پێشنیارەك بۆ ئێكەتییا نڤیسەران

پێشنیارەك بۆ ئێكەتییا نڤیسەران

33

سەیفوللا موحەمەد

ئەز نزانم و من پسیار ژی نە كرییە، كا ئەندامێن ئێكەتییا نڤیسەران ل دهوكێ چەندن، چونكە من هەوجەیی ب هەژمارێ نەبوویە، لێ وەكو دیار و دهێتە دیتن، هژمارەكا نە كێمن ژ هەر جۆرە نڤیسەرەكی، ژ هەردو ڕەگەزان، چ هەلبەستڤان و چیڕوكنڤێس بن، چ زمانزان و تۆڕەڤان و مێژوونڤێس و هەر بیاڤكێ دی یێ نڤێسینێ بن، ژ بلی گەلەك نڤیسەرێن خودان بەرهەم و هێشتا شانسێ ئەندامەتییێ بۆ چێ نەبووی، كو چەندین سالە دەرگەهێ وەرگرتنێ بۆ نە هاتی ڤەكرن و ل پشت دەرگەهی چاڤەڕێ ماین.
چ پێ نەڤێت، نڤیسەر پێشەنگن دناڤ جڤاكیدا و گەنجینە و سامانەكێ مەزنێن مللەتینە، ب بەرهەم و كەدا خوە یا پڕ بها كارتێكرنەكا ئەرینی ل سەر پێشكەفتنا جڤاكی هەیە، لێ دڤێت بێتە زانین، گەلەك ژ ڤان خامەزێڕان ژییەكی درێژ برینە سەر و ئەزموونەكا دویر و درێژ دگەل نڤێسینێ یێن هەین، هەرچەندە خاترخواستن ژ ڤێ جیهانێ نە د ژییێ كورت و درێژ دایە و كەس نزانت دێ كەنگێ ژیانا وی ب دوماهی هێت، هیڤییا ژی درێژییێ بۆ هەمییان دخوازین، لێ گەلەك نڤیسەرێن مە یێن گەهشتیە مەزن و ژئالیێ‌ جەستەییڤە لاواز و بێ شیان بوونە.
نا خوازم زێدەتر درێژ كەم، كاكلكا بابەتی یا من ڤیای بێژم، وەكو پێشنیار بۆ ئێكەتییا نڤیسەران، هێشتا ل ساخی و سلامەتییا ڤان نڤیسەران، ڕابن ب ئەرشیفكرنا ژیاننامە و بەرهەم و بزاڤێن ئێك ئێكە یێن ڤان نڤیسەران د دیدار و چاڤپێكەفتنێن ڕاستەوخۆدا و بێنە وێنە و ڤیدیو كرن و د ئەرشیفێ ئێكەتییێدا بێنە كۆمكرن و پاراستن. نە دویرە ل هەر دەمەكی هەلشكافتن ل سەر بەرهەمێن وان بێنە كرن، یان بكەڤنە د تەرازییا رەخەنەگراندا و ڤەكولینێن دویر و درێژ ژ ئالیێ‌ فێرخوازێن زانكۆیان ل سەر بهێنە كرن، هینگێ دێ ب ساناهی بیت و پێدڤی لێگەران و ەمتك مەزن نابن.
ب دیتنا من، ئەگەر ئەڤە ژ ئالیێ‌ ئێكەتییا نڤیسەرانڤە بێتە كرن، دێ كارەكی گەلەك پیرۆز بیت و بهایەكی مەزن دەتە نڤیسەری و ئەرشیفەكی مەزن لدەف خوە پەیدا كەت، كو سەدان سالێن دی شانازی ب ڤێ كەدا وان بێتە كرن