پێنگاڤەكا دی یا گرنگ یا سەرئێخستنا پرۆسەیا ئاشتیێ بوو
سەرۆكێ هەرێما كوردستانێ د پەیامەكێدا پێشوازی ل چەكدانانا 30 گەریلایێن پەكەكێ كر و داكۆكی ل سەرئێخستنا پرۆسەیا ئاشتیێ كر.
دەقێ پەیاما سەرۆكێ هەرێما كوردستانێ:
پێشوازیێ ل پێنگاڤا پارتییا كاركەرێن كوردستانێ (پەكەكە) بۆ چەكدانانێ دكەین كو د رێوڕەسمەكیدا ب بەرهەڤبوونا سەركردایەتییا دەم پارتی و نوونەرێن هەرێما كوردستانێ و هەژمارەكا سیاسەتەمەدار و كەسایەتی و دەزگەهێن راگەهاندنا توركیا، ل هەرێما كوردستانێ ب رێڤەچوو.
ئەڤە پێنگاڤەكا دی یا گرنگ و دلخوەشكەر یا سەرئێخستنا پرۆسەیا ئاشتیێ بوو. د پشتڕاستین ئەڤ پێنگاڤە دێ پرۆسەیا ئاشتیێ بەتە قۆناغەكا نوو و پێنگاڤێن دی دێ د دووڤدا هێن كو پرۆسەیێ ب ئاراستەیەكێ دروستدا دێ بەتە پێش.
هەر ب ڤێ هەلكەفتێ هەموو پێگیریێن خوە ب بەردەوامییا هەر پشتەڤانییەكێ بۆ سەرئێخستنا پرۆسەیا ئاشتیێ دوپات دكەین. ژ پێخەمەت ڤێ چەندێ وەك هەردەم د بەرهەڤین بۆ پێشكێشكرنا هەموو هاریكاری و ئاسانكاریێن پێدڤی و بجهئینانا هەر ئەركەكێ بكەڤیتە سەر ملێن مە.
پرۆسەیا ئاشتیێ د دەمەكیدایە كو دەڤەر ب قۆناغ و رەوشەكا هەستیاردا دەرباز دبیت و ژ هەر ئالییەكی دهێتە خواستن هەموو بزاڤێن خوە ژ پێخەمەت ئاشتیێ بكەن. د ئاشتیێدا ئەم هەموو د سەركەفتی نە و سەركەفتنا ئاشتیێ، خزمەتا توركیا و هەموو دەڤەرێ و هەموو ئالییەكی دكەت.
سوپاس و پێزانین و دەستخوەشییا مە بۆ سەرۆك ئەردۆگان و دەستپێشخەری و پشتەڤانی و بزاڤێن وی بۆ سەرئێخستنا پرۆسەیا ئاشتیێ، دوپات دكەین. هەروەسا ب رێزڤە ل رۆلێ بەرێزان پاخچەلی و ئۆجەلانی و هەموو ئەوان دنێرین كو كار ژ پێخەمەت سەرئێخستنا ئاشتیێ دكەن.
