پێشمه‌رگه.. ره‌وشت و هێز
وه‌لاتێ مه ئه‌ڤێ دبێژنێ كوردستان ئه‌ڤه ب سه‌دان ساله كه‌فتیه به‌ر هێزێن دوژمنان و هه‌ر جار ل ژێر ناڤه‌كی و ل بن دوورشمه‌كی، ئه‌ڤجا چ په‌رده‌یا نه‌ته‌وه‌په‌رێسیێ بیت یان ژی بكارئینانا ئاینه‌كێ پیرۆزبیت، بۆ بجهئینانا به‌رژه‌وه‌ندیێن خوه یێن ژه‌نگاوی ودوور ژ هه‌می بنه‌مایێن مرۆڤاتیێ، سه‌ره‌رای ئه‌ڤێ چه‌ندێ ژی گه‌لێ كوردستانێ ب باوه‌ری ب دۆزا ره‌وایا خوه ب هه‌بوونا پێشمه‌رگێ قه‌هره‌مان جانگوریێ رۆژێن گران خوه ل به‌ر ڤان هێرش و پیلانان كریه قه‌لغانه‌كا پویلایی و چو جاره‌كێ ژی راده‌ستی سته‌م و زۆرداریا چ لایه‌نان نه‌بۆیه مرۆڤاتیا خوه بۆ هه‌می جیهانێ سه‌لماندیه ب رۆمه‌تا پێشمه‌رگێ قه‌هره‌مان. پێشمه‌رگه ل هه‌می شۆره‌شێن كوردستانی چو ل ده‌سپێكا سه‌دێ بیستێ بیت یا د شۆره‌شێن ئیلۆن وگولانان دا بیت یان ژی د هه‌ردو سه‌رهلدانیێن گه‌لێ كورد دا ل سالێن 1991-2003 دا و یان ژی ل جه‌نگان د گه‌ل تیرۆرێ دا بیت یان ئه‌ڤه ده‌مه‌كه ب سه‌ر گه‌لێ كوردستانێ دا هاتی ب هێزه‌كا مه‌زن به‌رگری ژ ئاخا كوردستانێ كریه و ره‌وشتێ خوه بلند پاراستیه و ژ یاسا و رێنمایێن جه‌نگێ ده‌رنه‌كه‌فتیه و هه‌رده‌م پابه‌ند بوویه ب ڤان رێسه‌یان و ئامۆژكاریێن سه‌ركرداتیا گه‌لێ كوردستانێ، به‌لكو به‌روڤاژی ڤێ چه‌ندێ ره‌وشتێ پێشمه‌رگه‌ی یێ پاك و بژین و پڕی مرۆڤاتیی و مێرخاسیا وان بوویه جهێ حێبه‌تیا هه‌می جیهانێ‌َ و خه‌لك ل سه‌رانسه‌ری هه‌می كنارێن ئه‌ردی سه‌رسورمان كریه ب ڤی ره‌وشتی و ئه‌ڤێ هێزا گران، ئه‌ڤێ جارێ ژی قه‌هره‌مانێن وه‌لاتێ مه و قوتابێن فێرگه‌ها مرۆڤاتیێ سه‌لماندیه كو تاكه هێزه دكاریت ب گیانێ خوه رووبه‌روی درنده‌ترین هێزا تیرۆرێ ببیت ل سه‌رانسه‌ری جیهانێ و د ڤی جه‌نگێ دا ب سه‌ربلندی ڤه دبێژین كو پێشمه‌رگێ كوردستانێ ره‌وشتێ خوه یێ جوان پاراستیه و هیزا خوه نیشا هه‌می جیهانێ دایه، سه‌ره‌رای ئه‌وێ چه‌ندێ كو دوژمنێن مرۆڤاتیێ ئارمانجا خوه د جه‌نگا د گه‌ل پێشمه‌رگه‌ی دا كریه ره‌ڤاندنا كه‌سێن سڤیل مینا زارۆ و ئافره‌تان وسه‌ربرینا كه‌سێن بێ تاوان و ئه‌نجامدانا درنده‌ترین تاوان كو سه‌رپێچی هه‌می بنه‌مایێن ئاینی و رێسایێن یاسایێن نیڤده‌وله‌تی و ناڤخوه‌ینه، به‌رانبه‌ری ڤێ چه‌ندێ پێشمه‌رگه ب هه‌بوونا هیزا خوه یا بلند راده‌ستی كریارێن نه جوان نه‌بوویه و سه‌ره‌رای دژواریا دوژمنان سامانێ خه‌لكی پاراستیه و ره‌فتاێن مرۆڤاتیی ل دووڤ بنه‌مایێن ئاینی و رێكه‌فتنامه‌یێن نێڤده‌وله‌تی ل گه‌ل دیلێن د جه‌نگێ دا دهێنه ده‌سته‌سه‌ركرن و جهێن ئاینی و مولكێ گشتی پاراستینه و هه‌رده‌م هه‌ڤالێن ژینگه‌هێ بووینه. ئه‌ڤه بوو ئه‌گه‌را هندێ كو ئێدی جیهان خوه بێده‌نگ نه‌كه‌ت و راستا بلندیا ره‌وشت و هیزا پێشمه‌رگه‌ی ل به‌رچاڤ ببینیت و خوه ل ڤێ كیشا گران بكه‌نه خوان یا كو ب سه‌ر گه‌لێ كوردستانێ دا هاتی، گه‌لێ مه ب هه‌بوونا پێشمه‌رگه‌ی سه‌رفه‌راز دێ مینیت .
