پەرلەمانتارێن ئەلمانیا دژی سەرەدانا ئەردۆگانی نە
ئەڤرۆ نيوز:
باران مەرەش رۆژنامەڤانێ کورد د داخۆیانیەکێ دا بۆ رۆژناما ئەڤرۆ راگەھاند کو سەرۆک کۆمارێ تورکیا رەجەب تەیب ئەردۆگان دێ رۆژا ٢٧ ڤێ ھەیڤێ سەرەدانا ئەلمانیا کەت و گۆت: (پرانیا سیاسەتمەدار و پەرلەمانتارێن ئەلمانیا ل دژی سەرەدانا ئەردۆگانی نە و رەت دکەن کو ب فەرمی پێشوازیا ئەردۆگانی بکەن و ئەم چاڤەرێ دکەین کو خوەنیشادانێن بەرفرەە ل دژی سەرەدانا ئەردۆگانی بھێنە کرن).
بارانی راگەھاند ژی کو د ڤێ مژارێ دا سەرۆک کۆمارێ ئەلمانیا داخوازەکا فەرمی بۆ پەرلەمانتاران شاندیە دا کو د پێشوازیا ل پەرلەمانی یا کو بۆ ئەردۆگانی بھێتە ساز کرن دا پشکداریێ بکەن و گۆت: (ھەتا نھا ١٤٠ پەرلەمانتاران رەت کرینە کو د پێشوازیا ل پەرلەمانی دا جە بگرن و ئەو یەک بوویە سەدەم کو سەرەدانا ئەردۆگانی بۆ پەرلەمانی ببیتە جھێ گەنگەشێ و ئەز وەسا دبینم کو دێ سەرەدانا ئەردۆگانی یا بۆ پەرلەمانی ھێتە ھلوەشاندن).
بارانی دیار ژی کر کو حوکمەتا ئەلمانیا خوە بەرھەڤ کریە ل گەل ئەردۆگانی بابەتێن وەکو ئازادکرنا وەلاتیێن ئەلمانیا ل تورکیا، پرسا پەنابەرێن سووریێ، رەوشا مافێن مرۆڤی و دیمۆکراسیێ گەنگەشە بکەن و گۆت: (د ڤێ مژارێ دا سەڤیم داگدەلەن ئەنداما پەرلەمانێ ئەلمانیا ژ حوکمەتێ خواست کو چارەکرنا پرسا کوردی و ڤەکێشانا ھێزێن تورکیا ژ عەفرینێ ژی ل گەل ئەردۆگانی بھێتە گەنگەشە کرن، ل دووڤ زانیاریێن ل بەر دەستێ من دێ حوکمەتا ئەلمانیا بۆ ئازادکرنا وەلاتیێن سڤیل یێن ئەلمانی ل تورکیا ئەردۆگانی تەنگاڤ کەت).
ناڤھاتی راگەھاند ژی کو د ھەڤدیتنێن ل گەل بەرپرسێن ئەلمانیا ئەردۆگان دێ داخوازا قەرێ دەمدرێژ کەت و دێ بزاڤێ کەت بازرگانیا د ناڤبەرا ھەردو وەلاتان دا ب پارێ تورکی بھێتە کرن و گۆت: (د ڤێ قۆناغێ دا کو تورکیا د قەیرانەکا مەزن یا ئابووری دایە ئەردۆگان دخوازیت ب رێیا ئەلمانیا خوە رزگار بکەت و دێ بزاڤێ کەت سەرمایەدارێن ئەلمانیا ل تورکیا کار بکەن).
