پەرلەمانتارەکا پارتی: ھەتا دەلیڤا دانوستاندنان مابیت بایکۆتا بەغدا ناکەین
ئەڤرۆ:
دوھی نێچیرڤان بارزانی، سەرۆکێ حوکمەتا ھەرێما کوردستانێ ل گەل نوونەرێن کورد ل پەرلەمان و حوکمەتا عیراقێ ل دۆر ئاریشێن د ناڤبەرا ھەولێرێ و بەغدا کومبوو، سەرۆکێ فڕاکسیۆنا ئێکگرتوو ئیسلامی راگەھاند، حوکمەتا ھەرێمێ یا رازیە رێژا پەترۆلێ رێککەفتن ل سەر ھاتیە کرن بھنێریت ، پەرلەمانتارەکا پارتی ژی دبێژیت، ھەتا دەلیڤا دانوستاندنان ھەبیت، نابیت خوە ژ بەغدا ڤەکێشین.
موسەنا ئەمین، سەرۆکێ فڕاکسیۆنا ئێکگرتووی ئیسلامی ل پەرمانێ عیراقێ بۆ ئەڤرۆ گۆت” د کۆمبوونا دوھی یا نێچیرڤان بارزانی سەرۆک وەزیرێن ھەرێما کوردستانێ ل گەل نوونەرێن کوردان ل بەغدا، ب ھووری بەحسێ ئاریشێن د ناڤبەرا ھەولێرێ و بەغدا ھاتنەکرن و حوکمەتا ھەرێمێ پێگیریا خوە ب رێککەفتنا ل گەل بەغدا بۆ ھنارتنا پەترۆلێ دوپاتکر، کو رۆژانە ئەڤێ رێژا رێکەفتن لسەر ھاتیەکرن بھێتە فڕێکرن، بەلێ ب مەرجەکی رەنگە دبیت ھندەک جاران ژلایێ تەکنیکی ڤە نەشێت ٥٥٠ ھزار بەرمیلان بھنێریت، لێ دوماھیا سالێ دڤێت بۆ ھەر رۆژەکێ ئەڤ ئەنجامە دەرکەڤیت و ھەرێم یا پابەندبیت، نێچیرڤان بارزانی ئەم پشتڕاستکرین ھەرێم ئاریشان پەیداناکەت و چاوا د قانوونا بودجەی دا ھاتیە، دێ وەسا ھێتە بجھئینان و ئەڤە ژی خالەکا گرنگە بۆمە، ب تایبەتی نوکە ئەم یێ د قەیرانەکا ئابووری یا دژواردا”.
موسەنای گۆت ژی” ھەکە حوکمەتا عیراقێ ھەر یا بەرھەڤ نەبیت بودجە و موچێ فەرمانبەرێن ھەرێما کوردستانێ ڤرێکەت، بێگومان ئەم نوونەرێن خەلکێ کوردستانێ ینە و رازینابین نانێ خەلکێ مە بھێتە بڕین، ژ بەر کو ب قانوون رێککەفتن ل سەر ھاتیەکرن و د بودجێ گشتیێ عیراقێ دا بەھرا ھەرێمێ ھاتیە دیارکرن، ھەکە بەغدا ئاریشان بۆ ھەرێمێ پەیدا بکەت، ئەم دبەرھەڤین نەچینەڤە بەغدا، حوکمەتا ھەرێمێ رازیبوونا خوە دیارکر، ھەکە پێدڤی بیت دێ سەرەدانا بەغدا کەن و داخواز ژ وەزیرێن کورد یێن حوکمەتا عیراقێ ھاتەکرن، رێ خوەش بکەن بۆ گەھشتن ب رێککەفتنەکێ و ئاسانکاری بھێنەکرن بۆ بجھئینانا قانوونا بودجەی” .
نەدا عەنتەر، پەرلەمانتارا پارتی دیموکراتی کوردستان ل بەغدا بۆ ئەڤرۆ گوت” پێدڤیە ھەردولا پێگریێ ب رێککەفتنێ بکەن و بھێتە بجھئینان، بەلێ فەرە میکانیزمەک ھەبیت بۆ رێککەفتنێ، ئەڤرۆ عێراق یا د قەیرانەکا ئابووری و ئەمنی دا دبۆریت، مە پێدڤی ب بەغدا یا ھەی و بەغدا ژی پێدڤی ب ھەرێمێ یا ھەی”.
نەدایێ گۆت ژی” ھێشتا ئاریشە نەگەھشتیە وێ چەندێ نوونەرێن ھەرێما کوردستانێ بایکۆتا پەرلەمانی یان بەغدا بکەن، چونکو ھندی پیچەکا دەلیڤێ مابیت، دڤێت دانوستاندن بھێنەکرن و لێکتێگەھشتنەک ھەبیت، ھەردەمێ گەھشتە وی رادەی حوکمەتا عەبادی بێژیت ئەم پێگیر نابین و موچێ فەرمانبەران نا ھنێرین، دێ بیتە بابەتەکێ دی و مە ژی بێگومان دێ ئاخڤتنا خوە ھەبیت”.
