مەسرور بارزانی و بالیۆزێ ڕووسیایێ دووماهی پێشهاتێن دەڤەرێ گەنگەشە كرن
مەسرور بارزانی، سەرۆكێ حوكمەتا هەرێما كوردستانێ، پێشوازی ل ئیلبروس كوتراشیڤ، بالیۆزێ ڕووسیایێ ل ئیراقێ كر، ب هەلكەفتا ب دووماهیهاتنا ئەركێ وی یێ دیپلۆماسی ل ئیراقێ.
د دیدارێ دا، سەرۆكێ حوكمەتا هەرێمێ سوپاسییا بالیۆزی كر بۆ كاركرنا وی ل پێناڤی پێشڤەبرنا پەیوەندییان ل گەل هەرێما كوردستانێ، هیڤییا سەركەفتنێ ژی د ئەركێ وی یێ داهاتی دا بۆ خواست.
هەردو ئالییان دوپاتی ل سەر گرنگییا پێشڤەبرنا پەیوەندیێن هەرێما كوردستانێ و ڕووسیایێ كرن.
بالیۆزێ ڕووسیایێ، سوپاسییا هاریكاری و هەماهەنگییا حوكمەتا هەرێما كوردستانێ بۆ سەرئێخستنا ئەركێ وی كر و داخوازا وەلاتێ خوە ژی بۆ بهێزكرنا پەیوەندیێن دوقۆلی نیشا دا.
د تەوەرەكێ دی یێ دیدارێ دا كو ماكسیم ڕوبین، قونسلێ گشتی یێ ڕووسیایێ ل هەرێما كوردستانێ بەرهەڤ بوو، دووماهی پێشهات و گۆهۆڕینێن ڕەوشا گشتی یا ئیراقێ و دەڤەرێ هاتنە گەنگەشەكرن.
