پێداچوون د بهایێ گازا به‌غدا دا دێ هێته كرن
هه‌ولێر، قائید میرۆ:
جێگرێ سه‌رۆكێ لژنا نه‌فت و غازێ ل په‌رله‌مانێ ئیراقێ ئاشكرا كر، بڕیارا هنارتنا گازا سپی ب بهایه‌كێ زۆر هاتیه راگرتن و بڕیاره پێداچوون د بهایێ وێ گازێ دا بهێته كرن، ئه‌وا بڕیاره حوكمه‌تا ئیراقێ بده‌ته وه‌لاتیێن هه‌رێما كوردستانێ.
دكتۆر سه‌باح سوبحی، جێگرێ سه‌رۆكێ لژنا نه‌فت و غازێ بۆ رۆژناما ئه‌ڤرۆ گۆت: “مه دووڤچوون بۆ هنارتنا گازا سپی ژ لایێ به‌غداڤه كریه و حوكمه‌تا ئیراقێ بهایێ ئێك لیترا گازا سپی بۆ پارێزگه‌هێن هه‌رێما كوردستانێ ب 750 دینارن دیاركریه، به‌لێ ئه‌ڤه بهایه‌كێ ئێكجار زۆره، ژ به‌ركو نوكه حوكمه‌ت گازا سپی لیترێ ب بهایێ 150 دیناران ل سه‌ر پارێزگه‌هێن ناڤه‌ڕاست و باشوورێ ئیراقێ به‌لاڤ دكه‌ت، له‌وڕا ئه‌م شیاینه ئه‌ڤێ بڕیارێ رابگرین و رێكێ ناده‌ین ب بهایه‌كێ زێده‌تر گاز بۆ هه‌رێما كوردستانێ بهێته هنارتن”.
دكتۆر سه‌باح سوبحی گۆتژی: “مه یاداشته‌ك ب ئیمزایا 65 په‌رله‌مانتاران پێشكێشی سه‌رۆكوه‌زیرێن ئیراقێ كریه، هه‌تا بڕیاره‌كا نوو ل دۆر بهایێ ئه‌ڤێ گازا بڕیاره بۆ هه‌رێما كوردستانێ بهێته هنارتن بده‌ت، چونكی پارێزگه‌هێن هه‌رێمێ ژ لایێ سه‌قایڤه گه‌له‌ك ژ پارێزگه‌هێن دی یێن ئیراقێ سارترن و نابیت ئه‌و جوداهیه هه‌بیت”.
