پێدڤیا ب لەز بۆ پێكئینانا حوكمەتا هەرێما كوردستانێ
سەردار مەجید
د ڤی دەمێ هەستیار و ئالۆز دا، ئەوا هەرێما كوردستانێ پێ دەرباز دبیت هەمی ئاماژە و پێشڤەچوونێن دەوروبەر ل سەر مە د سەپینن كو پتر ژ هەر دەمەكێ دی، پێدڤیا مە ب ئێكڕێزی و یەكگرتنێ هەیە. ڕەوشا نوكە یا سیاسی و ئابووری، چاڤەرێ نابیت و نابیت ئەم دەمێ خۆ ب دەست ڤە بدەین، ژ بەر كو هەر رۆژەكا دچیت و كابینا نوی یا حوكمەتا هەرێمێ نەهێتە پێكئینان، دێ بیتە ئەگەرێ زێدەتر لێكرنا بارێ گران یێ سەر ملێن خەلكێ كوردستانێ و پتر لاوازكرنا دەستهەلاتا مە ل هەنبەر ئاستەنگێن دەرەكی.
بانگەوازا سەرۆك بارزانی، بانگەوازەكا ژ دل و هەستكرن ب بەرپرسیارەتیا مێژوویی بوو، كو تێدا جەخت ل سەر وێ چەندێ كر كو پاراستنا ئەزموونا هەرێمێ د ناڤبەرا دەستێن مە هەمیان دایە. لەورا، ل سەر هەمی لایەنێن سیاسی، ب تایبەت پارتی دیموكراتی كوردستان و ئێكەتی نیشتمانی كوردستان پێدڤیە ب زویترین دەم و ب گیانەكێ بەرپرسیارانە دانیشن و دانوستاندنێن جدی دگەل ئێك بكەن. پێكئینانا كابینەكا نوی، نە بتنێ ئەركەكێ دەستووری یە، بەلكی ئەركەكێ نیشتمانی و ئەخلاقی یە بۆ ڤەگەراندنا باوەریێ بۆ ناڤا جڤاكێ.
ئەم پێدڤی ب حوكمەتەكا ب هێز و فرەلایەنینە، حوكمەتەك كو دەربڕینێ ژ ئیرادەیا هەمی خەلكێ كوردستانێ بكەت، بێ جوداهی. یا گرنگ ئەوە كو كابینا نوی ب ئێك دەست و ب بەرنامەكێ رۆهن، كار بۆ باشتركرنا رەوشا ژین و ژیارا خەلكی بكەت. لادانا ئاستەنگێن بەردەم مووچەی و چارەسەركرنا كێشەیێن دارایی، دڤێت بنەمایێ سەرەكیێ كاری بیت. خەلكێ مە یێ وەستیای، چاڤەرێی دیتنا ئێكڕێزیێ یە، نە ئێكڕێزییا ل سەر كاغەزێ، بەلكی ئێكڕێزییا د ناڤا كار و كریاران دا، داكو بشێین ب هەڤرا رووبەڕووی هەر ئەگەرەكێ نەخوازكری ببین.
پێدڤیە ئەم ل بیر نەكەین كو پاراستنا قەوارێ هەرێمێ، ب تەنێ ب ئێكگرتنا هەلوەستێن مە دبیت. دەمێ تو د ئێكەتی و پارتی دا دبینیی كو مەترسی ل سەر دەستكەفتێن گەلێ كوردستانێ هەنە، دڤێت بەرژەوەندیێن تەنگێن حزبی ل پاش بێخن و بەرژەوەندیا باڵا یا نیشتمانی بكەنە ئەولەویەت. بێگومان، هەر پاشكەفتنەك د ڤی پرۆسەی دا، دێ زیانێ گەهینیتە هەمی لایەنان.
لەورا، دڤێت ئەم ب گەرمی پێشوازیێ ل هەر هەولەكێ بكەین كو بەرەف پێكئینانا حكومەتێ ڤە دچیت. باوەرییا مە یا مەزن هەیە كو سەركردایەتیا كوردستانی دێ شێت د ڤێ قووناغا هەستیار دا ب سەركەفتیانە دەرباز ببیت و حكومەتەكا كارامە و خزمەتگوزار پێكبینیت، دا كو ژینگەهەكا ئارام و پڕ ژ گەشەبینێ بۆ نەوەیێن داهاتی دابین بكەین. چ نینە ژ ئێكڕێزیێ پیرۆزتر، چنكو ئێكڕێزی ئەوا هەرێما مە د پارێزیت و دێ مە بگەهینیتە ئارمانجێن مە یێن مەزن.