پەرلەمانتارەك : رێكەفتنا هەرێم و بەغدا د بەرژەوەندیا هەردوو حوكومەتان دایە
ئه‌ڤرۆ نیوز: ره‌مه‌زان هه‌رنی
محه‌مه‌د ئه‌مین فارس مزوری، ئه‌ندامێ جڤاتا نوونه‌رێن ئیراقێ بۆ ئه‌ڤرۆ نیوز راگه‌هاند؛ تێكگه‌هشتنا دناڤبه‌را حكومه‌تا هه‌رێما كوردستانێ و ئیراقێ دا، پێنگاڤێن باش بۆ رێككه‌فتنا هه‌میشه‌یی برینه و ل سه‌ر بودجه‌یا سالا 2021 ژی، شاندێن هه‌رێمێ دگه‌ل به‌غدا كۆمبووینه، لێ تا نها چ رێككه‌فتن نه‌هاتینه كرن و رێككه‌فتن هه‌كه ئیمزاكری نه‌بیت ژی، دێ بیته ئه‌گه‌ر كو ئه‌و پرۆژه‌یێن ژ حكومه‌تێ بۆ په‌رله‌مانێ دچن دێ د باش بن و د به‌رژه‌ونه‌دییا هه‌ردو حكومه‌تان دا بیت.
محه‌مه‌د ئه‌مین دیار ژی كر، ده‌ما پرۆژه‌یه‌ك دگه‌هیت په‌رله‌مانێ و حكومه‌تا رێككه‌فتن ل سه‌ر كربیت دێ زۆر ب ساناهیتر بیت ل په‌رله‌مانێ و د هه‌مان ده‌مدا گرنگه شاندێ سیاسییا كورد ل سه‌ر ئاستێن بلند سه‌ره‌دانا به‌غدا بكه‌ت و دگه‌ل كوتله‌یێن سیاسی رێككه‌فتنان بكه‌ن، ژ به‌ركو ئه‌و كوتله د ناڤا په‌رله‌مانێ دا نه و رێككه‌فتنا سیاسی ل ده‌رڤه‌یێ په‌رله‌مانێ دێ گرنگییا خوه هه‌بیت و پێدڤییه كار ل سه‌ر بهێت كرن.
ئه‌ندامێ جڤاتا نوونه‌ران گۆت ژی: تا نها چ هیڤی نینن هه‌لبژارتنێن پێشوه‌خت ل خزیرانا سال بهێت بهێن كرن ژ به‌رنه‌بوونا به‌رهه‌ڤییه‌كا ته‌مام، لێ كوتله‌یێن نها ل ئیراقێ خودان هێز، هه‌ر دێ جاره‌ك دن ژی ئه‌و ده‌ستهه‌لاتێ وه‌رگرن، له‌ورا رێككه‌فتنا سیاسی دگه‌ل یا قانوونى گرنگه.
