پەرلەمانتارەك: نزار ئامێدی نوونەراتییا هەموو گەلێ ئیراقێ ناكەت
ئەندامەكێ فراكسیۆنا پارتی ل جڤاتا نوونەرێن ئیراقێ راگەهاند: كو نزار ئامێدی نوونەراتییا هەموو ئیراقییان ناكەت و هەلبژارتنا وی ژی بەرهەمێ «دەستێوەردانا ئالیێن دەرەكییە» د كارۆبارێن ئالیێن كوردی دا.
پشتی هەلبژارتنا نزار ئامێدی وەك سەرۆككۆمارێ نوو یێ ئیراقێ، پێلەكا نەڕازیبوون و رەخنەیان پشكەك ژ فراكسیۆنێن سیاسی ڤەگرتن.
شێروان دووبەردانی، ئەندامێ فراكسیۆنا پارتی دیموكراتی كوردستان ل جڤاتا نوونەرێن ئیراقێ، گۆت: سەرۆككۆمارێ نوو یێ وەلاتی نوونەراتییا هەموو پێكهاتەیێن گەلێ ئیراقێ ناكەت، چونكی پرۆسەیا هەلبژارتنا وی دوور بوویە ژ رێككەفتنا د ناڤبەرا هێزێن كوردی دا.
دووبەردانی ئاماژە ب وێ چەندێ كر، كو ئێكەتییا نشتیمانییا كوردستانێ بۆ ئێكلاكرنا ئەڤی پۆستی پەنابریە بەر ئالیێن چارچۆڤەیێ هەماهەنگیێ و پشكەك ژ ئالیێن سوننی، ئەڤە ژی وەك «دەستێوەردان د كارۆبارێن ناڤخۆیی یێن كوردان دا» هەژمارت.
هەمان دەم هۆشداری دا كو پشكەك ژ وان ئالیێن دەنگ داینە سەرۆككۆماری، «پەیوەندییا وان ب وان گرووپان ڤە هەیە یێن هێرشێن درۆنی دكەنە سەر هەرێما كوردستانێ».
دوپات ژی كر، كو بایكۆتكرنا كۆمبوونێ ژ ئالیێ پارتی، دەولەتا یاسا و چەند فراكسیۆنێن دی ڤە، نیشانا نەڕازیبوونێیە بەرامبەر سەپاندنا ئیرادەیا سیاسی.
ژ ئالییەكێ دی ڤە، حەیدر ئەسەدی، ئەندامێ هەڤپەیمانییا عەزم یا سوننی، دلگرانییا خۆ ل سەر نەبوونا هەڤدەنگییا نشتیمانی ل سەر بەربژارێ پۆستێ سەرۆككۆماری دیار كر.
ئەسەدی راگەهاند: «هیڤیدار بووین هەلبژارتنا سەرۆككۆماری ببیتە پرەك بۆ نێزیكرنا هەولێرێ و بەغدایێ و دەربازكرنا ناكۆكیێن د ناڤبەرا پارتی و یەكێتیێ دا، بەلێ تشتێ روودای دێ كارتێكرنا نەرێنی ل سەر پاشەڕۆژا پرۆسەیا سیاسی كەت.»
ئەسەدی ئاماژە ب وێ ژی كر، كو هەرچەندە ئالیێن ئیراقی دەست د ئێكلاكرنا پۆستیدا هەبوو، بەلێ ئالیێن كوردی بخۆ رێ داینە وێ دەستێوەردانێ ژ بەر نەبوونا بەربژارەكێ هەڤپشك.
