پێشبینی دکەم ھندەک ئالیێن سیاسی ببنە ئۆپۆزسیۆن
ئه‌ڤرۆ نيوز:
ھێمن ھەورامی ئەندامێ جڤاتا سەرکرداتیا پارتی دیموکراتی کوردستان د ھەڤدیتنەکا تایبەت دا بۆ روژناما ئەڤرۆ، روناھێ خستە سەر رەوشا ھەرێما کوردستانێ ب تایبەتی و عیراقێ ب گشتی ھەلبژاردنێن 30 ئیلونا پەرلەمانێ کوردستانێ.
ئەڤرۆ: پارتی دیموکراتی کوردستان پێشبینیا زێدەکرنا کورسیێن پەرلەمانێ کوردستانێ دکەت؟
ھێمن ھەورامی: ب ھیڤی نە و مە بەرنامە ھەیە بۆ وێ چەندێ رێژەکا باشتریا دەنگان ب دەستڤە بینین و کورسیەکان زێدەتر بینین، ژ بەر کو پارتی دیموکراتی کوردستان ب ئەزمۆن دەرکەفت ھەتا پارتی یا ب ھێز بیت، کوردستان ئارامترە پاراستی ترە لەورا مەدڤێت ئەو شاشیێن بەرێ نوکە مە ھەی چارە بکەین، و ئەو سوزێن ل دەمێ ھەوا ھەلبژارتنان ب خەلکی دھێنە دان پشکەک ھاتیە بجە کرن و پشکەک مایە، ڤێ گەرێ دێ بزاڤا کەین ل ھەوا ھەلبژارتنان ل شێوازێ کاندید و شێوازێ ھەوا ھەلبژارتنان ژلایێ رێکخستنێ ژی ڤە ل سەر ئاستێ بنگەھا و رێکخراو ناوچەیا و لقا ل سەر رێزبەندیێ و لیستا دەنگدەران بەرنامەکێ باشتر و رێکتر مە ھەبیت، مفایێ ژ ئەزمۆن و کێماسیا بینین یێن کو ل ھەلبژارتنێن 12 ێ ئایارێ بۆ جڤاتا نوونەرێن عیراقێ ھاتیە کرن وەرگرین، دەنگدەرێ مە زورە لەوڕا دێ بزاڤا کەین زورترین دەنگان ب دەست ڤەبینین وەک پارتی دیموکراتی کوردستان.
ئەڤرۆ: ئەگەر پارتی زورترین کورسی ب دەست ڤەئینان دێ جارەکا دی پۆستا بەخشیتە لایەنێن دی؟
ھێمن ھەورامی: ل کوردستانێ ھێشتا ئەو قۆناغ نەھاتیە پارتەکا سیاسی ب تنێ حوکمڕانیێ بکەت، ژلایێ دەنگان و پێگەھێ سیاسی رەوشا کوردستانێ و ئیدارا کوردستانێ ب پارتەکا سیاسی بتنێ ناھێتە کرن،ئەزمۆنا حوکمەتا بنکە فرەھـ ل کوردستانێ ئەزمۆنەکا سەرکەفتی نەبۆ لەوڕا پێدڤیە حوکمەتەکا ھاڤپەیمانی بیت، پێدڤیە ھەڤپەیمان چەوا ل حکومەتێ پشکدارە وەسا ژی ل پەرلەمانی ھەڤپەیمان بیت، نابیت لایەنەک ھەڤپەیمان بیت وەزیر ھەبن و ل پەرلەمانی پەرلەمانتار دژ حکومەتێ بیت مە ئەڤ ئەزمونە لبەر چاڤگرتیە لەورا ھیڤی دکەین پشتی ھەلبژارتنان ئەو لایەنێن کو حوکمەتێ ل گەل پێک دئینین ل سەر ڤان بنەمایا بیت پشکداریا لایەنەکێ ل حوکمەتێ دڤێت ھەڤکاری و ھەڤپەیمانیا پەرلەمانی ژی ھەبیت.
ئەڤرۆ: پارتی پێشبینی دکەت خولا نوویا پەرلەمانێ کوردستانێ ئۆپۆزسیۆن ھەبیت؟
ھێمن ھەورامی: ئۆپوزوسیون ل ناڤ سسیستەمێ سیاسی د بەرژەوەندیا سیستەمی دا یە نەک زەرەر ھەبوونا ئۆپۆزسیۆنا پەرلەمانی و حکومەتێ بۆ ژیانا دیموکراسی و ئەکتیڤی بۆ وێ چەندێ ئەوێن ل حۆکمڕانیێ و ئۆپۆزسیۆنێ ململانیێەک ھەبیت، بۆ وێ چەندێ بەرنامەکێ باشتر ھەبیت، چاڤدێریەکا باشترا کارێن حوکمەتێ بھێت کرن،پێشبینی دکەم ل ھەلبژاردنێن 30 ێ ئیلونێ ھندەک پارتێن سیاسی ببنە ئۆپۆزوسیون، ھەبوونا ئۆپۆزسیۆنێ ب کارەکێ باش دزانین بۆ پرۆسا دیموکراسیێ.
ئەڤرۆ: ب کابینا نوویا حکومەتێ و پەرلەمانێ کوردستانێ دێ رەوشا ئابۆری و قەیران باشتر بن؟
ھێمن ھەورامی: مەبەستا پارتی دیموکراتی کوردستان ل چوار سالێن خولا پەرلەمانی و سەرەرای کو ھێشتا بەرنامێ پارتی بۆ ڤێ خولێ ب تەمامی نەھاتیە راگەھاندن، بەلێ ھێلێن گشتی دێ ل سەر بنەمایێ قانونێ ل پەرلەمانێ کوردستانێ ھژمارەکا قانونان ھەنە پێدڤی ب گوھۆڕینەکێ ھەیە، بۆ وێ چەندێ پشکەکا قەیرانان ل کوردستانآ بھێنە چارەرکرن و نەمینن، و رێژا بێکاریێ مە پێدڤی ب دامەزراندنێ ھەیە، نەشێین جارێ بڕیارێ و سوزێ بدەین، بەلێ مە پێدڤی ب ھندەک قانونان ھەیە بۆ باشتر کرنا دەلیڤێن کاری بۆ کێمکرنا رێژا بێکاریێ، ھەکە ل گەل حکومەتا عیراقێ بگەھین ئەنجامێن باشترە ژ بابەتێ ھەلبژارتنان پێکئینانا حکومەتا نوویا عیراقێ، بۆدجەیێ ھەرێما کوردستانێ دابینکەینەڤە رەوشا ئابۆریا کوردستانآ دێ باشتر بیت، دشێت پشکەکا قەیرانێن دارایی چارە بکەین.
ئەڤرۆ: پەیوەندیێن پارتی و لایەنێن سیاسی چەوا تایبەت گۆڕان دبینن گۆڕان ب بیتەڤە ئۆپۆزسیۆن؟
ھێمن ھەورامی: پارتی ھەردەم دخوازیت پەیوەندیەکا ئاشتیانەو ئاسایی ل گەل ھەموو لایەنێن سیاسی ھەبیت، ل گەل گۆڕانێ ژی دووماھیک جار ئەم پارتێن کوردستانێ ینە و سیاسیێن ڤی وەلاتینە، نابیت ل سەر بنەمایێ کەرب و کینێ و مێژویێ یان ھەر کارەک بۆ من باشبیت بۆ لایەنەکێ دی خراب بیت سەرەدەریێ ل گەل ئێک بکەین، پارتی دێ کاغەزەکا سپی ل گەل ھەموو لایەنا ڤەکەت، پشتی ھەلبژارتنێن چاڤەرێ کریێن 30 ێَ ئیلونێ کو ل چارچۆڤێ گرنگی دانە ب ئارامیی بۆ کوردستانێ بۆ ڤێ مەبەستێ پێدڤیە لایەنێن سیاسی پەیوەندیەکا ئاسایی ھەبیت، پێدڤیە مە بۆچونێن جودا ل سەر بوارێ سیاسی و ئابۆری ئەنجامدانا زورترین خزمەتگوزاریا و چاڤدێریکرنا دەسھەلاتا جێبەجێکار ھەبیت، بۆ ب ھێز کرنا دەسھەلاتێن دی نابیت ئەم کارێن ئێک یێن باش قبوول نەکەین، ھێشتا زوویە بەلێ پێشبینی دھێتە کرن ھندەک لایەنێن سیاسی ل کوردستانێ ل خولا نۆویا پەرلەمانێ کوردستانێ ببن ئۆپۆزسیون.
ئەڤرۆ: لێک نزێک بۆنا پارتی و ئێکەتی چۆ پێنگاڤ ھاڤێتینە و پوستێ سەروک کومار بۆ کێە ل کوردا؟
ھێمن ھەورامی : عیراق ب گشتی پشتی ھەلبژارتنێن 12 ێ ئایارێ جورەکە کو شیعە ب تنێ نەشێن ھەڤپەیمانەیەکا مەزنا شیعی دروستبکەن و سەروک وەزیرەکێ دانن، ھێزێن سونە ژی پارچە چارچەنە و پارتی ژی وەک پارتەکا سیاسی مەزنترین پارتە ل ناڤ جڤاتا نوونەرێن عیراقێ، ھەر حوکمەتەکا ل بەغدا دروست بیت نەشێن بێی کوردان دروست بکەن، و ل ناڤا کوردان ژی دا بێی پارتی چۆ حوکمەتەک ل بەغدا ناھێنە پێکئینان،بەرنامێ پارتی بەرنامەکێ نیشتیمانیە بۆ دەستڤەئینانا مافێن کوردان یێن ئێکەتی ژی ئەڤە خالێن ھەڤپشکن دەرگەھێ پارتی وئێکەتی بۆ لایەنێن دی ژی ڤەکریە، داکو وی بەرنامێ نیشتیمانی دەولەمەند تر بکەن، ھەتا کو ب بیتە بەرنامەکێ گشتیێ کوردستانێ ل بەغدا، بۆ دانوستاندنێ ل گەل ھێزو لایەنێن عیراقێ ل چارچۆڤێ پێکئینانا حوکمەتا نوویا عیراقێ دەرگەھێ پارتی بۆ ڤێ پرسێ ڤەکریە، بزاڤا دکەین بۆ دروستکرنا تەوافقەکا سیاسی ل عیراقێ پرسا وەرگرتنا پۆستا ژلایێ پارتی ڤە ل رێزا دوێ دھێت ژ بەر کو ژلایێ مەڤە رێزا ئێکێ بەرنامێ حوکمەتێ یە کا چەوا بھێتە دروستکرن و بنەجھکرن،دووڤدا پۆست دھێن مە دڤێت پوستێ سەرۆک کۆمار و سەروک وەزیران و سەرۆک پەرلەمان ئێک پاکیج بیت، پوستێ سەرۆک کۆمارێ عیراقێ بۆ پارتیە ژبەر سێ ئەگەرا رێژا دەنگ و کورسیێن پارتی، مام جەلال ل ناڤ ئێکەتی نەمایە ھەتا پارتی پشتەڤانیێ لێ بکەت، بەربژار بۆ سەروک کۆماریێ ھەبیت، ھندەک لایەنێن شیعی و سنونی ل گەل وێ چەندێ دانە کو پۆستێ سەرۆک کۆمار بۆ پارتی بیت، ل گەل ھندەک لایەنێن ھەرێمی و نێڤدەولەتی کو پۆستێ سەروک کۆمار بۆ پارتی بیت.
ئەڤرۆ: پارتی وەک ئێکەما سەر ئاستێ عیراقێ چۆ مەرج ھەنە بۆ پێکئینانا حوکمەتا نوویا عیراقێ ؟
ھێمن ھەورامی: مەرجێ سەرەکیێ پارتی بۆ پێک ئینانا حوکمەتا نوویا عیراقێ ھەڤپشکا راستەقینە و ھەڤسەنگیا راستەقینە و ل گەل سازانەکا تەمام ل ناڤ جڤاتا نوونەرێن عیراقێ ھەبیت، مەدڤێت مەرجێ مەیێ سەرەکی بۆ بەغدا ئەڤ سێ خالەبن ھەڤپشکی و ھەڤسەنگی و سازان، ڤان سێ خالا گەلەک ھوور کار ل گەل بھێتەکرن وەک ب کار نەئینانا قانونێ دژی کوردان،بنەجھکرنا دستوری وەک چەوا ھاتیە ل گەل ماددێ 140 و ل گەل ھژمارەکا ھوور کاریێن دی کو نوکە پارتی و ئێکەتی کار ل سەر دکەن.
ئەڤرۆ: بۆچی رێژا زورا بەربژارێن پارتی بۆ پەرلەمانێ کوردستانێ گەنجن مەبەست چیە ؟
ھێمن ھەورامی: دیموگرافیا کوردستانێ ھاتیە گوھۆڕین نوکە رێژا پترا دەنگدەران ل کوردستانێ گەنجن و لاون ب رامانا بایولوجی و فکری دەنگدەرێَ گەنج زورن ل کوردستانێ، خەلکی سەرو چاڤ وبەرنامە و سیاسیێ نوو دڤێت ل ھەر ژیەکێ بیت جودا جودا بیت پارتی بزاڤ کرینە ل گوری رێژا دەنگدەریا گەنجان کار بکەت، و پەیامەک ژی ھەبیت کو پارتی شیانێن خو نەکرنەڤێ و بەردەوامیی دانێ ب خوە ھەیە ل گەل وان بسپوریێن کو ھەنە بۆمە ل ھەر 100 بەربژاران ھەر ئێکێ دەنگان ب دەست ڤەبینیت جوداھی نینە گرنک سەرکەفتا لیستێ یە.