پێكئینانا حوكمەتا نوو دێ گەشەكرنا ئابووری پێشڤەبەت و خۆڕاگرییا هەرێما كوردستانێ ب هێزتر كەت
ب هەلكەفتا سەركەفتنا هەلبژارتنێن خولا شەشێ یا پەرلەمانێ كوردستانێ، بالیۆزا ئەمریكا ل ئیراقێ، پیرۆزباهی ل خەلكێ كوردستانێ و حزبێن سیاسی كر.
ئەلینا رۆمانوسكی، بالیۆزا ئەمریكا ل ئیراقێ، د بەیاننامەیەكێدا، ب هەلكەفتا سەركەفتنا هەلبژارتنێن خولا شەشێ یا پەرلەمانێ كوردستانێ، پیرۆزباهی ل خەلكێ كوردستانێ و پارتێن سیاسی كر و دیاركر:كارمەندێن هناردەیێن ئەمریكا ل ئیراقێ، چاڤدێرییا دەنگدانێ ل بنگەهێن دەنگدانێ ل سەرانسەری هەرێما كوردستانێ دكر، هەڤدەم دەستخوەشی ل خەلكێ هەرێما كوردستانێ كر بۆ پێگیربوونا وان ب پڕۆسەیا دیموكراسی.
ئەلینا رۆمانوسكی ئاماژە ب وێ چەندێ كر، كۆمسیۆنا بلند یا سەربخوە یا هەلبژارتنان ل ئیراقێ ئاماژە ب هەبوونا ئاستەنگان ل پێشبەری خواندنا پەنجەمۆرێ ل دەمێ ئەنجامدانا هەلبژارتنان كر و گۆت» داخوازێ ژ كۆمسیۆنێ دكەین وێ پرسێ بەری هەلبژارتنێن جڤاتا نوونەرێن ئیراقێ ل سالا 2025 چارەسەر بكەت».
بالیۆزا ئەمریكا ل ئیراقێ ئاماژەكر ژی» دخوازین حوكمەتا نوو یا هەرێما كوردستانێ بێی گیرۆبوون بهێتە پێكئینان، پێكئینانا حوكمەتا نوو دێ رێكێ بۆ حوكمەتا هەرێمێ خوەش كەت كو دامودەزگەهێن دیموكراسی ب هێز بكەت و مافێن مرۆڤی بەر ب پێشڤە ببەت و گەشەكرنا ئابووری ژی پێشڤەببەت و خۆڕاگرییا هەرێما كوردستانێ ب هێزتر بكەت».
