پێدڤییە حوكمەتا ئیراقێ قەرەبوویا كوردێن فەیلی بكەت
ل سالڤەگەڕا 45 یا جینۆسایدكرنا كوردێن فەیلی ژ ئالیێ رژێما بەعسڤە، سەرۆكێ حوكمەتا هەرێما كوردستانێ پەیامەك بەلاڤكر و تێدا راگەهاند: پێدڤییە حوكمەتا ئیراقێ ئەركێ خوە بجه بینیت و ب شێوەیەكێ هەژی كوردێن فەیلی قەرەبوو بكەت.
مەسرور بارزانی، سەرۆكێ حوكمەتا هەرێما كوردستانێ د پەیاما خوە دا گۆت» ئەڤرۆ بیرئینانا تاوانەكا هۆڤانەیە، بەرامبەر پشكەكا گرنگ یا گەلێ مە دكەین، كو هەوێن جینۆسایدكرنا كوردێن فەیلییە و رژێمێن ئێك ل دووڤ ئێك یێن ئیراقێ ،ب چەندین قۆناغان ئەنجامدا و ل سالا 1980 گەهشتە گۆپیتكا درندایەتیێ».
مەسرور بارزانی گۆت ژی» ئەو جینۆسایدە ژ ئەگەرێ وێ چەندێ بوو ئەو كەسە كورد بوون، رژێما بەرێ یا ئیراقێ سەدان هزار كوردێن فەیلی ل ئیراقێ دەركرن و ب هزاران ژی بەرزەكرن، دەست ب سەر مولك و سامانێن وان دا گرت و رەگەزنامە ژێ ستاندن».
سەرۆكێ حوكمەتا هەرێما كوردستانێ دوپاتكر» پێدڤییە حوكمەتا ئیراقێ، ئەرك و بەرپرسیارەتییا خوە یا قانوونی و دستووری بجه بینیت و بنەمال و كەسوكارێن قوربانیێن جینۆسایدا كوردێن فەیلی و جینۆساید و كۆمكوژیێن دی، ب شێوەیەكێ هەژی، قەرەبوو بكەت و مولك و مالێ وان بۆ بزڤرینیت».
