پێشكێشكرنا قەهوێ نیشانا رێز و خزمەتێ یە
دلڤین رەشید
خلمەتكار (مەروان عەلاوی) د دیدارەكێ دا بۆ رۆژنامەیەیا ئەڤرۆ دیار كر كو ئەو خزمەتكارەكێ دیارێ پەرستگەها لالشێ یە، ب تایبەت ژی دناڤ رێ و رەسمێن پیرۆزێن ئێزدیان دا و رۆلەكێ كارا و تایبەت هەیە ب چێكرنا قەهوێ دا، چونكو بێهنا پیرۆزیا لالشێ و چێكرنا قەهوێ د كەلتوورێ رۆژهەلاتا ناڤەراست دا ب تایبەت دناڤ جڤاكێ ئێزدی دا هێمایەكێ مەزن و پیرۆزە ب تایبەت ژی ژبۆ مێهڤانان، ژبەركو پشكەكە ژ دابونەریتێن كەڤنێن ئێزدیان.
ناڤهاتی گۆت : چێكرنا قەهوێ ب تایبەت ژی دناڤ گەڕا تاوسێ دا هونەر و دلسۆزی دڤێت دەمێ خەلك دهێن بۆ زیارەتا تاوسی و وەڤدێ پیرۆز، پێشكێشكرنا فنجانەكا قەهوێ نیشانا رێز و خزمەتێ یە، ئەز هەرەم بزاڤێ دكەم ئاگر و دەستكەفتێن قەهوێ ب ئاوایەكێ وەسا بەرهەڤ بكەم كو ب بێهنا رەسەناتی و پیرۆزیا لالشێ ژێ بهێت و دەمێ قەوال دەڤ و شەبابا لێددەن و قەولێن پیرۆز دبێژن، تشتەك دناڤ دلێن مرۆڤی دا دگوهۆڕیت ئەو دەنگە ئارامیێ ددەتە گیانێ مرۆڤی خزمەتكرنا ڤان كەسان و بزاڤكرن بۆ پاراستنا ڤان نەریتان مەزنترین شانازیە د ژیانا من دا و پەیاما من بۆ گەنجێن مە ئەوە كو رێزێ ل كەلتوور و ئۆلا خۆ بگرن.
