڤەببەت.
ئەحمەد گەرمیانی، سەرۆکێ ئێکەتیا مامۆستایێن کوردستانێ بۆ رۆژناما ئەڤرۆ دیار کر کو بەری نوکە ئەو وەکو سکرتاریەتا ئێکەتیا مامۆستایان ل گەل ستافێ سەرۆکایەتیا جڤاتا وەزیران کۆمبووینە و گۆت: “مە د وان کۆمبوونا دا کۆمەکا داخوازیان ل دۆر رەوشا مامۆستایان، مینا پێداچوون د مووچێ مامۆستایان دا بھێتەکرن، دانا پارچێن ئەردی و ناڤ و نیشانێن زانستی بۆ مامۆستایێن ھەلگرێن باوەرنامێن ماستەر و دکتۆرا کریە، د کۆمبوونێ دا حوکمەتێ سۆزدایە ھەتا دەستپێکرنا سالا نوویا خواندنێ 2016 – 2017 پێداچوون د مووچێ مامۆستایان دا دێ ھێتەکرن”.
گۆتژی: “رێژەکا کێمتر ژ یا نوکە دێ ژ مووچێ مامۆستایان ھێتە بڕین و مووچەکێ پتر دێ بۆ وان ھێتە مەزاختن”.
ئەحمەد گەرمیانی ئاماژە ب وێ چەندێ ژی کر، وەزیرا باژێڕڤانی و گەشت و گۆزارێ یا حوکمەتا ھەرێما کوردستانێ سۆزدایە وان، ھەردەمێ سەرۆکایەتیا جڤاتا وەزیران فەرمان بۆ بەلاڤکرنا پارچێن ئەردی دەکر و گۆت: “وەزیرا باژێرڤانیان گۆتیە مە کو ئەو دێ ھاریکار بن ژ بۆ ھندێ بەری تەخ و چینێن دی یێن جڤاکی پارچێن ئەردی ل سەر مامۆستایان بھێنە بەلاڤکرن”.
گەرمیانی خویا ژی کر، ئەگەر بۆ سالا نوو یا خواندنێ ھاریکاریا مامۆستایان نەھێتەکرن دەوام گەلەک ب سستی و لاوازی دێ ب رێڤەچیت، ژ بەرکو مامۆستا نەشێن ب ڤی مووچێ نوکە بۆ دھێتە دان ل سەر پرۆسا خواندنێ بەردەوامن، دڤێت پارە بۆ وەزارەتا پەروەردێ ژی بھێتە مەزاختن، چونکو ئەزموون و کەرتێ پەروەردێ پێدڤی ب بودجەکا زۆر یا ھەی، بێ پارە کەرتێ پەروەردێ ب ڕێڤە ناچیت.