پەرلەمانتارەکێ پارتیا ئەردۆگانی گەفان ل PKKێ دکەت
ئەڤرۆ نیوز:
ئەندامەکێ پەرلەمانێ تورکیا سەر ب ئاکپارتی د داخۆیانیەکێ دا راگەھاند کو ئێدی ل تورکیا چو تشتەک ب ناڤێ قۆناغا ئاشتیێ دەستپێ ناکەت و دێ پرسا کوردی ل گەل کوردان ھێتە چارەکرن و دێ بزاڤا ژناڤبرنا PKK ژی ھێتە کرن و چو دانوستاندن ل گەل پارتیا HDP ژی ناھێتە کرن.
مارکار ئەسایان ئەندامێ پەرلەمانێ تورکیا سەر ب پارتیا داد و گەشەپێدانێ (ئاکپارتی) د داخۆیانیەکێ دا بۆ دەزگەھێن راگەھاندنێ دیار کر کو ئەنجامێن ھەلبژارتنان ڤێ یەکێ نیشا مە ددەت کو پرانیا خەلکێ تورکیا دخوازن کو PKK ژناڤ بچیت، چونکو PKK رێکخراوەکا تیرۆرستی یە و مە گەلەک بزاڤ کرن کو ل گەل وان ھەڤدیتنان بکەین و پرسا کو ھەیە ب رێیا دانوستاندنان چارە بکەین، لێ وان دیسان دەست ب شەری کر و ژ بەر ھندێ ژی ئێدی چو نیەتا ئاکپارتی یا ھندێ نینە کو جارەکا دی ل گەل PKK و ھێزێن سەر ب وێ ڤە دانوستاندنان بکەت و گۆت: (ئەنجامێن ھەلبژارتنان نیشا ددەن کو خەلکێ مە دخوازیت شەرێ ل دژی PKK بەردەوام بیت و خەلکێ تورکیا بۆ ھندێ ژی پشتەڤانیا ئاکپارتیێ کریە و ئەز ب باوەرم دێ شەرێ ل دژی وێ رێکخراوێ ب ھەموو ھێزەکێ ڤە بەردەوام بیت و دڤێت PKK ژناڤ بچیت، چونکو ئەو ناھێلن پرسا کوردی ل تورکیا ل سەر بنەمایێن ئاشتیانە و دوور ژ شەری بھێتە چارەکرن).
ئەندامێ پەرلەمانێ تورکیا د پشکەکا دی یا ئاخڤتنا خوە دا ئەو یەک ژی دیار کر کو HDP نەشیا خوە ل ژێر سیبەرا PKK دەرخینیت، گەلەک جاران سەرۆک کۆمار و سەرۆک وەزیران داخواز ژ HDP کرن کو ب رەنگەکی سەربخوە سیاسەتێ بکەت و ل گۆر گۆتار و ھەلویستێن PKK سیاسەتێ نەکەت، لێ ئەو ل سەر سیاسەتا خوە بەردەوام بوون و د ھەلبژارتنێن ڤێجارێ دا خەلکێ مە بەرسڤەکا دژوار دا وان و پشتەڤانیا خوە بۆ ئارامی و ئێمناھیێ ل تورکیا دیار کرن و گۆت: (پارتیا بزاڤا نەتەوەپەرست و پارتیا دیموکراتی یا گەلان ڤێجارێ تووشی شکەستنەکا مەزن بوون، ئەو یەک نیشا ددەت کو خەلکێ مە پشتەڤانیێ ل ئاکپارتیێ دکەت، چونکو ئاکپارتی سەلماند ئەو پارتیا ھەموو گەلێن تورکیایە، نھا مە پتر ژ HDP پەرلەمانتار ژ باژێرێن کوردان دەرخستینە و ئێدی HDP نەشێت خوە وەک نوونەرێن کوردان ببینیت، ھەکە ئەو ل سەر سیاسەتا خوە یا شاش بەردەوام بن د ھەلبژارتنەکا دیتر دا نەشێن بچنە پەرلەمانی ژی).
سەبارەت ب ھندێ کا ئاکپارتی چاوا دخوازیت پرسا کوردی ل تورکیا چارە بکەت ژی ناڤھاتی دیار کر کو مە دڤێت ل گەل کوردان پرسا وان چارە بکەین، چونکو ب شەری و کریارێن تیرۆرستی چو پرسەک چارە نابیت، شەرێ ھەتا نھا زیانا ھەری مەزن گەھاندیە کوردان ب خوە ژی وان ژی د ھەلبژارتنێن ڤێجارێ دا ئەو پەیامە دانە پارتیا مە کو پرسا کوردی دوور ژ شەری چارە بکەین، پرسا کوردی ل گەل PKK و HDP چارە نابیت، بەری نھا مە گەلەک بزاڤ کرن لێ وان نەڤێت ئەو پرسە ب دانوستاندنان چارە بیت، ژ بەر ھندێ دێ ل گەل کوردان و ب رێیا دانوستاندنان و ب رێیا پرۆژێن دیموکراتی مافێ کوردان ھێتە دان و دێ PKK ژی ژناڤ چیت و گۆت: (ئاکپارتی بەرنامەکێ بەرفرەە و باش بۆ پاشەرۆژا تورکیا ئامادە کریە، پشکەک ژ وی بەرنامەی ژی سەبارەت ب چارەکرنا پرسا کوردی یە، لێ من دڤێت جارەکا دی ڤێ یەکێ بێژم کو د بەرنامێ مە دا چو جھەک بۆ PKK و HDP نینە و ئەم ب چو رەنگەکێ ل گەل وان دانوستاندنان ناکەین).
پەرلەمانتارێ ئاکپارتیێ د دووماھیا ئاخڤتنا خوە دا ئەو یەک ژی نەڤەشارت کو پارتێن بەرھنگاریێ ل تورکیا شکەستن خوارن و باوەریا خەلکێ ب وان نەمایە، چونکو ئەو خوەدان چو پرۆژێن بەرچاڤ بۆ چارەکرنا پرسێن تورکیا نینن و تنێ کارێ وان ئەوە کو رەخنان ل مە دگرن و ئەو ژی نیشا ددەت کو ئەم ب ھێزین و خەلکێ ژی د ھەلبژارتنان دا ئەو یەک دۆپات کر و بەرسڤەکا توند و دژوار ژی دا وان پارتیان و گۆت: (مە گەلەک سۆز داینە خەلکێ تورکیا، ئەم دێ بێی جوداھی خزمەتا ھەموو پێکھاتێن تورکیا کەین و دێ وەلاتێ خوە ژ رەوشا نھا یا خراب قورتال کەین و دێ د ھەر بیاڤەکێ دا تورکیا بیتە وەلاتێ ب ھێز ل دەڤەرێ و ئاکپارتی ئەو ھێزە ھەیە کو بشێت ڤان کاران بکەت).
