پێدڤیە کورد مفایی ژ مانا ئەمریکا ل سووریێ وەربگرن
ئه‌ڤرۆ نيوز:
مامۆستایەکێ زانکۆیێ دیار دکەت کو مانا ھێزێن ئەمریکا ل سووریێ و ناکۆکیێن ئیرانێ و ئەمریکا د بەرژەوەندیا کوردێن رۆژئاڤایێ کوردستانێ دایە و دڤێت کورد مفایی ژ مانا ھێزێن ئەمریکا ل سووریێ وەربگرن و پێدڤیە کورد سیاسەتا ھەڤسەنگیێ ل گەل ئەمریکا و روسیا برێڤە ببەن و خوە نەکەنە دوژمنێ روسیا ژی.
حسێن فەتاحی مامۆستایێ زانکۆیێ بۆ رۆژناما ئەڤرۆ دیار کر کو نھا کوردێن رۆژئاڤایێ کوردستانێ پێدڤی ب پشتەڤانیا ئەمریکا نە، چاوا پشتەڤانیا ئەمریکا بۆ ھەرێما کوردستانێ پشتی سالێن ١٩٩١ بۆ ئەگەرێ ھندێ کو پێگەھێ ھەرێما کوردستانێ بھێز کەڤیت نھا دڤێت کوردێن رۆژئاڤا ژی ھەمان سیاسەتێ برێڤە ببەن و پشتەڤانیا ئەمریکا بدەستڤە بینن و گۆت: (ئاشکرایە کورد ل رۆژئاڤایێ کوردستانێ د لاوازن و پێدڤی ب پشتەڤانیا ھێزێن جیھانی نە، ب تایبەتی ژی ئەمریکا، ژ بەر ناکۆکیێن ئەمریکا یێن ل گەل ئیرانێ و تورکیا، ئەمریکا جارێ ناخوازیت رۆژئاڤایێ کوردستانێ چۆل بکەت، ئانکۆ مرۆڤ دشێت بێژیت بەرژەوەندیێن ھەڤپشک د ناڤبەرا رۆژئاڤایێ کوردستانێ و ئەمریکا دا ھەنە و دڤێت کورد ژی مفایەکا باش ژ ڤێ یەکێ وەربگرن).
ناڤھاتی ئەو یەک ژی دیار کر کو راستە روسیا د بابەتێ عەفرینێ دا خیانەت ل کوردان کر و رێ بۆ تورکیا خوەش کر دا عەفرینێ داگیر بکەت، لێ نابیت کوردێن رۆژئاڤا نھا روسیا وەکو دوژمنێ خوە ببینن، سیاسەت وەسا ناھێتە کرن، دڤێت کورد فێر ببن کو ل گۆر راستیا سیاسی یا ھەرێمێ و جیھانێ سیاسەتێ بکەن، پشتەڤانیا روسیا بۆ مافێن کوردان ل رۆژئاڤایێ کوردستانێ گرنگە و ئەز ھێڤیدارم کورد بشێن وەسا بکەن کو ھەکە روسیا پشتەڤانیا کوردان ژی نەکر دوژمناتیا وان نەکەت و گۆت: (مەرجێن نھا یێن جیھانی و ھەرێمی بۆ رۆژئاڤایێ کوردستانێ باشن، ئەمریکا وەسا زوو رێ نادەت کو تورکیا گەلەک زێدەگاڤیان ل رۆژئاڤایێ کوردستانێ بکەت، ئەو یەک بۆ کوردان باشە و ھەتا ھێزێن ئەمریکا ل رۆژئاڤایێ کوردستانێ بمینن دڤێت کورد ژی بزاڤێ بکەن کو پێگەھێ خوە یێ سیاسی، ئابووری و سەربازی بھێز بکەن و دەم یێ ھاتی کو ناکۆکیێن خوە ژی نھا بدەنە رەخەکێ).
ئەو یەک د دەمەکێ دایە کو بەری نھا وەزارەتا دەرڤە یا ئەمریکا دیار کربوو جارێ چو بەرنامێ ئەمریکا بۆ ھندێ نینە کو ھێزێن خوە ژ سووریێ ڤەکێشیت و ھەتا ھێزێن ئیرانێ ل سووریێ بن دێ ئەمریکا ژی ل وێرێ مینیت، ھەروەسا ئالۆزیێن ل ئدلبێ و ناکۆکیێن د ناڤبەرا ئەمریکا و تورکیا دا وەسا کرینە کو ئەمریکا بۆ پاراستنا بەرژەوەندیێن خوە ل سووریێ بمینیت.
ل ئالیێ دی نۆم چۆمسکی زانایێ ناڤدارێ ئەمریکی ژی ھەفتیا بۆری راگەھاند کو دڤێت ئەمریکا بۆ پاراستنا کوردان ل سووریێ بمینیت، چونکو کوردان شەرەک مەزن ل دژی داعشێ کر و گەلەک لاوێن کورد بوونە قوربانی و کوردان شیا داعشێ ژناڤ ببەن، نھا ژی کورد ل ھەمبەر ھێرشێن تورکیا و یێن رژێما سووریێ پێدڤی ب پشتەڤانیا ئەمریکا نە و نابیت ئەمریکا نھا سووریێ چۆل بکەت و گۆت: (ئەو دەڤەرێن نھا ل ژێر کۆنترۆلا کوردان دڤێت ژ ئالیێ ئەمریکا ڤە بھێنە پاراستن و دڤێت ئەمریکا رێ نەدەت تورکیا یان ھەر ئالیەکێ دی ھێرشی دەڤەرێن کوردی ل سووریێ بکەت، ھەکە ئەمریکا خوەدان ژ کوردان دەرکەڤیت و وان بپارێزیت ئەو یەک بۆ ئەمریکا ژی دێ گرنگ بیت، چونکو ئەمریکا پێدڤی ب ھەڤپەیمانێن نوو یە و کورد ژی رۆژ ب رۆژێ ل عیراقێ و سووریێ بھێز دکەڤن و ھەکە ئەمریکا کوردان ب تنێ نەھێلیت کورد دشێن ببنە ھەڤپەیمانێ ھەری راست و باش بۆ ئەمریکا).
زانایێ ئەمریکا ئەو یەک ژی دیار کر کو ھەبوونا ھەرێمەکا کوردی ل سووریێ دشێت رێ بۆ ئەمریکا خوەش بکەت دا کو بەرژەوەندیێن خوە ل سووریێ و دەڤەرێ باشتر بپارێزیت و ھەکە کورد لاواز بن ھێزێن دی یێن وەکو تورکیا، ئیرانێ و رژێما سووریێ دشێن ئالۆزیێن مەزن بۆ ئەمریکا دروست بکەن، ژ بەر ھندێ ژی جارەکا دی دبێژم گرنگە ئەمریکا کوردان بپارێزیت و وان ب تنێ نەھێلیت.
