پێدڤیه كه‌نالێن راگه‌هاندنێ و سوشیال میدیا ب یاسا بهێنه رێكخستن
ره‌مه‌زان هه‌رنی:
به‌رده‌وام وه‌لاتی گازنده‌یا ژ خراب بكارئینانا تۆرێن جڤاكی دكه‌ن كۆ بێ سانسۆر زیان گه‌هاندیه وه‌لاتیان و جڤاكی د هه‌مانده‌مدا كه‌نالێن راگه‌هاندنێ ژی هند جاران جهێ هوشیاریا جڤاكی دبنه سه‌ده‌مێ تێكدانا ئارامیا ده‌رونێ بینه‌ران و جڤاكی و پێدڤیه كه‌نالێن راگه‌هاندنێ و سوشیال میدیا ب یاسا بهێنه رێكخستن بۆ به‌رژه‌وه‌ندیا گشتی .
جوان ئیمام یاسین ، ده‌رچوا كۆلێژا یاساو رامیاری بۆ ئه‌ڤرۆ راگه‌هاند : ب ره‌نگه‌كێ به‌رفره‌هـ ته‌كنه‌لۆژیا به‌لاڤبووه ل ناڤ جڤاكی كۆ ژبلی كه‌نالێن راگه‌هاندنێ ئه‌ڤرۆ سوشیال میدیا ژی بۆیه ئاریشه‌ك رۆژانه زیانێن وێ به‌رفره‌هـ دبن ژ ئه‌نجامێ خراب ب كارئینانا وێ ژلایێ پشكداربووان ڤه ، د هه‌مانده‌مدا كه‌نالێن راگه‌هاندنێ ئاسمانی و لۆكالی ژی پێدڤیه پتر بهێنه سنورداركرن ب یاسا بهێنه رێكخستن بۆ پتر پاراستنا ده‌رونێ وه‌لاتیان.
گوتژی : دڤان سالێن دووماهیێ دا تۆرێن جڤاكی زیانێن مه‌زن ل پشت خۆ هێلاینه شیرازا گه‌له‌ك خێزانا تێكدایه ئه‌گه‌ر نه‌هێن رێكخستن دێ مه‌ترسا ب كارئینانێ پتر بیت پێدڤیه جهێن شوله‌ژی ب رژدی كار لسه‌ر ڤێ چه‌ندێ بكه‌ن كۆ ترسا ب كارئینانا تۆرێن لسه‌ر وه‌لاتیان كێمتر ببیت ژبه‌ركۆ ژبلی كۆ زیان گه‌هاندیه جۆره بێ باوه‌ریه‌ك ژی دروستكریه .
ئاشكراكر : ده‌مه‌كه راگه‌هاندن د به‌رژه‌وه‌ندیا ده‌رونێ وه‌لاتیان دا كار ناكه‌ن ئه‌ڤه زێده‌باری كۆ یاسا هه‌یه بۆ كارێ راگه‌هاندنێ یا گرنگ ئه‌وه مۆله‌تا ڤه‌كرنا ده‌زگه‌هێن راگه‌هاندنێ زۆر ب زه‌حمه‌ت و گران بیت و فلته‌رێن جڤاكی و سیاسی و نشتیمانی و گشتی زێده ببن ، یاسایه‌ك هه‌بیت هه‌ر كه‌ناله‌كێ ل یاساو رێنمایا ده‌ركه‌ڤیت یان ژی ببن ئه‌گه‌رێ تێكدانا ده‌رونێ جڤاكی بهێته گرتن .
خویاكر : گرنگه راگه‌هاندن بۆ هوشیاركرنا جڤاكی بیت نه‌ك تێكدانێ د هه‌مانده‌مدا نابیت راگه‌هاندن سه‌ربه‌ست بیت دژی به‌رژه‌وه‌ندیێن نه‌ته‌وه‌یی كار بكه‌ن بۆ ڤێ چه‌ندێ ژی یاسا ب كارێ خوه رابیت و ئه‌و كه‌نال بهێنه گرتن بۆ ده‌مه‌كێ دیاریكری هه‌تا كۆ هه‌ست ب به‌رپرسیارییه‌تیا راگه‌هاندنێ بكه‌ن.
