پەرلەمانتارەکێ عیراقێ: پرۆژی چاکسازیا عەبادی دبیت دکتاتۆریەته‌کا دی پەیدا بکەت
ئەڤرۆ نیوز:
پەرلەمانێ عیراقێ دۆھێ11ى ته‌باخێ پرانیا دەنگدان پرۆژی چاکسازیا عەبادی پەسەندکرن، ئەندامەکێ جڤاتا نوونەرێن عیراقێ بۆ ئەڤرۆ دیارکر، کوردان چو ئاریشە ل گەل پرۆژی چاکسازیێ نینن، ب مەرجەکێ ھەکە ل سەر بنیاتێ دەستووری بجهـ بھێت و بەروڤاژی دێ زیانێن خوە ھەبن، 10 خالێن پرۆژی چاکسازی دا کو عەبادی دەستھەلات داینە خوە ئەڤە دێ مەترسیا ل سەر عیراقا دیموکراتی دروست دکەت.
رێناس جانۆ ئەندامێ جڤاتا نوونەرێن عیراقێ بۆ ئەڤرۆ دیارکر کو پرانیا ئەندامێن پەرلەمانى دەنگ ل سەر پرۆژێ چاکسازیێ دان، لێ دێ مینت قووناغا دویێ و چاوانیا بجهـ ئینانا ڤێ پرۆژه‌يی ژ سەرجەمێ 19 خالێن چاکسازی دۆرێن 10 خالان ژێ حەیدەر عەبادی دەستھەلات تێدا ب خوە داینە ئەڤە ژى دێ عیراقێ بەرەڤ دکتاتوریێ بەت و گەلەک مەترسیه عەبادی دەستھەلاتان بده‌تە خوە لێ ب ھەر حالێ ھەبیت نابیت پرۆژی چاکسازی زیانێ بگەھینتە ھەرێما کوردستانێ.
شاخەوان عەبدولا ئەندامێ جڤاتا نوونەرێن عیراقێ بۆ ئەڤرۆ دیارکر کو پەرلەمانێ عیراقێ دوھێ 11ى ته‌باخێ بەرنامێ حەیدەر عەباری بۆ چاکسازی پەسەندکر و گۆت: “ئەم د گەل ھەر داخوازیەکێ نە یا وەلاتی بکەن لێ ھەکەر بریار بھێنە دان بۆ لاوازکرنا سونە و کوردان ل عیراقێ دێ دژی وان بریاران راوەستین”.
گۆتژی: “ھەر چەندە بەرنامێ عەبادی ھاتە پەسەندکرن، لێ ئەز دبينم وەکو پەرلەمانتار مە دکتاتوره‌ک ل عیراقێ دروستکر دێ زیدەگاڤێ ل سەر دەستووری عیراقێ ھێنە کرن، ئەم د گەل داینە چاکسازی بھێتە کرن ھەکەر مەرەم پێ لێدانا سونە و کوردان نەبیت، چونکو وەکو من دیتی خوەپیشاندانێن وەلاتیان ژ بەر نەبوونا خزمەتگوزاریان تایبەتی ژێى نەبوونا کارەبی بوون، لێ د بەرنامێ عەبادی دا بەحسی وەزیری کارەبێ نەھاتیە کرن و گەلەک بەحسێ شەھرەستانى دھێتە کرن د ھەموو بوارەکى دا شوونا بھێتە لادان یی بوویە وەزیری کارەبی”.
ئەندامێ جڤاتا نوونەرێن عیراقێ شاخەوان عەبدولا زێدەتر گۆت: “جێگری سەرۆک وەزیرێ عیراقێ پشکا پارتی دیموکراتی کوردستان بوو ھەکەر بریارا بجهـ بھێت بھێتە ھەلوەشاندن ئەم دێ داخواز کەين جارەکا دى پوست یان بھێنە بەلاڤکرن ل سەر ھەموو لایەنێن سیاسی چونکو نابیت غەدر ل کوردان بھێتە کرن”.
ل دووڤ راگەھاندنا ئوفیسا پەرلەمانێ عیراقێ 25 داخوازی د پرۆژی چاکسازی دانە و ژوانا ژێ پرۆسیەیا کێمکرنا وەزارەتا و دەستەیان د ماوی 30 رۆژان دا بجهـ بھێت د قووناغا ئێکێ دا ژ 22 وەزارەتان بگرت دێ ھێنە تێکەلکرن و دووماھی ئینان ب دامەزراندنا ب وەکالەت بۆ پوستەیێن وەزارەتان و بریکاران. و پێشکێشکرنا پالێوراوان بۆ دامەزراندنێ بۆ پوستێن بلند دێ ھەموو بنە شیوەیێ لێھاتوویێ و زیرەکێ و ئەستۆپاکیێ پالێوراوان و دووماھی ئینانا ب دوسیەیا دامەزراندنێ ب وەکالەت تایبەتی ژى د پوستێن سەربازی و ئەمنی و پێشکێشکرنا پالێوراوان بۆ پوستێن سەرۆکێ ئەرکانێ سوپا و یاریدەری وان و سەرۆکێ فرقە و سەرۆکێ دەزگەهـ و ھەولگێریا نشتیمانی و سەرۆکێ دەزگه‌هێن ئەمنی د ماوەیی 30 رۆژان دا زێدەتر نەبیت و دەست پێ کرن ب پرۆسیەیا کێمکرنا سەرۆکاتیێن وەزارت و دەستە و لایەنێن پەیوەندیدار ب وەزارەتان ب رێیا تێکەلکرنا رێڤەبەریان بۆ باشترکرنا خزمەتکرنی و داخواز دھێتە کرن ھەموو بەرپرس وەزیرێن کێم ته‌رخەمى د کارێ خوە دا کرین بھێنە لادان و لادانا وان ئەندام پەرلەمانتارێن سێ روونشتنێن پەرلەمانى دا ئاماده نەبیت و کێمکرنا ژمارا زیرەڤانێن بەرپرسان بۆ نێڤەکا ژمارا وان ھەی د ماوێ 15 رۆژان دا ئەو کەسێن خودان پوست بن دو رەگەزنامە ھەبن پێدڤیە د ماوێ 30 رۆژان دا یان دەستبەرداری پوستەیێن خوە ببن یان دەستبەرداری رەگەزناما بیانی بن زێدەباری چەندین خالین دى.
رێزان دلێر ئەنداما پەرلەمانێ عیراقێ گۆت: “چو ئاریشە د گەل پرۆژی چاکسازيێ نینن ھەکەر ب دروستاھی بھێتە بجهـ ئینان ل سەر بنیاتێ دەستووری بھێتە بجهـ ئینان کورد دێ پشتەڤانیێ ل پرۆژێ چاکسازیێ کەن ل دووڤ پرۆژی چاکسازیێ ژێ پوستێن جێگری سەرۆک کوماری و سەرۆک وەزیران ھاتنە ھەلوەشاندن و دەرمالێن تایبەت ژى ژ ھەر سی سەرۆکاتیان ھاتنە برین و پاسەوانێن بەرپرسان ژى دێ ھێنە کێمکرن و چەندین چاکسازی د پرۆژه‌يی دا ھەنە.
