پێنج ملیۆن دینار ل رەمپا جادا شەھیدێن ئێکی شواتێ ھاتنە مەزاختن
ئەڤرۆ نیۆز، رێوار مزیری:
سەرۆکێ پشکا سەخبیریا پرۆژان ل سەرۆکاتیا باژێرڤانیا دھۆکێ و د ھەمان دەم دا سەرۆکێ لیژنا ھاتنوچوونا دھۆکێ بۆ رۆژناما ئەڤرۆ دیار کر کو پشتی گەلەک داخواز ھاتینەکرن وان رەمپەکا دەربازبوونا وەلاتیان ل جادا شەھیدێن ئێکی شواتێ ل دھۆکێ ل نێزیک پرا کوردستان ب کۆژمێ پێنج ملیۆن دیناران چێکر و گۆت: “ئەڤە رەمپا نەھێ یە ژ ڤی جۆری ل دھۆکێ دھێتە چێکرن”.
ئەندازیار سەلاح سندوری، سەرۆکێ پشکا سەخبیریا پرۆژان ل سەرۆکاتیا باژێرڤانیا دھۆکێ و د ھەمان دەم دا سەرۆکێ لیژنا ھاتنوچوونا دھۆکێ بۆ ئەڤرۆ نیۆز دیار کر کو ئەڤ رەمپە وان ل دووڤ ستاندارتێن جیھانی ب درێژاھیا ٢١ مەتران و فرەھیا شەش مەتران ل جادا شەھیدێن ئێکی شواتێ ل دھۆکێ ل نێزیک پرا کوردستان چێکریە و گۆت: “ئەڤ رەمپە ب شێوەکێ سەردەمانە ب بەری ھاتیە چێکرن و کارێن ب ڤی رەنگی بۆ پارێزگەھا دھۆکێ شانازینە نە بۆ چو کەسان”.