پێشانگەھا 12 یا جۆرێن تری و ھنگڤینی ل دھۆکێ دێ ھێتە ڤەکرن
ئەڤرۆ نيوز:
ل ژێر درووشمێ (بەلێ بۆ دەستکەفتێن زێدەتر بۆ کوردستانێ) و ب چاڤدێریا (فەرھاد ئەمین ئەترووشی) پارێزگەرێ دھۆکێ، رێڤەبەریا گشتی یا چاندنێ ل پارێزگەھا دھۆکێ دێ (پێشانگەھا سالانە یا جۆرێن تری و ھنگڤینی) ل رۆژا 16/9/2018ێ ل دەمژمێر 10:30 سپێدێ ل فاملی مولا دھۆکێ ڤەکەت.
ئەندازیارێ چاندنێ فەرھاد محەمەد تاھر، ژ راگەھاندنا رێڤەبەریا گشتی یا چاندێ ل پارێزگەھا دھۆکێ بۆ رۆژناما ئەڤرۆ دیار کر کو ئەڤە بۆ سالا 12 ێ یە رێڤەبەریا چاندنێ بەردەوام ڤێ پێشانگەھا جۆرێن تری و ھنگڤینی ڤەدکەت و گۆت: “سالانە رێڤەبەریێن باخداری و شرەتکاری و پاراستنا روەکی یێن سەر ب رێڤەبەریا گشتی یا چاندێ ڤە لیژنەکێ بۆ دەستنیشانکرنا وان جۆتیارێن خودان بەرھەمەکێ باش ل پارێزگەھا دھۆکێ پێک دئینن داکو پشکداریێ د ڤێ پێشانگەھێ دا بکەن، بۆ ئەڤ سالە ژی 50 جۆرێن تری دێ د ڤێ پێشانگەھێ دا ھێنە نیشادان و سەرەرایی ڤێ چەندێ 12 ھەنگەڤانێن ھنگڤینێ وان باش ژی دێ پشکداریێ د ڤێ پێشانگەھێ دا کەن کو ئێک ژ وان ھەنگەڤانان ل ھەیاما بۆری مەدالیا زێری ب بەرھەم ئینانا ھنگڤینی ل سەر ئاستێ ئێکەتیا ھەنگەڤانێن وەلاتێن عەرەبی و 10 وەلاتێن رۆژھەلاتێ ئاسیا ب دەست خوە ڤە ئینابوو”.
ناڤھاتی ئاماژە دا وێ چەندێ کو ئەو بەرھەمێن د ڤێ پێشانگەھێ دا دھێنە نیشادان ھەموو یێ سنوورێ پارێزگەھا دھۆکێ یە و ل دووماھیا پێشانگەھێ جۆتیار و ھەنگەڤانێن پشکدار ماف یێ ھەی بەرھەمێن خوە ب فرۆشنە ئامادەبوویان و گۆت: “ئەم بزاڤێ دکەین بازرگان و وەبەرئینەرێن مە خوە ل بەرھەمێ خۆمالی بکەنە خودان و ل سالێن داھاتی بازارکرن د ڤێ پێشانگەھێ دا بھێتەکرن”.
