پێدڤیە كێشەیا مووچەیێن فەرمانبەرێن هەرێما كوردستانێ ب لەز بهێتە چارەسەركرن
سەرۆكێ هەرێما كوردستانێ د پەیڤەكێ دا د رێوڕەسمێ سالڤەگەرا تیرۆركرنا محەمەد باقر ئەلحەكیم دا، كو سەرۆك وەزیرێن ئیراقێ و بەرپرسێن بلند یێن ئیراقی بەرهەڤبوون، راگەهاند: ژ بەر نەبوونا بودجەی و مووچەی ل هەرێما كوردستانێ، فەرمانبەر و خەلك د رەوشەكا گەلەك خراب دا دژین و داخوازكر کێشە زوو بهێتە چارەسەركرن.
دوهی شەمبیێ 13/1/2024، ل باژێرێ بەغدا ب پشكداریا نێچیرڤان بارزانی، سەرۆكێ هەرێما كوردستانێ، لەتیف رەشید، سەرۆكێ كۆمارا ئیراقێ، محەمەد شیاع سۆدانی، سەرۆك وەزیرێن ئیراقێ و بەرپرسێن حزبی ڕێورەسمێن سالڤەگەرا تیرۆركرنا محەمەد باقر ئەلحەكیم یێ ناڤدار ب (شەهیدێ میحرابێ) بڕێڤەچوو، د ئەوی رێوڕەسمی دا سەرۆكێ هەرێما كوردستانێ پەیڤەك پێشكێشكر.
سەرۆكێ هەرێما كوردستانێ د پەیڤا خوە دا گوت» گەلێ ئیراقێ بۆ رزگاربوونێ ژ چەوساندنێ و رزگاربوونێ ژ تیرۆرێ، گەلەكگ شەهید داینە، باشترین وەفاداری بۆ بیرئینان و گیانێ شەهیدان گەشەپێدانا ئاڤەدانیێ و خوەشكرنا ژیانا خەلكێ ئیراقێ و دابینكرنا پاشەڕۆژەكا گەشە بۆ نڤشێ نوكە و داهاتی».
سەرۆكێ هەرێما كوردستانێ ئاماژە ب ژیانا محەمەد باقر ئەلحەكیم كر و گوت» شەهیدێ دەستێ تیرۆرێ، ژ دووری وەلاتی هاندەرەكێ سەرەكیێ خەباتا پێكڤە یا ئۆپۆزسیۆنا ئیراقێ بوو بۆ رزگاركرنا گەلێ ئیراقێ ژ چەوساندنێ و دیكتاتۆریەتێ، پێدڤیە ب كریار وەفاداریا خوە بۆ شەهیدێ میحرابێ و هەموو شەهیدان نیشا بدەین، ئەو ژی ب نەهێلانا هەموو جۆرەكێ چەوساندنێ و نەیەكسانیێ ل گەل دووركەفتنا هەموو كزیان ژ ڤەگوهاستنا ركابەریێ د ناڤبەرا ئەوان دا بۆ جڤاك و پێكهاتەیێن ئیراقێ».
نێچیرڤان بارزانی باس ل پەیوەندیا ئدریس بارزانی و سەرۆك مەسعود بارزانی، مام جەلال و شەهید محەمەد باقر ئەلحەكیم كر و گوت» پێكڤە كاركرن و ئێكەتی د ناڤبەرا شەهیدی میحرابێ، و بابێ من یێ رەحمەتی ئدریس بارزانی، هەروەسا ل گەل جەنابێ سەرۆك مەسعود بارزانی و سەرۆكێ رەحمەتی مام جەلال و ئالی وسەركردەیێن دی یێن ئۆپۆزسیۆنا ئیراقی، ئەوی دەمی خوەشتڤی د ناڤبەرا گەلێ چەوساندی یێ ئیراقێ ب هێز دكر، ئەم نڤشێ نوو پشتی ئەوان دڤێت ئەوێ خوەشتڤیێ ب هێزتر بكەین، نەكو تێك بدەین».
د بەردەوامیا پەیڤا خوە دا، سەرۆكێ هەرێما كوردستانێ گۆت» رێبەرێ شۆڕەشا كوردستانێ رەحمەتێ مەلا مستەفا بارزانی پەیوەندیەكا بەردەوام ل گەل مەرجەعیەتا بلند یا ئیراقێ هەبوو، فەتوایێن ئایەتوللا عوزما موحسن ئەلحەكیم، ل گەل ئایەتوللا عوزما محەمەد باقر ئەلسەدر ل سالێن 1965 و 1974 ل بن حوكمێ دیكتاتۆری دا بێی گوهدانا مەترسیێن ل سەر ژیانا خوە فەتوایێن گەلەك حەقپەرستانە بوون. ئەوان هەردو مەرجەعێن مەزن فەتوایێن حەرامكرنا شەڕێ كورد و پێشمەرگەیان دا. گەلێ كوردستانێ چ جاران فەتوایێن ئەوان ژبیر ناكەت».
نێچیرڤان بارزانی گوت ژی» نابیت ب كەرب و دوبەرەكیێ، نوكە و پاشەڕۆژ تێك بچیت و دڤێت هەموو ئالی پێگیری دستوورێ ئیراقێ بن».
سەرۆكێ هەرێما كوردستانێ د پەیڤا خوە دا گوت» نوكە ژ بەر نەبوونا بودجەی و مووچەیان ل هەرێما كوردستانێ، فەرمانبەر و خەلك د رەوشەكا گەلەك خراب دا دژین وئەڤێ چەندێ كاریگەریا خراب كریە سەر هەموو كەرتان ل هەرێما كوردستانێ. گەلەك یا پێدڤیە ئەو كێشەیا مەزن ب لەز بهێتە چارەسەركرن، ئەوژی بەرپرسیارەتیا مە هەموویانە، چونكە هەرێما كوردستانێ و فەرمانبەرێن وێ پشكەكن ژ ئیراقێ، لەوما داخواز ژ هەموو سەركردە و ئالیێن سیاسی، فراكسیۆنان و هەموو ئەندامێن جڤاتا نوونەرێن ئیراقێ دكەم پشتەڤان بن بۆ چارەسەركرنا كێشەیا بودجە و مووچەیێن فەرمانبەرێن هەرێما كوردستانێ».
نێچیرڤان بارزانی ب گرنگی ڤە باس ل كارێن سەرۆك وەزیرێن ئیراقێ كر، هەروەسا باس ل ئەوان هێرشان كر كو دەم بۆ دەمی ب رێكا درۆنان ڤە ل سەر هەرێما كوردستانێ دهێنە كرن و گوت» پێشێلكرنا دەستهەلاتا فەرماندەیێ گشتیێ هێزێن چەكدارێن ئیراقێ (محەمەد شیاع سۆدانی) ب هێرشكرنێ ل سەر نوونەرایەتیێن دبلۆماسی و هێزێن هەڤپەیمانان و پێشمەرگەی كارێ حوكمەتێ تێك ددەت و ئالۆزیان دروست دكەت، ئەوان هێرشان زیانەكا مەزن ب ئاسایش و ژیارا خەلكێ هەرێما كوردستانێ گەهاندیە و دو دلی د هەموو بازارێ ئیراقێ ژی دا دروستكریە، دەلیڤە ژی دایە تیرۆرستێن داعشێ هێرشێن خوە زێدەتر بكەن».
سەرۆكێ هەرێما كوردستانێ ئاماژە ب مانا هێزێن هەڤپەیمانان ل ئیراقێ كر و گوت» هێزێن هەڤپەیمانان ل سەر داخوازا ئیراقێ بۆ بەرهنگاربوونا داعشێ یێن هاتین، پێدڤیە دەلیڤە بهێتە دان ب حوكمەتا فیدرالی و سەرۆك وەزیران محەمەد شیاع سۆدانی كو ب گۆڕەی پێدڤیێ ب پلانەكا هەڤپشك دانوستاندنان ل گەل بكەت، بۆ رێككەفتنێ ل سەر پاشەڕۆژا هاریكاریا د ناڤبەرا هەڤپەیمانان و ئیراقێ دا. دڤێت دەزگەهێن نیشتمانی یێن ئیراقێ كارێ خوە بكەن، بەرۆڤاژی خەلكێ ئیراقێ دێ تووشی كێشە و ئالۆزیێن نوو بن، د دەمەكی دا ئیراقێ د نوكە دا زێدەتر ژ هەموو تشتەكی پێدڤی ب پاراستنا سەقامگیریێ هەیە».
