پێدڤیە چەپێن زرێزە بھێتە گوھۆرین بۆ جھەکێ دیتر
ئه‌ڤرۆ نيوز:
ھەر سال چەپێن زرێزە و گوندێ تروانش دھێنە سەخبێرکرن، لێ ل دەمێ وەرزێ باران بارینێ و ب تایبەتی ل دەمێ بارینا بارانان ل وەرزێ بھارێ ئاخ ل ھەردو جھان درھیێت و جادە دا دچیت و خراب دبیت و ھەموو دبیتە کەندوکور، لەورا ئەڤ سالە ژی بارانێ زیان گەھاندینە چەپێن زرێزە ل ناحیا باتیفا و چەپێن گوندێ تروانش ل ناحیا کانی ماسێ و شۆفێر ب زۆری دشێن ھاتنوچوونێ لێ بکەن.
سەلمان شۆفیرەکە ل سەر ھێلا زاخۆ کانی ماسێ کاردکەت بۆ ئەڤرۆ دبێژیت: ھندی من ل بیرە چەپێن زرێزە د خرابووینە و یێن داچووین و ئەڤە چەندین سال بۆرین ھێشتا چارەسەریەکا دروست بۆ ڤێ جادێ نەھاتیەکرن و ھەر ناڤبەینا چەند ھەیڤان ھندە قێری دکەنە وی جھێ درھیێت، لێ ھەر یا بێ مفایە زوو خراب دبیت.
ناڤبری گۆت ژی: سالانە مەزاختنەکا بێ مفا ل ڤێ جادێ دکەن و ھەر دبیتە کەندوکور و دا دچیت، لەورا یا فەرە جھێن شۆلەژێ خەمەکێ ژ چەپێن زرێزە بخۆن و چارەسەریەکا باش بۆ ببینن، چونکو جادە ل گەلەک جھان نوکە خراب بوویە و چو نیشانێن ھاتنوچوونێ ژی ل وان جھێن خراب بووی نەھاتینە دانان و زۆر جاران شۆفێر تووشی روودانان دبن، لەورا دخوازین ئەڤ جادە ب رەنگەکێ باشتر بھێتە چێکرن، دا کو شۆفێر تووشی چو روودانێن دلتەزین نەبن.
زانیار عادل وەلاتیەکێ دەڤەرا بەرواری بالا یە دبێژیت: ئەڤە سالەک تێ نینە جادا سەرەکی ل بن گوندێ ئەلکیشکێ یا کو دچیتە کانی ماسێ ھاتیە سەخبێرکرن، لێ نوکە جارەکا دی خراب بوویە و ھەکە زوو نەھێتە چێکرن،جادا سەرەکی دێ ھێتە برین و شۆفێر نەشێن ھاتنوچوونێ لێ بکەن.
گۆت ژی: دڤێت ئەو جادە زوو بھێتە سەخبێرکرن، چونکو پتریا جادێ داچوویە و کەندێن مەزن کەفتینێ و ھەکە بارانەکا زۆر بھێت دبیت جادە ل وی جھی ھەموو خراب بیت و رێیا ھاتنوچوونێ نەمینیت.
ناڤھاتی دیار کر ژی: ژ ئەگەرێ بارینا بارانان چەپێن گوندێ تروانش ژی خراب بووینە و پێدڤی ب سەخبێرکرنەکا بلەزن، چونکو ل چەندین جھان داچووینە و بووینە کەندوکور، لەورا سەخبێرکرنا وێ رێیێ ژی زۆرا گرنگە، چونکو نوکە وەرزێ بھارێ یە و خەلک گەلەک قەستا گوندان دکەن و کارێ ئاقاری دکەن و خەلکێ چەندین گوندان ھاتنوچوونێ ل سەر وێ رێیێ دکەن.
ئەندازیار دێوالی حەمێ بریندار رێڤەبەرێ سەخبێریا رێک و پرا ل دھۆکێ بۆ رۆژناما ئەڤرۆ دبێژیت: چەپێن زرێزە سالانە درھیێن ل چەندین جھان ژ ئەگەرێ بارینا بارانان ل وەرزێ زڤستانێ و بھارێ و ھەر سال ئەم چەندین جاران وێ رێیێ سەخبێر دکەین ژ پێخەمەت نەھێتە برین، ھەر چەندە بەری چەندین سالان مە فیلتەرێن ب کووراتیا دو مەتران لێدابوون، کو ئاڤ تێدا بچیتە خوار، لێ ئاخ ب کووراتیا 9 تا 10مەتران درھیێت و جادە خراب دبیت.
ناڤبری گۆت ژی: لەورا چارەسەریا ب ئێکجاری ئەوە کو ئەو جادە ل وێرێ بھێتە گوھۆرین بۆ جھەکێ دیتر، ھەر چەندە بەری نوکە مە لیژنەکا ئەندازیاران ڤرێکر بوو وی جھی و ڤەدیتن ژی بۆ ھاتبوو کرن کو رێیەکا نوو بھێتە چێکرن ل زرێزە و بەرھەڤی ژی بۆ ھاتبوو کرن، لێ ئەڤ کاودانێن نوکە پەیدا بوون ئەو پرۆژە نەھاتە بجە ئینان، لەورا ھەتا نوکە پلانا 2014 ھەتا کو سالا 2016 نەھاتینە بجە ئینان، لەورا ب تنێ نوکە چارەسەریا دەمکی بۆ دھێتە کرن، دا کو شۆفێر بشێن ب ساناھی ھاتنوچوونێ ل وان چەپان بکەن.
ناڤھاتی گۆت ژی: چەپێن گوندێ تروانش ژی خراب بووینە و ھەر چەندە چەندین جاران مە سەخبێر ژی کرینە، لەورا ل ڤان نێزیکان رێڤەبەریا سەرخبێریا رێک و پرا ل دھۆکێ دێ چەپێن زرێزە و چەپێن گوندێ تروانشێ و دگەل جادا سەرەکی ل بن گوندێ ئەلکیشکێ یا کو دچیتە کانی ماسێ دێ سەخبێرکەن، ژ پێخەمەت گیانێ خەلکێ و شۆفێران ژ روودانان بھێنە پاراستن.
