پەرلەمانتارەك: هەرێم ب پێداگیریا سەرۆك بارزانی و قوربانیدانا خەلكێ وێ و هەموو ئالیێن سیاسی هاتیە پێكئینان
ئەڤرۆ
ئەندامەكا جڤاتا نوونەرێن ئیراقێ ژ فراكسیۆنا پارتی دیموكراتی كوردستان ڕاگەهاند، كیانێ دستووریێ هەرێما كوردستانێ بەرهەمێ هەموو پارت و ئالیێن سیاسی و جەماوەرێ كوردستانێ یە و بۆ هیچ هێزەكێ نینە كیانێ هەرێما كوردستانێ هەلوەشینیت.
كاڤین شێخ سەعید، پەرلەمانتارا فڕاكسیۆنا پارتی ل جڤاتا نوونەرێن ئیراقێ بۆ ڕۆژنامەیا (ئەڤرۆ) گوت» كیانێ دستووریێ هەرێما كوردستانێ ب پێداگیریا سەرۆك بارزانی و خەبات و قوربانیدانا خەلكێ هەرێما كوردستانێ و هەموو پارت وئالیێن سیاسی هاتیە بەرهەم و پێئینان، كیانەكێ دستووریێ سیاسیە دچوارچۆڤەیێ ئیراقێ دا و هیچ ئالیەكێ سیاسی شیانێن ژناڤبرنا كیانێ هەرێما كوردستانێ نینە».
پتر گوت» نزانم ڕۆژنامەیا (ئەلسەباح) یا ئیراقی ئەو ڕاپرسیا بەلاڤكری ل سەر چو بیڤەر و بنەما وەرگرتیە، كو پتریا خەلكێ هەرێما كوردستانێ دخوازن ڤەگەڕن سەر ئیراقێ، وێ ڕۆژنامێ یا ژبیركری ل ڕۆژا ١٧ی ئیلۆنا ٢٠١٧ێ ڕێژەیا هەرە مەزن یا خەلكێ كوردستانێ كو ٩٢%ێ یا وەلاتیان دەنگ بۆ سەربخوەیا هەرێما كوردستانێ دایە».
خۆیاكر ژی» فیدڕالیەتا ئیراقێ ب بڕیارەكا سیاسی و ڕێككەفتنا ئالیێن سیاسی و دناڤا جڤاتا نوونەرێن ئیراقێ دەنگ ل سەر هاتیەدان، هەموو پێكهاتەیێن ئیراقێ پشكداربوونە د بڕیارا فیدڕالیەتا ئیراقێ دا، بەلێ ناهێتە ڤەشارتن دەمەكە هندەك و ئالیێن شۆڤێنی پیلان هەنە بۆ هەلوەشاندنا كیانێ هەرێما كوردستانێ، بەلێ ئەم خەلكێ خوە پشتڕاست دكەین بزاڤێن هەلوەشاندنا هەرێما كوردستانێ سەرناگرن و هەموو دهێنە ژناڤبرن، كو ئێك ژوان پیلانا دژایەتیا كابینا نەهێ یا حوكمەتا هەرێما كوردستانێ یە».
كاڤین شێخ سەعید ئاماژەكر» ڕاستە ناكۆكی و ئالۆزی د ناڤبەرا ئالیێن هەرێما كوردستانێ دا هەنە، لێ ئەم پشتڕاستین ئەو ناكۆكی دێ ل نێزیك هێنە چارەسەركرن، ناهێتە ڤەشارتن ژی گازندە هەنە ل سەر شێوازی حوكمڕانیا هەرێما كوردستانێ، ئەوژی ژبەر كێمیا خزمەتگوزاریان و بلندبوونا بهایێ كەلوپەلان دبازاڕی، بەلێ ئەڤە تنێ ل هەرێما كوردستانێ نینە، بەرۆڤاژی ل وەلاتێن دی ژی ئاریشەیێن نەبوونا پێدڤیێن ژیانێ و بلندبوونا بهایێ كەلوپەلان هەیە، ڕێژەیا هەژاریێ ل دەڤەرێن دی یێن ئیراقێ زێدەترە ژ هەرێما كوردستانێ، دگەل هەبوونا ڤان گازندەیان ژی پیرۆزیێن هەرێما كوردستانێ ژ هەر پێدڤیەكێ ژیانێ ل پێشترە وبۆ چو كەسەكی نینە دەست ل ڤان پیرۆزیان بدەت و داخوازێ ژ سەرۆك بارزانی دكەین پێشنیازەكێ بكەت ژبۆ كۆمكرنا هەموو هێز و ئالیێن سیاسی ب مەرەما چارەسەركرنا ئاریشەیێن د ناڤمالا كوردی دا ب ڕێكا دانوستاندنێ و كورد ب ئێك دەنگ و ب ئێك دەست بچنە بەغدا».
