سه‌ردار مه‌جید

بۆ ده‌مێ چه‌ند سالان بوو كار ل سه‌ر وێ چه‌ندێ دهاته‌ كرن كو هه‌موو هێزێن پێشمه‌رگه‌ی ل بن ئێك خیڤه‌ت بهێنه‌ كۆمكرن و سه‌ر ب وه‌زاره‌تا پێشمه‌رگه‌ی ڤه‌ بن، ڕاسته‌ ل ده‌ستپێكێ هنده‌ك ئاسته‌نگ و ئاریشه‌ هه‌بوون و بوونه‌ ئه‌گه‌ر كو ئه‌ڤ ئێكگرتنه‌ گیرۆ ببیت، لێ ب خه‌مخۆریا هه‌موو لایه‌كی ب تایبه‌ت ژی بزاڤێن به‌رده‌وامێن به‌ڕێز (نێچیرڤان بارزانی) سه‌رۆكێ هه‌رێما كوردستانێ، هه‌روه‌سا (مه‌سرور بارزانی) سه‌رۆكێ حوكمه‌تا هه‌رێما كوردستانێ ل گه‌ل پارتی و ئێكه‌تی شیان ل سه‌ر وان هه‌موو ئاسته‌نگان زالببن و هه‌تا گه‌هشتیه‌ وی ڕاده‌ی كو (21) ڤێ هه‌یڤێ ئه‌و ئێكگرتن هاته‌ ڕاگه‌هاندن و هه‌رێما كوردستانێ چوو دقۆناغه‌كا نوودا و پتریا سه‌رۆك و سه‌ركرده‌یان ل نافخۆ و ده‌رڤه‌ پیرۆزباهی لڤێ ئێكگرتنێ كرن و هه‌موویان دلخۆشیا خۆ ب ڤێ چه‌ندێ ده‌ربڕین، چنكو هه‌موو خه‌لكێ كوردستانێ ب شێوه‌یه‌كێ گشتی چاڤه‌ڕێی ڤێ بڕیارێ بوون، له‌ورا ئێدێ ئه‌ڤ رۆَژه‌ ژی (21/9/2026) دێ وه‌كو رۆژه‌كا پرشه‌نگدار ل دیرۆكا گه‌لێ كورد هێته‌ نڤیسین، چنكو ڤێ ئێكگرتنێ دلێ هه‌موو كوردان خۆشكر، هه‌روه‌سا یێ دوژمن و نه‌حه‌زان نه‌خۆش و ڕه‌شكر، له‌ورا ئه‌ز ژ دل پیرۆزباهیێ ل هه‌موو پێشمه‌رگه‌ی، هه‌روه‌سا خه‌لكا هه‌رێما كوردستانێ بگشتی دكه‌م بۆ ڤێ ئێكگرتنێ یا كو چه‌ندین سال بوو ئه‌م هه‌موو دچاڤه‌ڕێ بووین، هه‌روه‌سا جاره‌كا دی ده‌ستخۆشێی ل وان به‌ڕێزان دكه‌م یێن كو بووینه‌ ڕێخۆشكه‌ر كو ئه‌ڤ بڕیاره‌ بهێته‌دان و ئه‌ز وه‌كو كه‌سه‌ك ژ ڤی وه‌لاتی گه‌له‌ك ب ڤێ بڕیارێ دلخۆش و شادبووم، هه‌روه‌سا وه‌كو گه‌نجه‌ك پتر باوه‌ری بۆ من چێبوو كو ئه‌ڤ وه‌لاته‌ یێ ب خۆدانه‌ و هندی مه‌ مرۆڤێن دلسۆز هه‌بن دێ هه‌ر یێ ب خۆدان بیت و ب دیتنا من ئه‌ڤ ئێكگرتنه‌ دێ بیته‌ ئه‌گه‌ر كو ڕاگه‌هاندنا ده‌وله‌تا كوردی گه‌له‌ك مسۆگه‌رتر و نێزیكتر لێ بهێت، چنكو ڤێ ئێكگرتنێ پتر ڕێ خۆشكر كو ئه‌م پێنگاڤان به‌ر ب پێشتر بهاڤێژین و هه‌بوونا هێزێن پێشمه‌رگه‌ی یێن ئێكگرتی ئانكو هه‌بوون و پێشخستنا قه‌واره‌یێ هه‌رێما كوردستانێ و ئه‌ز ب باوه‌رم پشتی ڤێ ئێكگرتنێ دێ پێنگاڤێن بله‌زتر و خۆرتر بۆ سه‌ربه‌خۆیا هه‌رێما كوردستانێ هێنه‌ هاڤێتن و ئه‌ڤ چه‌نده‌ مافه‌كێ ڕه‌وایه‌ مه‌ یه‌ وه‌كو كورد كو ب سه‌دان ساله‌ ئه‌م یێ قوربانیێ بۆ دده‌ین و مه‌ ب هزاره‌ها شه‌هید و بریندار بۆ ڤێ ڕێبازا پیرۆز داینه‌ و ئه‌و دارا به‌ری ب سه‌دان سالان مه‌ چاندی ئه‌ڤرۆ ده‌م هات كو ئه‌م ب به‌رهه‌مێ وی شاد ببین، ئه‌و ژی ڕاگه‌هاندنا ده‌وله‌تا كوردی یا سه‌ربه‌خۆیه‌ و هیڤیا من ئه‌وه‌ د سالا نوو دا (2027) پێنگاڤێن بله‌زتر و خۆرتر بۆ سه‌ربه‌خۆیا هه‌رێما كوردستانێ بهێنه‌ هاڤێتن و پێشمه‌رگه‌یێ كوردستانێ وه‌كو هێزه‌كا كارا و ئێكگرتی ل بن سیبه‌را ئالایێ كوردستانێ و وه‌زاره‌تا پێشمه‌رگه‌ی كاربكه‌ن و هه‌موو هیڤیێن مه‌ پێكڤه‌ ده‌وله‌ت بوون و سه‌ركه‌فتنێن ئێك ل دووڤ ئێكن و من باوه‌ریا هه‌ی ئه‌ڤ چه‌نده‌ هه‌موو دێ ل سه‌ر ده‌ستێ رێبه‌ر و لێڤه‌گه‌رێ كوردستان سه‌رۆك (مه‌سعود بارزانی) بجه هێن و ئه‌م كورد دێ هیڤیێن خۆ شاد بین و دوژمن و نه‌حه‌زژی دێ سه‌رێ خۆ ل به‌رێن ڕه‌ق ده‌ن.

سەردار مەجید

د جیهانا ئەڤرۆ دا، گەلەك جاران ئەم د بێژن كو تەكنۆلۆژیا و تۆڕێن جڤاكی جیهان كریە وەكی گوندەكی بچووك و مەترسیا دووركەفتنێ كێم كریە، لێ د ڕاستی دا دگەل هەموو ڤان ئاسانكاریێن پەیوەندیێ، مرۆڤ ئەڤرۆ پتر ژ هەموو دەمان هەستی ب تنێ بوون، بێ سەروبەری و دووركەفتنا رۆحی دكەت.
پەیوەندیێن مرۆڤی یێن كو ژ زوو ڤە ب حەزژێكرنەكا قوول، ڕێزگرتن و ئاخفتنێن دلسۆز هاتبوونە ب ناڤكرن، ئەڤرۆ بووینە پەیامێن كورت، ئایكۆنێن بێ هەست و وێنەیێن دیجیتال و ئەڤ گوهۆڕینە مەزنە دبیتە سەدەمێ هندێ كو تاخ و رەوشا دەروونی یا تاكان ب سەختی بكەڤە بن كاریگەری و فشارێن نەخۆش.
ئاریشەیا مەزن و جیهانا ئەڤرۆ ئەوە كو هژمارا هەڤالێن مە ل سەر تۆڕێن جڤاكی و پلاتفۆرمێن دیجیتال گەلەك زێدە بووینە، لێ د هەمان دەم دا، پەیوەندیێن مە یێن ڕاستەقینە، كویر و ئارام زۆر ل پێشیا خۆ كێم بووینە و ب تەسكی تێكن. دەمێ‌ مرۆڤ دەمەكێ درێژ ل پێش شاشەیێن مۆبایل و كۆمپیۆتەران دەرباز دكەت، ئەو دەمێ‌ خۆ یا گران بەها ژ دەست ددەت یا كو دڤیا بۆ خێزان، زارۆك، هەڤالێن ڕاستەقینە و گەشەپێدانا كەسایەتی خەرج بكربا نەبوونا ڤاڤارتنەكا درۆست د ناڤبەرا جیهانا دیجیتال و جیهانا ڕاستەقینە یا ڕۆژانە دا، دبیتە ئەگەرێ هندێ كو مرۆڤ تووشی بێخەوی، فشارێن دەروونی، قەلەقی و زێدەبوونا سترێسا ڕۆژانە ببیت، ژ بەر ڤێ چەندێ، گەلەك گرنگە كو مرۆڤ هوسا بژیت كا چەوا د زڤڕیتە ڤە بۆ بنەمایێن جڤاكی یێن ڕەسەن و كەڤنار واتە ڤەگەڕەك بۆ پەیوەندیێن ڕوو-ب-ڕوو، گۆهداریكرنا ئارام بۆ ئێك و دو و پاراستنا سنوورەكێ ساخلەم د ناڤبەرا ژیانا تایبەت و جیهانا تەكنۆلۆژی دا.
چونكو پاراستنا كەسایەتیەكا ساخلەم، هشیار و خوەڕاگر، ژ ڤەبژارك و ژیانا ناڤ جڤاكەكێ زیندی و ڕاستەقینە دەست پێ دكەت، نە كو ژ پەیامێن سار و بێ هەست یێن د ناڤ شاشەیان دا، و مرۆڤ پێدڤیە هەردەم هشیار بیت دا كو ژیانا وی یا خۆماڵی و ناڤمالی نە ڤەكەڤنە بن كاریگەریێن نە پاقژ و خراب یێن جیهانا دەرڤە.

سەردار مەجید

حەزژێكرنا وەلاتی بتنێ هەستەك نینە، بەلكو باوەری و فیداكارییە بۆ ڤێ ئاخا پاقژ، هەر وەكو چەوا مرۆڤ دگەل دایك و بابێن خۆ هشیار دبیت و دلێ وی بۆ وان لێدەت هوسا ژی ڤیانا ولاتی د ناڤ خوین و دلێ‌ مە دچیت و مە نەچار دكەت كو هەموو دەمان د ئامادەبین بۆ پاراستنا ڤێ‌ ئاخێ‌، چنكو ئەڤ ڤیانە یا كو د ناڤ دلێ هەر تاكەكێ ڤی وەلاتی دا هەی، هێزەكا مەزن د دەتە مە دا كو ل بەرامبەر هەموو گرفت و تەنگاڤیان ب ڕاوەستین و سەرێ خۆ بلند بكەین.
بەحسكرنا ڤی وەلاتی، بەحسكرنا مێژوویەكا پڕ ژ سەروەری و قوربانیدان و كارێن مەزنە یێن كو بابو باپیرێن مە بۆ مە هێلاین، چیایێن مە، دەشت و زۆزانێن مە، ئاخا مە یا تەڕ، ئەڤ هەموو جهێن پیرۆز نە یێن كو بێهنێن خۆش ژێ دبن و مرۆڤی دگەهیننە ژیانەكا پڕ ژ شانازی و چەند مرۆڤ ل جیهانێ بگەڕیێت و مەزنترین باژێر ببینیت، دیسان ژی چ جهـ و وار نینن كو بشێن جهێ دلۆڤانی و ئارامیا وەلاتێ‌ مە بگرن. وەلات وەك وێ مالا مەزنە یا كو هەموو تێدا وەك برایێن ئێك و دو دژین، بێی كو جوداهی د ناڤبەرا ئێك و دو دا هەبیت، ئەڤ حەزژێكرنە مە نەچار دكەت كو ب كار و خزمەتێن خۆ، ڤی جهی پتر ئاڤا بكەین و نەهێلین چ كەس دەستدرێژیێ بكەنە سەر ئارامیا وێ و دەمێ مرۆڤ ل وێنە و سیمایێن ڤێ خاكێ دنێڕێت، گەلەك هزار گۆتن د دلێ وی دا دروست دبن و دخواست هەموو ژیانا خۆبكەتە قوربانی بۆ سەركەفتن و بلندبوونا وێ ئەم هەموو پشكەكین ژ ڤێ ئاخێ و هەر تشتەكێ مە هەی ژ ڤێ نیشتمانێ یە، ژبەر ڤێ چەندێ ئەركێ سەرملێن مە یە كو هەموو دەمان دەستێ هەڤدۆ بگرین و د خزمەتا ڤی وەلاتی دا بەردەوام بین و بلا ئالایێ‌ مە هەموو دەمان ل بلنداهیان شانازییێ بكەت و پاشەڕۆژا وی ڕۆن و سەركەفتن بیت، چونكو بێی ڤی وەلاتی، ژیان بێ ڕامان و بێ بنەمایەك ژ مانا خۆ دبیت و مان و نەمانا مە بڤێ ئاخێ‌ ڤە گرێدایە هەتا كو دووماهی هەناسە مە مابیت.

سەردار مەجید

د ڤی سەردەمی دا كو جیهان بەر ب پێشكەفتنەكا بلەز و  تەكنولۆژیایێ‌ ڤە دچیت، ئەركێ مە یێ سەرەكی یە ئەم ببیینە پارێزەرێن ژینگەها خوە، دهۆك، ب سروشتێ خوە یێ بەرین و چیایێن خوە یێن بلند، دكەڤیتە د ناڤ گەلەك دەلیڤان دا بۆ هندێ كو ببیت نموونەیەكا پێشكەفتی یا باژێڕێن كەسك هەر وەك چەوا هونەرمەند ب ڕێیا كەڤالان پەیامێن خوە یێن ژینگەهی دگەهینن، ئەم هەموو ژی د ئەركێ خوە دا پشكدارین، چونكی ئەڤ سروشتە یێ‌ دایە مە و پاراستنا وی دڤێت یا بەردەوام بیت و ئاریشەیا پیسبوونا ژینگەهێ، ب بتنێ ئاریشەیەكا دەڤەری نینە، بەلكو ئاریشەیەكا جیهانی یە، لێ یا گرنگ ئەوە ئەم ژ مالێن خوە دەست پێ بكەین و گەلەك جاران ئەم دبینین هندەك جهێن گەشتیاری، پاشی خەلكێ مە ب هەڕچەوا بیت بەرزە دكەن، كو ئەڤە ژی دژی سروشتێ مە یێ پاقژە و دڤێت ئەم هەموو بزانین كو پاقژی بتنێ یا سندوقا وێ ناڤێ نینە، بەلكو بكارئینانا كەرەستەیانە كو زیانێ ب ژینگەهێ نەگەهینن. یا ژ هەموویێ گرنگتر ئەوە ئەم ڤێ هزرێ ل نك زارۆیێن خوە ژی پەروەردە بكەین، چونكی هەكە ئەم نوكە نە پارێزین دێ د پاشەڕۆژێ دا تووشی كێشەیێن گەلەك مەزنتر بین و هەردەم بێژە خو: ئەڤە دەڤەرا منە، ئەڤە مالا منە، ئەڤە ئاخا منە، چەوا دێ ڕێ بێ ئەڤێ پیسبیت، تەكنولۆژیا یا بوویە ڕێیەك بۆ هندێ كو ئەم پتر ل سەر ژینگەهێ بزانین، دێ هاریكار بن كو مرۆڤ پتر ئاگەهدارێ ساخلەمیا خوە و ساخلەمیا ژینگەهێ بیت و ب ڕێیا ڤان ئامیران، ئەم دشێین بزانین كا چەوا ژینگەهەكا ساخلەم دێ كارتێكرنا ڕاستەوخۆ ل سەر ساخلەمیا مە هەموویان كەت و ل دوماهیێ دێ‌ بێژین دهۆك باژێڕێ مە یێ خۆشتڤی یە  و پاراستنا وێ نە بتنێ ئەركێ حكومەتێ‌ یە، بەلكو ئەركێ هەموو تاكێن ڤی باژێڕی یە.

سەردار مەجید

ل گەل نێزیكبوونا دەستپێكرنا سالا نوو یا خواندنێ، هەمی چاڤ ل سەر وەزارەتا پەروەردێ نە بۆ هندێ كو ئامادەكاریێن پێدڤی بۆ پرۆسا خواندنێ بهێنەكرن. ئێك ژ گرنگترین وان ئامادەكاریان یا كو پێدڤیە ب رژدی ل سەر بهێتە كاركرن، دابینكرنا پەرتووكێن خواندنێ یە بۆ هەمی قوتابیان. ئەڤ پرسە نە یا سڤكە و كارتێكرنەكا مەزن ل سەر ئاستێ زانستی یێ قوتابیان و رێڤەچوونا پرۆسا پەروەردێ هەیە.
ل سالا بۆری، مە دیت كو چاوا نەبوونا پەرتووكان ل دەمێ دروست، بوو ئەگەرێ ئاستەنگێن مەزن. ل هندەك قوتابخانەیان، پرۆسا خواندنێ دەستپێكر و قوتابی چوونە سەر رەحلێن خوە، لێ پەرتووكێن وان نەگەهشتنێ. ئەڤ چەندە ب شێوەیەكێ نەراستەوخوە بوو ئەگەرێ كو كێمتر گرنگی ب وان بابەتان بهێتە دان یێن كو پەرتۆكێن وان نەبووین، و هەروەسا هەستەكێ بێهیڤیێ د ناڤبەرا قوتابیان و مامۆستایان دا پەیدا كر. دەمێ قوتابی نەشێت پەرتووكێ د دەستێ خوە دا ببینیت، ئاستێ متمانەیا وی ب سیستەمێ پەروەردێ كێم دبیت، و مامۆستایەك ژی دێ چاوا بشێت بابەتەكێ ئالۆز بێی ڤەگەریان بۆ پەرتۆكێ بۆ قوتابیێ خوە شیڤەكەت؟.
پێدڤیە وەزارەتا پەروەردێ ڤێ جارێ دەرەسینەكێ ژ كەیسێن سالا بۆری وەرگریت. پێدڤیە پلانەكا تۆكمە و زەمەنكری هەبیت بۆ چاپكرن و دابەشكرنا پەرتووكان. گەلەك جاران كیشە نە یا چاپكرنێ یە، بەلكو یا گەهاندنا پەرتووكانە بۆ قوتابخانەیێن دویر و گوندان. دڤێت وەزارەت ب كارەكێ رێكخستی و ب رێكا تۆرێن گەهاندنێ یێن خورت، پەرتۆكان ب گەهینیتە هەمی قوتابخانەیان بەری زەنگا ئێكێ یا خواندنێ لێبدەت.
نەبتنێ دابەشكرن، بەلكو دڤێت كوالێتیا پەرتۆكان ژی بهێتە بەرچاڤ وەرگرتن. قوتابی ب هیڤیا پەرتۆكەكا نوو دچیتە خواندنێ، لێ گەلەك جاران پەرتووكێن كەڤن و ژ هەڤڤەبووی بۆ قوتابیان دهێنە دابەشكرن، ئەڤە ژی دێ كارتێكرنا دەروونی ل سەر قوتابی هەبیت و حەزا وی بۆ خواندنێ كێم كەت.
ژ بەر ڤێ چەندێ، مە دڤێت وەزارەتا پەروەردێ ب هەمی شیانێن خوە ڤە، ڤی كاری بكەتە ئەولەویەتا ئێكێ یا خوە. ئاڤاكرنا ئایندەیێ قوتابیان ل سەر پەرتووك و زانستێ هاتیە ئاڤاكرن. ئەگەر ئەڤ بنەمایە ل دەستپێكێ نەهێتە دابینكرن، ئەم نەشێین چاڤەرێی بەرهەمەكێ باش یێ زانستی بكەین.
بێگومان، بەرپرسیاریا دابینكرنا پەرتووكان تنێ ل سەر وەزارەتێ نینە، بەلكو دڤێت كارگێریێن پەروەردێ ل قەزا و ناحیان ژی ب دروستی چاڤدێریێ ل سەر ڤێ پرۆسێ بكەن و ئاریشەیێن ل سەر ئاستێ لۆكالی تێبینی بكەن و چارەسەر بكەن. دڤێت ئەڤ سالە بێی گیرۆبوون و ب دابینكرنا تەڤایا پەرتووكان دەست پێ بكەت، داكو قوتابیێن مە شیێن دەستپێكەكا بهێز بۆ سالا خوە یا خواندنێ بكەن و ئاستێ زانستێ ل هەرێما مە ب گشتی بلندتر لێ بێت. چنكو قوتابی سەرمایێ گەلێ مە نە و دڤێت ئەم ب هەمی رەنگەكێ رێزێ ل دەم و داهاتێ وان بگرین.

سەردار مەجید

د ڤی دەمێ هەستیار و ئالۆز دا، ئەوا هەرێما كوردستانێ پێ دەرباز دبیت هەمی ئاماژە و پێشڤەچوونێن دەوروبەر ل سەر مە د سەپینن كو پتر ژ هەر دەمەكێ دی، پێدڤیا مە ب ئێكڕێزی و یەكگرتنێ هەیە. ڕەوشا نوكە یا سیاسی و ئابووری، چاڤەرێ نابیت و نابیت ئەم دەمێ خۆ ب دەست ڤە بدەین، ژ بەر كو هەر رۆژەكا دچیت و كابینا نوی یا حوكمەتا هەرێمێ نەهێتە پێكئینان، دێ بیتە ئەگەرێ زێدەتر لێكرنا بارێ گران یێ سەر ملێن خەلكێ كوردستانێ و پتر لاوازكرنا دەستهەلاتا مە ل هەنبەر ئاستەنگێن دەرەكی.
بانگەوازا سەرۆك بارزانی، بانگەوازەكا ژ دل و هەستكرن ب بەرپرسیارەتیا مێژوویی بوو، كو تێدا جەخت ل سەر وێ چەندێ كر كو پاراستنا ئەزموونا هەرێمێ د ناڤبەرا دەستێن مە هەمیان دایە. لەورا، ل سەر هەمی لایەنێن سیاسی، ب تایبەت پارتی دیموكراتی كوردستان و ئێكەتی نیشتمانی كوردستان پێدڤیە ب زویترین دەم و ب گیانەكێ بەرپرسیارانە دانیشن و دانوستاندنێن جدی دگەل ئێك بكەن. پێكئینانا كابینەكا نوی، نە بتنێ ئەركەكێ دەستووری یە، بەلكی ئەركەكێ نیشتمانی و ئەخلاقی یە بۆ ڤەگەراندنا باوەریێ بۆ ناڤا جڤاكێ‌.
ئەم پێدڤی ب حوكمەتەكا ب هێز و فرەلایەنینە، حوكمەتەك كو دەربڕینێ ژ ئیرادەیا هەمی خەلكێ كوردستانێ بكەت، بێ جوداهی. یا گرنگ ئەوە كو كابینا نوی ب ئێك دەست و ب بەرنامەكێ رۆهن، كار بۆ باشتركرنا رەوشا ژین و ژیارا خەلكی بكەت. لادانا ئاستەنگێن بەردەم مووچەی و چارەسەركرنا كێشەیێن دارایی، دڤێت بنەمایێ سەرەكیێ كاری بیت. خەلكێ مە یێ وەستیای، چاڤەرێی دیتنا ئێكڕێزیێ یە، نە ئێكڕێزییا ل سەر كاغەزێ، بەلكی ئێكڕێزییا د ناڤا كار و كریاران دا، داكو بشێین ب هەڤرا رووبەڕووی هەر ئەگەرەكێ نەخوازكری ببین.
پێدڤیە ئەم ل بیر نەكەین كو پاراستنا قەوارێ هەرێمێ، ب تەنێ ب ئێكگرتنا هەلوەستێن مە دبیت. دەمێ تو د ئێكەتی و پارتی دا دبینیی كو مەترسی ل سەر دەستكەفتێن گەلێ كوردستانێ هەنە، دڤێت بەرژەوەندیێن تەنگێن حزبی ل پاش بێخن و بەرژەوەندیا باڵا یا نیشتمانی بكەنە ئەولەویەت. بێگومان، هەر پاشكەفتنەك د ڤی پرۆسەی دا، دێ زیانێ گەهینیتە هەمی لایەنان.
لەورا، دڤێت ئەم ب گەرمی پێشوازیێ ل هەر هەولەكێ بكەین كو بەرەف پێكئینانا حكومەتێ ڤە دچیت. باوەرییا مە یا مەزن هەیە كو سەركردایەتیا كوردستانی دێ شێت د ڤێ قووناغا هەستیار دا ب سەركەفتیانە دەرباز ببیت و حكومەتەكا كارامە و خزمەتگوزار پێكبینیت، دا كو ژینگەهەكا ئارام و پڕ ژ گەشەبینێ بۆ نەوەیێن داهاتی دابین بكەین. چ نینە ژ ئێكڕێزیێ پیرۆزتر، چنكو ئێكڕێزی ئەوا هەرێما مە د پارێزیت و دێ مە بگەهینیتە ئارمانجێن مە یێن مەزن.

سەردار مەجید

ژیان دیاریەكا مەزن و ب بها یا خودێ یە، كو ل بەر دەستێ مە هاتیە دانان دا كو ئەم ب خۆشی و جوانی دەرباز بكەین، ژیان ب بتنێ بۆراندنا دەمی نینە، بەلكو كۆمەكا ئەزموون و بزاڤانە بۆ گەهشتن ب ئارمانجێن بلند، پێشكەفتن د ژیانێ دا نە بتنێ د وارێ ماددی یان ئاڤاكرنا بالەخانە و جاددەیان دا دهێتە دیتن، بەلكو پێشكەفتنا دروست ل ناڤ دل و مێشكێ مرۆڤی دەستپێ دكەت، هەر دەمێ مرۆڤی كار كر بۆ هندێ كو ئەڤرۆ یا وی ژ دوهیا وی باشتر بیت، ئەو كەس یێ ل سەر رێكا پێشكەفتنێ، هەكە ئەم ل مێژویا مللەتێن پێشكەفتی بنێرین، دێ بینین كو وان ب تنێ ب خەونان و گۆتنان نەگەهشتینە ڤێ ئاستێ، بەلكو كار و زانین كرینە بنەمایێ ژیانا خۆ، زانین و خواندن كلیلا سەرەكی یا پێشكەفتنێ نە، مرۆڤێ خودان زانست دشێت رێكا خۆ د ناڤ تاریێ دا ببینیت و نەهێلیت رێكا وی بەرزە ببیت و ل دەڤەرا مە پێدڤیا مە ب گەنجێن ژیر هەیە كو ب عەقلەكێ ڤەكری تەماشەی ژیانێ بكەن و بزاڤێ‌ بكەن تشتەكێ نوو پێشكێشی جڤاكی بكەن، پێشكەفتن ب خۆ ڕادەستكرنێ ناهێت، بەلكو ب خۆڕاگری و ماندیبوونێ دهێت.
خالەكا دی یا گرنگ بۆ پێشكەفتنێ، پاراستنا رەوشت و دابونەریتێن مە یێن رەسەنە، مرۆڤ دشێت پێشكەفتنێ د تەكنولۆژیا و زانستی دا بكەت بێی كو دەست ژ رەوشتێ خۆ یێ كوردی بەردەت، ژیان گەلەكا یا ب زەحمەتە و پڕی یە ژ ئاستەنگان، لێ ئەڤ ئاستەنگە نە بۆ هندێ نە كو ئەم بوەستین، بەلكو بۆ هندێ نە دا كو مە بهێزتر لێ بكەن. هەر شكەستنەك د ژیانێ دا و انەیەكا نوو ددەتە مە دا كو د پێنگاڤا دووڤدا ب عەقلەكێ باشتر دەستپێ بكەین.
پێشكەفتن دڤێت هەموو بۆارێن ژیانێ بگریت، ژ پەروەردەكرنا زارۆكان ل سەر ئەڤینا مللەتی، هەتا دگەهیتە پاراستنا ژینگەهێ‌ و رێزگرتن ل یاسایێ، دەمێ ئەم دبینین جاددەیێن مە د پاقژن، كارەبا مە یا بەردەوامە و جڤاكێ مە یێ تەبا و تەبایە، ئەڤە نیشانا هندێ یە كو ئەم یێ بەرەڤ پێشڤە دچین، لەورا پێدڤییە هەر ئێك ژ مە ژلایێ خۆ ڤە هەست ب بەرپرسیارەتیێ بكەت. ژیان دبۆریت، لێ تشتێ دمینیت ئەو كارێن چاك و شوینوارێن گەشن كو مرۆڤ ل دووف خۆ دهێلیت و بلا خەونا مە هەموویان ئەوە بیت كو ببینە پارچەك ژ ئاڤاكرنا ڤێ وەلاتی.

سەردار مەجید

نێزیكبوونا دەمێ ئەزموونان بۆ هەر قوتابیەكێ، قووناغەكا گرنگ و هەستیارە د ژیانا وی یا خواندنێ دا. ئەزموون نەك تنێ تاقیكرنا پێزانینانە، بەلكو تاقیكرنا خۆڕاگری، پلان دانان و بڕێڤەبرنا دەمی یە. د ڤی دەمی دا، قوتابی دكەڤیتە بن فشارەكا دەروونی، لێ ب رێكا ئامادەكاریەكا دروست، ئەو دشێت ڤێ فشارێ بكەتە وزە و پالپشت بۆ بدەستڤەئینانا نمرەیێن بلند و گەهشتن ب هیڤی و ئارمانجێن خۆ. ئێكەم پێنگاڤ بۆ سەركەفتنێ د ئەزموونان دا، رێخستنا دەمی یە. قوتابیێ ژیر ئەو كەسە یێ كو بەرنامەكێ رۆهن و ئاشكەرا بۆ خواندنا وانەیێن خۆ دادەنیت. پێدڤیە هەر وانەیەك ب گۆڕەی گرنگیا وێ دەم بۆ بهێتە تەرخانكرن، و چ جاران خواندن بۆ شەڤا ئەزموونێ نەهێتە پاشخستن. پاشخستنا ئەركان دبیەتە ئەگەرێ هندێ كو مێشك بوەستیێت و پێزانین ب شێوەیەكێ دروست د سەرێ مرۆڤی دا جێگیر نەبن. لەورا، خواندنا رۆژانە و دوبارەكرنەوەی بابەتان كلیلا سەرەكی یا سەركەفتنێ یە. هەروەسا، ژینگەها خواندنێ رۆلەكێ مەزن دگێڕیت.
پێدڤیە قوتابی ل جهەكێ تەنا و دویر ژ هەر تشتەكێ كو بالێ وی بكێشیت، وەك مۆبایل و تەلەفزیۆنێ، دەست ب خواندنێ بكەت. بكارئینانا تەكنۆلۆژیایێ د دەمێ ئەزموونان دا دڤێت ب رەنگەكێ سنوردار بیت، دا كو مێشك نەهێتە مژویلكرن و ماندی نەبیت. لایەنەكێ دی یێ گرنگ، خوارنا ساخلەم و نڤستنا تێرە. مێشكێ مرۆڤی پێدڤی ب پشوویێ هەیە دا كو بشێت پێزانینان كۆم بكەت و ل دەمێ ئەزموونێ ب لێهاتیی ڤە بكاربینیت. پالپشتیا خێزانێ ژی د ڤێ قووناغێ دا گەلەك یا پێدڤی یە. دایك و باب دڤێت كەشوهەوایەكێ ئارام بۆ زارۆكێن خۆ دابین بكەن و باوەریێ بدەنێ. ترسا ژ ئەزموونان تشتەكێ سروشتی یە، لێ نابیت ئەڤ ترسە ببیتە رێگر ل بەردەم شیانێن قوتابی. باوەری ب خۆبوون نیڤا سەركەفتنێ یە؛ دەمێ قوتابی ب هێز و ورەیەكا بلند دەست ب خاندنێ دكەت، دێ ب ساناهیتر دشێت بەربەستان دەرباز كەت. د كۆتاییێ دا، پێدڤیە قوتابی ب لێبۆرین و جدیەت سەحكەتە ئەزموونان. ئەزموون ب تنێ وێستگەیەكا كورتە د ژیانێ دا و نابیتە كۆتاییا جیهانێ، بەلكو دەلیڤەیەكە بۆ نیشاندانا رەنج و ماندیبوونا سالەكا تەمام. هەر قوتابیەكێ رەنج دابیت، بێگومان دێ بەرهەمێ وێ ب دەست خۆ ڤە ئینیت. هیڤیا مە ئەوە هەمی قوتابی ب سەركەفتیانە ڤێ قووناغێ دەرباز بكەن و ببنە جهێ شانازیا خێزان و وەلاتێ خۆ و ب زانست و زانیاریێن خۆ خزمەتا جڤاكێ مە بكەن.

سەردار مەجید

ئێكێ هەیڤا گولانێ، نە بتنێ ژڤانەكێ سالانەیە ل سەر سالنامەیا جیهانێ، بەلكو سیمبۆلەكێ مەزنێ خۆڕاگری، تێكۆشان و وەفاداریێ یە بۆ وێ تەخا كو ستووینا سەرەكی یا ئاڤادانكرنا هەر جڤاكەكێ‌ یە. ئەڤڕۆ ڕۆژا جیهانی یا كرێكارانە؛ ڕۆژا وان دەستێن ب ماندیبوونێ ڕەق بووین دا كو ژیانا مە نەرم و ب ساناهی بكەڤیت. ب ڤێ هەلكەفتێ، هەمی جیهان سلاڤێن خوە یێن گەرم بۆ دهنێرن، ئەم ژی تایبەت بۆ هەر كرێكارەكێ كوردستانێ و نەخاسمە ژی ل پارێزگەها دهۆكێ، كو ب كێماسی و بێی مۆلەت و بێهنڤەدان، كار دكەن دا كو پاشەڕۆژەكا گەشتر بۆ مە ئاڤا بكەن.
كرێكار ئەو مرۆڤێن مخلصن یێن كو خوەدیێن فەزڵەكێ مەزنن ل سەر شارستانیەتێ. ئەگەر ئەم ل هەر باژێڕەكێ بنێرین، هەر ئاڤاهیەكێ بلند، هەر جاددەیەكا قێركری و هەر خزمەتگوزاریەكا دگەهیتە مالێن مە، بەرهەمێ وێ خوهێ یە یا ژ ناڤ چاڤێن كرێكاران دباریت. ل ژێر تیشكا ڕۆژا تایا و سەرمایا زڤستانی، كرێكار نامیننە ڕووینشتی، بەلكو ب ئیرادەیەكا پۆلاینی بەردەوامن ل سەر كارێ خوە. مێژوویا ڤێ ڕۆژێ ژی بۆ مە دیار دكەت كو مافێن كرێكاران ب ساناهی دەستڤە نەهاتینە، بەلكو ئەنجامێ زنجیرەیەكا درێژ یا خەباتێ بوو بۆ بدەستڤەئینانا ژیانەكا ب شكۆ و دادپەروەرانە.
د ڤێ ڕۆژێ دا، پێدڤیە ئەم پتر گرنگیێ بدەینە ڕەوشا قانوونی و ژیان و گوزەرانا كرێكاران. دابینكرنا ژینگۆهەكا كارێ یا بێوەی و پاراستنا مافێن وان یێن مادی و مەعنەوی ئەركەكێ ئەخلاقی و نیشتیمانی یە. پێدڤیە یاسایێن كار و دەستەبەریا جڤاكی ب ئاوایەكێ بهێنە جێبەجێكرن كو كرێكار هەست ب پشتڕاستیێ بكەت، دا كو بزانیت ماندیبوونا وی ناهێتە بەرزەكرن و ل دەمێ پیربوونی یان هەر حالەتەكێ نەخۆش، جڤاك و دەولەت د پشتەڤانن.
ل دوماهیێ، وەكو نڤیسەرەكێ‌ ڤی وەلاتی پیرۆزباهیێ ل تەڤایا كرێكارێن جیهانێ و ب تایبەت یێن دەڤەرا مە دكەین. هوین ئەو قارەمانێن بێدەنگن یێن كو بێی دەنگەدەنگ و بێی چاڤەڕێبوونا سوپاسیێ، ژیانێ بۆ مە بەردەوام دكەن. هەر دەستەكێ كار دكەت، هەر چاڤەكێ ب شەهرەزایی ل كارێ خوە دنێریت، و هەر دلەكێ بۆ نیشتیمانی لێ ددەت، هوین شانازی و سەربلندیا مە نە. هیڤیا مە ئەوە كو سال ب سال ڕەوشا كرێكاران بەر ب پێشتر ڤە بچیت و چو جاران ماندیبوونا وان نەهێتە ژبیركرن.