پێشمه‌رگه‌يى ل دو ميحوه‌رێن سكرێ مووسل هێرش كره سه‌ر داعش
ئه‌ڤرۆ نيوز، بارزان مزوورى:
پشتى شڤێدى ژ لايێ هێزێن هه‌ڤپه‌يمانان ڤه جهێن وان هاتينه تۆپبارانكرن، ئه‌ڤرۆ سپێدێ ل ده‌مژمێرێ 7:00 هێزێن پێشمه‌رگه‌يى ل سكرێ مووسل هێرش ژ لايێ رۆژهه‌لات و رۆژئاڤايێ سكرى ڤه كره سه‌ر چه‌كدارێن داعش.
ژێده‌ره‌كى ژ هێزێن پێشمه‌رگه‌يى كو ئه‌ڤرۆ نيوز پاراستن ل سه‌ر ناڤێ وى كريه گۆت: “شڤێدى هێزێن هه‌ڤپه‌يمانان ب چرى جهێن داعش تۆپباران كرن و هژماره‌كا زۆر ژ چه‌كدارێن وان كوشتن كو ل دووڤ ئه‌و زانياريێن مه هه‌ين زێده‌ترى 30 كه‌سانه”.
زێده‌تر گۆت: “هه‌ر ئه‌ڤرۆ سپێدێ هێزێن پێشمه‌رگه‌يى هێرش كره سه‌ر وان ده‌ڤه‌ران و شيان گوندێ كه‌رج دا يێ گرێدايى ده‌ڤه‌را وانكێ ب ته‌مامى كۆنترۆل بكه‌ن”.
ئاماژه ب وێ چه‌ندێ ژى كر كو گۆندێ جه‌مردو ژى هاتيه وه‌رگرتن و هه‌ردو گوندێن شيحيه و تل زه‌هه‌ب هاتينه گه‌مارۆ دان و گۆت: “د ڤان پێشڤه‌چوونێن پێشمه‌رگه‌يى دا شياينه سێ هه‌مه‌رێن داعش ده‌سته‌سه‌ر بكه‌ن د ناڤبه‌را وانكێ و گۆندێ دێر دا”.
