پەرلەمانتارەکا پارتی: چو بنەما بۆ ھەلوەشاندنا ئەنجامێن ھەلبژارتنان ل ھەرێمێ نینن
ئەڤرۆ نيوز:
ئەندامەکا جڤاتا نوونەرێن عیراقێ ژ فراکسیۆنا پارتی دیموکراتی کوردستان، پێزانینێن پەرلەمانتارەکێ کۆمەلا ئیسلامی کوردستان ب شاش دەردئێخیت وراگەھاند، چو بنەما بۆ ھەلوەشاندنا ئەنجامێن ھەلبژارتنان ل پارێزگەھێن ھەرێما کوردستانێ نینن.
نەدا مێرگەسۆری، ئەنداما جڤاتا نوونەرێن عیراقێ ژ فراکسیۆنا پارتی دیموکراتی کوردستان دداخۆیانیەکا رۆژنامەڤانی دا گۆت، ل کۆمبوونا رۆژا دوشەمبی 28/5/2018 یا جڤاتا نوونەرێن عیراقێ، تنێ بریار ل سەر ھەلوەشاندنا ئەنجامێن ھەلبژارتێن جڤاتا نوونەران ل دەرڤەی وەلاتی وئاوارێن پارێزگەھێن ئەنبار وسەلاحەدین ونەینەوا دیالا، ژبلی کێمەنەتەوان ھاتیە دەرکرن.
نەدایێ ئاماژە ب وێ چەندێ کر، برگا دوێ ژ بریارا جڤاتا نوونەرێن عیراقێ ھژمارتنا 10% یە ژ سندووقێن دەنگدانێ ل ھەموو پارێزگەھێن عیراقێ کو ھەکو دەرکەفت ئەنجامان ب رێژا 25% جوداھی ھەیە ل گەل ئەنجامێن دەنگدانا ئەلکترۆنی، وی دەمی دێ بریار ل سەر ھژمارتنا دەستی ل سەرانسەری عیراقێ وھەرێما کوردستانێ ھێتە دان.
نەدا مێرگەسۆری دیارکر ژی، ل دووڤ مادێ 102 ژ دستوورێ عیراقێ، کۆمسیۆنا بلند یا سەربخوە یا ھەلبژارتنان ل عیراقێ دبن چاڤدێریا جڤاتا نوونەران وپێدڤیە یا پَگیر بیت ب بریارێن جڤاتێ.
ئاشکراکر ژی، ھێلانا ئەنجامدانا روونشتنێن جڤاتا نوونەرێن عیراقێ ڤەکری بۆ داخوازرنا ئەندامێن کۆمسیۆنێ وستاندنا باوەریێ ژوان، لەوما کۆمبوونا داھاتی یا جڤاتا نوونەران پێدڤی ب رێژا قانوونی نینە، چونکی روونشتن ب ڤەکری یا ھێلای، ھەکە دحالەتەکی ژی دا کۆمسیۆنا بلند یا سەربخوە یا ھەلبژارتنان ل عیراقێ بەرسڤا بریارێن جڤاتا نوونەرێن عیراقێ نەدەت، دێ ئەندامێن کۆمسیۆنێ ھێنە گازیکرن ودێ تووشی پرسیار وبەرسڤان وستاندنا باوەریێ بن.
ئەڤ ئاخڤتنێن پەرلەمنتار نەدا مێرگەسۆری ددەمەکی دانە کو ل ئێڤاریا رۆژا دوشەمبیا بۆری 28/5/2018 ئەحمەد حاجی رەشید، ئەندامێ جڤاتا نوونەرێن عیراقێ ژ فراکسیۆنا کۆمەلا ئیسلامی راگەھاندبوو کو ئێک ژ بریارێن جڤاتا نوونەرێن عیراقێ ھەلوەشاندنا ئەنجامێن ھەلبژارتنایە ل پارێزگەھێن ھەرێما کوردستانێ وکەرکووکێ.
