پێدڤیە هەموو هێز و شیان بۆ پاراستنا قەوارەیێ هەرێما كوردستانێ بهێنە كۆمكرن
پارتی دیموكراتی كوردستان و بزاڤا گۆڕان دوپاتی ل پشتەڤانیكرنێ ل حوكمەتا هەرێما كوردستانێ دكەن و ب پێدڤی دزانن هەموو هێز و شیان بۆ پاراستنا قەوارەیێ هەرێما كوردستانێ بهێنە كۆمكرن.
دوهی سێشەمبی 24/10/2023 ،ل بارەگەهێ مەكتەبا سیاسی یا پارتی دیموكراتی كوردستان ل پیرمام، كۆمبوونا هەڤپشك د ناڤبەرا بزاڤا گۆڕان و پارتی دیموكراتی كوردستان هاتە ئەنجامدان.
ب گۆڕەی بەیاننامەیەكا هەڤپشك یا بزاڤا گۆڕان و پارتی دیموكراتی كوردستان» د كۆمبوونێ دا ڕەوشا هەستیار یا دەڤەرێ ب گشتی و ئیراقێ و هەرێما كوردستانێ ب تایبەتی دانوستاندن ل سەر هاتە كرن».
وەكو د بەیاننامەیا هەڤپشك دا هاتی» هەردو ئالی د هەڤڕا بوون ل سەر كۆمكرنا هەموو هێز و شیانان بۆ پاراستنا قەوارەیێ هەرێما كوردستانێ و دانانا ستراتیژیەتا هەڤپشك یا نیشتمانی یا هێز و ئالیێن سیاسی بۆ ڕاكرنا هەلگرتنا بەرپرسیارەتیا قۆناغێ».
د تەوەرەكێ دا یێ كۆمبوونێ دا دوپاتی ل ب هێزكرنا پەیوەندیێن هەردو ئالیان هاتە كرن، ب تایبەتی پشتەڤانیكرنا حوكمەتا هەرێما كوردستانێ بۆ پێنگاڤێن وێ ل گەل حوكمەتا فیدرال ژ پێخەمەت دابینكرنا مافێن دستووری یێن هەرێما كوردستانێ و شایستەیێن دارایی، ژ وان مووچەیێن فەرمانبەران و باشتركرنا ژیارا وەلاتیێن كوردستانێ».
شاندێ بزاڤا گۆڕان ژ عەمەر سەید عەلی، مستەفا سەید قادر، ئاسۆ ڕەحیم، كاردۆ محەمەد، دلێر عەبدولخالق و بەختیار عەلی پێكهاتبوو و شاندێ پارتی دیموكراتی كوردستان ژی پێكهاتبوو ژ فازل میرانی، سیداد بارزانی، هشیار زێباری، مەحموود محەمەد، جەعفەر ئێمینكی و پشتیوان سادق.
