پەرلەمانتارەک: حوکمەتا نوو دڤێت بوودجە ڤەنەگەریتە حوکمەتێ دا ھەر بەھانەکا ھەبیت بکەتە ستوویێ حوکمەتا بەرێ
ئەڤرۆ، نیوار محەمەد سەلیم:
ئەندامەکێ جڤاتا نوونەرێن عیراقێ ئاشکەرا کر کو بڕیارە لژنەک دووڤچوونا پرۆژێ بوودجا 2019ێ یێ عیراقێ بکەت و ئەو دێ بڕیارێ دەت کا دێ ڤەگەریتە حوکمەتێ یان نە. دا زانین ژی کو حوکمەتا نوو دڤێت بوودجە ڤەنەگەریتە حوکمەتێ دا ھەر بەھانەکا ھەبیت بکەتە ستوویێ حوکمەتا بەرێ
ھندرین لەزگین دۆسکی، ئەندامێ جڤاتا نوونەرێن عیراقێ ل سەر فراکسیۆنا پارتی دیموکراتی کوردستان د داخۆیانیەکێ دا بۆ رۆژناما ئەڤرۆ ئاشکەرا کر کو لژنەکا ھەڤپشک د ناڤبەرا جڤاتا نوونەران و حوکمەتێ دا یا چێکری، دێ ھندەک تێبینیان ل سەر بوودجێ دیار کەت و وی دەمی جڤاتا نوونەران دێ بڕیارێ دەت کا دێ وان تێبینیان وەرگریت کا بوودجە بھێتە راستڤەکرن یان ژی دێ ھێتە ڤەگەراندن بۆ حوکمەتێ.
ھندرین لەزگین دۆسکی گۆت: “حوکمەتەکێ ئەڤ بوودجە یێ دانایی کو ماوێ وێ یێ ب دووماھی ھاتی و نوکە حوکمەتەکا دی یە و ھەر کێماسیەک ھەبیت عەبدولمەھدی دێ بەھانا وێ چەندێ گریت کو ئەو ل سەر دەمێ وی نەبوویە و دێ بیتە خالەک بۆ خوە ب کاربینیت”.
ئەندامێ جڤاتا نوونەرێن عیراقێ ل سەر فراکسیۆنا پارتی دیموکراتی کوردستان دا زانین ژی کو ئێک ژ خالێن گەلەک گرنگ یێن پارتی کار ل سەر دکەت پشکا ھەرێما کوردستانێ یە کو 12.67% د بوودجەیی دا ھاتیە، “مە دڤێت ڤێ راست ڤە کەین”.
ئاشکەرا ژی کر کو گۆژمەکێ گەلەک مەزن ژ بوودجێ بۆ مەزاختیێن سەروەریێ ل عیراقێ ھاتیە دانان و ئەو گۆژمێ پارەیی ژ بوودجێ دھێتە ھەلگرتن پاشان ئەڤ بوودجا بۆ ھەرێما کوردستانێ ھاتیە تەرخانکرن دھێتە دانان، “ئانکو ب ڤی رەنگی 7% ژی ژ بوودجا عیراقێ ب بەر ھەرێما کوردستانێ ناکەڤیت”.
ل دۆر چارەسەریا ڤێ چەندێ ژی ھندرین لەزگین دۆسکی گۆت: “نوکە وەزیرێ دارایی یێ حوکمەتا عیراقێ ل سەر پشکا پارتی یە و کوردە و د لژنا دارایی ژی دا مە کەسانێن زیرەک یێن داناین کو بشێن راستڤەکرنەکێ لێ بکەن ب رێیا قانوونێ کارتێکرنەکێ لێ بکەن”.
زێدەتر گۆت: “ئێک ژ وان خالان ئەوە کو بوودجێ مەزاختیێن سەروەریێ کێم کەین، ب ڤی رەنگی ژی دێ بوودجێ عیراقێ ژی زێدە بیت و ب ڤی رەنگی یێ ھەرێما کوردستانێ ژی دێ زێدە بیت”.
دەربارەیی وێ چەندێ کو پتریا نوونەران ل گەل ڤەگەراندنا بوودجێ نە، ئەڤی نوونەری گۆت: “نوکە 80% ژ نوونەرێن جڤاتا نوونەران ل گەل وێ چەندێ نە کو بوودجە ڤەگەریتە حوکمەتێ، چونکو گەلەک پارێزگەھێن سوننی ھاتینە وێرانکرن و پێدڤی ب ئاڤەدانیێ نە، بۆ نموونە بوودجێ بۆ پارێزگەھا نەینەوا نابیتە 2%ێ د دەمەکی دا بۆ مەزانتیا خوە پارێزگەھا دویێ یە ل عیراقێ و تووشی چەندین کارەسات و وێرانکاریان ببوو، ژ بەر ھندێ لایەنێن سوونی ژی ل گەل ڤی بوودجەیی نینن.
ل دووماھیێ ژی گۆت: “لایەنێن شیعی ب رەنگەکێ گشتی ل گەل وێ چەندێ نینن کو بوودجە ڤەنەگەریتە حوکمەتێ”.
ل رۆژا 28ی چریا ئێکێ 2018 حوکمەتا حەیدەر عەبادی د رۆژێن خوە یێن دووماھیێ دا رەزامەندی ل سەر بوودجێ عیراقێ بۆ سالا 2019ێ دەربڕی و رەوانەیی جڤاتا نوونەران کر.
جڤاتا وەزیران ب پشت بەستن ل سەر ماددێ 62 برگا ئێکێ و ماددێ 80ێ برگا دو بوودجێ پێشبینیکری یێ عیراقێ بۆ سالا 2019ێ رەوانەیی جڤاتا نوونەرێن عیراقێ کر.