پێنج ئه‌ندامێن ديار يێن هه‌ڤپه‌يمانيا به‌رهه‌م سالحى ده‌ست ژێ به‌ردا
ئه‌ڤرۆنيوز:
پێنج ئه‌ندامێن ديار دناڤ هه‌ڤپه‌يمانيێ بۆ ديموكراسيێ ودادپه‌روه‌ريێ ده‌ست ژ وێ حزبێ به‌ردا وچه‌ندين ره‌خنه ئاراسته‌ى سه‌رۆكێ وێ هه‌ڤپه‌يمانيێ كرن .
د رۆهنكرنه‌كێ ب ناڤێ پێنج ئه‌ندامێن ديار يێن هه‌ڤپه‌يمانيا به‌رهه‌م سالحى، ئه‌گه‌رێ ده‌ست ژبه‌ردانێ ژ وێ هه‌ڤپه‌يمانيێ دياردكه‌ن وئاماژێ دده‌ن” ئه‌م گه‌هشتينه وێ باوه‌ريێ كو سه‌رۆكێ هه‌ڤپه‌يمانيێ تنێ بۆ بلندكرنا پێگه‌هێ خوه يێ سياسى وئابوورى ئه‌ڤ حزبه دروستكريه بۆ وێ چه‌ندێ تاكو ل گه‌ل لايه‌نێن دى يێن سياسى مامه‌لێ پێ بكه‌ت وب رێ پۆسته‌كێ بلند ب ده‌ست خوه بێخيت”.
دهێته زانين، جڤاتا سه‌ركردايه‌تيا ئێكه‌تى نيشتمانى كوردستان، ئه‌ڤرۆ پێنجشه‌مبى 13/9/2018 د به‌ياننامه‌كێ دا دياركر كو جڤاتا سه‌ركردايه‌تيا ئێكه‌تيێ ل سه‌ر چار ته‌وه‌ران كۆمبوويه كو ئێك ژوان ته‌وه‌ران داخوازا هه‌ڤپه‌يمانى بۆ ديموكراسيێ ودادپه‌روه‌ريێ بۆ ئێكگرتنێ ل گه‌ل ئێكه‌تيێ”.
دياركربوو ژى” ئێكه‌تيێ پێشوازى ل ڤێ ده‌ستپێشخه‌ريا هه‌ڤپه‌يمانيێ كريه وشانده‌ك بۆ دانوستاندنێ بۆ ئێكگرتنێ پێكئينايه”.
ئه‌و پێنج ئه‌ندامێن هه‌ڤپه‌يمانيێ يێن ده‌ست ژێ به‌رداى ئه‌ڤه‌نه:
- رازاو مه‌حمود، ئه‌نداما خۆلا بۆرى يا په‌رله‌مانێ كوردستانێ وئه‌نداما جڤاتا گشتى يا هه‌ڤپه‌يمانيێ.
- گه‌شه دارا، ئه‌نداما په‌رله‌مانێ كوردستانێ.
- جه‌واد سه‌عيد، ئه‌ندامێ جڤاتا گشتى يا هه‌ڤپه‌يمانيێ.
- رێزان عارف، ئه‌نداما جڤاتا گشتى يا هه‌ڤپه‌يمانيێ.
- د. سه‌روه‌ر عه‌بدولره‌حمان، ئه‌ندامێ خۆلا بۆرى يا په‌رله‌مانێ كوردستانێ.
