پێدڤییە نیازپاكی و ئیرادەیەكا راستەقینە بۆ چارەسەركرنا كێشەیان هەبیت
دوهی دوشەمبی 9/11/2024 ل سەلاحەدین سەرۆك مەسعود بارزانی پێشوازی ل شاندەكێ بلند یێ حوكمەتا ئیراقێ كر كو پێكهاتبوو ژ د. فوئاد حسێن، جێگرێ سەرۆك وەزیرێن ئیراقێ و سەرۆكێ جڤاتا وەزارییا ئابوورییا ئیراقی و محەمەد عەلی تەمیم، جێگرێ سەرۆك وەزیرێن ئیراقێ و وەزیرێ پلاندانانێ و تەیف سامی، وەزیرا داراییا ئیراقێ و حەمید نەعیم ئەلغزی، سكرتێرێ گشتیێ جڤاتا وەزیرێن ئیراقێ و عەلی موحسن ئەلعەلاق، پارێزگەرێ بانكا ناڤەندییا ئیراقی و هەژمارەكا بەرپرسێن حوكمەتا ئیراقێ ژ وەزارەتێن دەرڤە و پلاندانانێ و دارایی و پەترۆلێ و بازرگانی و پیشەسازی و كانزایان و چاندنێ و كار و كاروبارێن جڤاكی و هەروەسا سكرتارییەتا جڤاتا وەزیرێن ئیراقێ و بانكا ناڤەندییا ئیراقی و دەستەیا كاغەزێن داراییێن ئیراقێ.
د وێ دیدارێدا شاندێ مێهڤان سەرەرای دەربڕینا خوەشحالییا خوە ب سەرەدانا هەرێما كوردستانێ رێز بۆ رۆلێ دیرۆكیێ سەرۆك بارزانی د ئاڤەدانكرنا ئیراقا نوو و خەباتا ل دژی دیكتاتۆریەتێدا هەبوو، هەروەسا ئارمانجا سەرەدانا خوە بۆ هەرێما كوردستانێ و دانوستاندنێن ل گەل ئالیێن پەیوەندیدارێنحوكمەتا هەرێما كوردستانێ بۆ سەرۆك بارزانی بەرچاڤكر. هەروەسا شاندێ مێهڤان دوپاتی ل ئەوێ چەندێ كر كو چاڤپێكەفتن و كۆمبوونێن وان ل گەل حوكمەتا هەرێما كوردستانێ د مفادار بوون و مەبەستا وان هەموو ئالییەك د سەقایەكێ پڕ ژ باوەریێ و ب تێروانینەكا زەلال و ئاڤاكەر بگەهنە تێكگەهشتنەكا تمام ژ پێخەمەت چارەسەركرنا كێشەیان و لادانا ئاستەنگان.
هەر د ئەوێ دیدارێدا سەرۆك بارزانی ب گەرمی ب خێر هاتنا شاندێ بلند یێ حوكمەتا ئیراقا فیدرالی كر و هیڤییا ئەوێ چەندێ خواست كو وێ سەرەدانێ و هەڤدو دیتنێ ئەنجامەكێ ئەرێنی بۆ هەموو ئیراقێ و هەرێما كوردستانێ هەبیت. سەرۆك بارزانی رۆناهی ئێخستە سەر دیرۆكا خەبات و قوربانیدانا گەلێ كوردستانێ ل چەرخێ بیستێ و هەروەسا ئەوژی ب بەرهەڤبوویێن كۆمبوونێ راگەهاند كو ل پشتی 2003 ئەو چاڤەڕێبوونە هەبوو كو ئیراقەكا نوو بهێتە ئاڤاكرن كو ببیتە نموونەیا پێكڤەژیانێ و هەڤپشكیێ و دیموكراسیێ و فرەهیێ ل دەڤەرێ.
سەرۆك بارزانی ئەوژی دوپاتكر كو خەباتا گەلێ كوردستانێ بۆ چەسپاندنا هەڤپشكیێ و مافێن خوە بوو و نابیت ل شوونا رێزگرتنێ ل داخوازیێن گەلێ كوردستانێ و قەرەبوویا ئەنفال و كیمیابارانكرنێ، بزاڤا ئەوێ چەندێ بهێتە كرن دۆزەكا دیرۆكی و خەبات و قوربانیدانا بێ هەژمارا كوردستانێ د بابەتێ مووچەیدا بهێتە بچووككرن یان ژی بزاڤا پەرت و بەلاڤبوونا هەرێما كوردستانێ بهێتە كرن.
سەرۆك بارزانی د درێژییا ئاخڤتنێن خوە دا دوپاتی ل ئەوێ چەندێ كر كو باشترین رێك بۆ نەهێلانا كێشەیان، بكارئینانا شێوازێ تێكگەهشتنێ و دیالۆگێیە د ناڤبەرا حوكمەتا ئیراقا فیدرال و حوكمەتا هەرێما كوردستانێ. دیاركرژی كو بۆ چارەسەركرنا كێشەیان پێدڤییە ئەم هەموو بۆ دستووری ڤەگەرین و ل گەل ئەوێ چەندێ ژی پێگیری وان رێككەفتنێن سیاسی ببین كو ئالیێن هەڤپەیمانییا ئیدارەیا دەولەتێ ل سەر رێككەفتین. سەرۆك بارزانی پێزانین بۆ رۆل و بزاڤێن محەمەد شیاع سۆدانی، سەرۆك وەزیرێن ئیراقێ هەبوو بۆ نەهێلانا ئاستەنگان وچارەسەركرنا گرفتان و ئەوژی دوپاتكر بۆ سەرئێخستنا پڕۆسەیا دیالۆگێ و چارەسەركرنا كێشەیان، ل گەل پێگیریبوون ب دستووری و رێككەفتنێن سیاسی پێدڤییە نیازپاكی و ئیرادەیەكا راستەقینە بۆ چارەسەركرنا كێشەیان هەبیت.
